Monday, 28 July 2014
Rene Herde: Bon gobernacion ta na prome luga mehora presente y sigura futuro di pais Print E-mail
Tuesday, 16 April 2013 21:01

rene

E proposicion di gobierno pa ancra reglanan di bon maneho financiero den constitucion ta un bon forma pa yuda sigura un bon administracion y uzo di placa di nos pais awor y den futuro. E protocol cu gabinete Mike Eman a forma Diahuebs Santo ultimo cu gobierno Hulandes, ta un bon instrumento pa cuminsa paga nos debenan den un forma responsabel.

Ta prome biaha den historia cu ta logra algo asina! E control di Banco Central riba nos florin y economia, e control di parlamento riba presupuesto y plannan di gobierno, e cumplimento di gobierno y parlamento cu ley y reglanan di nos pais, tur ta bon instrumentonan pa sigura un bon maneho di nos pais. Esaki ta e cosnan cu hopi biaha ta referi na dje ora ta papia di “bon gobernacion”. Sinembargo e criterio mas importante y crusial di “bon gobernacion” ta e forma cu gobierno ta cumpli cu e necesidadnan di pueblo. Cu esaki no kier men cu gobiernonan tin cu gasta placa na cosnan djies pa tene pueblo contento. Sigur cu no. Esaki nos a wak cu no ta funciona niun caminda na mundo. Loke si “bon gobernacion” kier men, ta cu gobierno ta percura pa mehora e presente y futuro di nos pais, di tal forma cu tur hende ta haya mas oportunidad awor, pa traha na un miho futuro pa nan mes y nan famia! Esaki ta loke Rene Herde, lider di fraccion di AVP, a bisa entre otro den un reunion cu profesionalnan hoben den fin di siman. E grupo creceiente aki no kier para na banda y traha como profesional so. Nan kier wordo envolvi mas y mas directo den duna direccion y construi e miho Aruba di mayan.

BON GOBERNACION NA ARUBA

E experiencia di Aruba riba tereno di “bon gobernacion” ta varia hopi. E rapport di WODC traha riba e periodo di gobernacion di aña 2001 pa 2009, ta mustra un cantidad di ehempel con gobierno di MEP a kibra tur posibel regla di nos pais y gasta masha hopi placa, sin cu pueblo por wak beneficio di esaki. Esaki a conduci na entre otro un mal maneho riba tereno financiero, di husticia, di malgastamento di placa na proyectonan cu ningun hende a pidi p’e y na gastamento di placa cu a beneficia un grupito di famia y amigo so. Loke e rapport aki no ta describi, ta cu den e mes un periodo e gobierno di MEP, no a percura pa mehora e presente y futuro di nos pais den un forma concreto. Esaki a conduci na un decadencia riba tur tereno y un instabilidad pa nos pais y pa pueblo. Te awe gobernantenan di MEP no por splica ta na kico a usa tur e placa di pueblo. Nan no por mustra un bario cu a wordo renoba, manera e tempo ey caba pueblo tabata pidi p’e. Nan no por mustra riba renobacion di edificionan di gobierno of creasion di areanan di recreasion. Nan no por mustra riba fortificacion di e fondonan di pensioen, e fondo di seguro medico of e creasion di un pensioen general pa trahadonan den sector priva. Te awe nan no por mustra cu nan a scucha pueblo y haci algo pa mehora bida awor y sigura bida den futuro na Aruba.

Ta pesey, tur e desaroyonan den barionan rond di Aruba, den centronan di ciudad, den tur e klin kernan cu ta pone pa mehora bida den barionan cu a wordo lubida, den mehoracion di turismo y creasion di un pilar economico nobo, ta asina importante y tin sosten asina grandi di pueblo. Ta pesey e fortificacion di e fondonan di pensioen y mehoracion di e servicionan medico, aunke nan ta haci dolo, ta haya asina hopi sosten den pueblo. Ta pasobra ta esakinan ta e cosnan cu pueblo kier wak sosode den nan pais. Pasobra ta e cosnan aki ta haci cu pueblo ta wak unda nan placa ta bay y nan ta sinti cu nan bida awe ta bira miho. Nan ta wak cu e futuro di nan jiunan ta wordo sigura. Esaki ta kisas e criterio mas importante di “bon gobernacion”. Esta cumpli cu e necesidadnan di pueblo pa awor y futuro! Esaki ta exactamente loke gobierno di AVP ta haciendo awor aki!

Comentarionan (4)Add Comment
The Observer
April 18, 2013
201.229.42.164
Votes: +0
...

Haci obligashon constitushonal: Publica TUR datos di finansas di gobierno riba internet pa TUR hende por yuda controla y vigila corupshon (inclui TUR NV di gobierno). Esey lo ta berdadero democracia...of no? No grawata e problema riba su lomba...gare na su nek.

jos
April 17, 2013
201.229.72.31
Votes: +3
...

bunita storia pueblo ta cansa di tende mep esaki mep esey ta avp ta den gobierno , e realidad ta cu tempo di mep pueblo no twt biba den angustia asina pa sobrebivi tur luna , i ban ta realistico baba bay banco centraal busca cifranan berdadero pa asina compara maneho di MEP i e maneho desastroso di gobierno di avp di awor pa asina por wak kendenan berdaderamente a traha pa pais ARUBA , berdad bon gobernacion ta na prome lugar pero esey no kier men gasta pa loco awor anto laga futuro generation pagador di belasting keda cu boso debenan pa mal gobernation , i un biaha mas bin cu cifras berdadero di banco centraal

politiek2013
April 17, 2013
201.229.40.114
Votes: +14
...

na tur e avpista nan...bai bisa bo lider pa paga e debe di belasting cu su famia a wordo exonera...y bai paga debe nan tanto Interbank y Aruba Bank...anto despues boso por pensa di papia desparate di cualkier otro lider di cualke partido...wak boso cura ta limpi prome!!! den mi buki nan un prome minister cu ta punta dede riba otro anto ta pretende cu e no a kibra un copi...ta esun cua exonera su famia mas di 7 miyon florin di belasting esta placa di pueblo...in de land der blinden is the een oog koning!!!

Jonathan Lake
April 17, 2013
201.229.35.210
Votes: +16
...

Bon gobernacion ta cuminsa cu un maneho di finansas responsabel. Un pais no por laga economia draai artificialmente riba debe so y spera cu e lo drecha. Partido AVP a coba un buraco masha hundo mes pa futuro generacionnan di Aruba. Ora mester bin cu inversionnan grandi pa por economisa riba oportunidadnan ora economia na mundo drecha, Aruba lo keda atras pasobra e debenan cu a ser crea awo a herida nos mortalmente.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter