Thursday, 31 July 2014
Prome Minister Mike Eman: Eddy ‘Tec’ Tromp ta un baluarte di Montaña, Noord y henter Aruba Print E-mail
Thursday, 06 June 2013 19:36

front

Un homber humilde di poco palabra. Riba su cara por a reconoce un emocion di e momento. Esey ta e Eddy Tromp cu tur hende ta conoce y stima. P'esey tambe tabata un seleccion hopi facil pa e ekipo di BoBario ora a eligi e baluarte di Montaña. Diahuebs mainta, den compania di su casa, famia y amigonan di cas, Sr. Eduardo Tromp a ricibi for di man di Prome Minister Mike Eman su plakkaat di reconocemento pa e trabou haci na comunidad, su ehempel como ciudadano Arubiano y preservacion di nos cultura.

Na 1962 Eddy a cuminsa traha na Radio Kelkboom den Emmastraat como operador, tecnico di grabacion y el a pasa den practicamente tur departamento di e emisora. Dos aña mas laat el a cuminsa cu e idea di un programa cultural y educativo cu musica, poesia y composicionnan Arubiano-Antiyano. Asina Butishi di Alegria a cuminsa cu Ito Tromp y a keda den sintonia pa mas cu 40 aña na Radio Kelkboom. Eddy a graba practicamente tur agrupacion musical di Aruba incluyendo tambe gruponan di Corsou y Bonaire y sin laga afo artistanan internacional manera Oscar d’Leon, Richi Rey, Johnny Ventura, etc. Eddy ta coopera cu zonido na hopi organisacion y centro. El a graba casi tur obra teatral di Mascaruba y a percura pa zonido na practicamente tur tipo di evento cultural musical na Aruba manera Festival di Tumba, di Calypso, Festivalnan di OTI, Voz-i-landia, Festival Papiamento y festivalnan di Ranchera. E tabata esun encarga cu zonido na entre otro Plantage Tromp, Sepa Ranch, Commandeursbaai Club, Club Boneriano, Miramar, Rooi Lamunchi y na casi tur hofi cu tabata existi. Scol, coro, festival di dande, aguinaldo y gaita, Dera Gay, Dia di Betico, Dia La Reina tambe ta conta riba dje ademas di caminatanan y careda di bicicleta rond Aruba. No por keda sin menciona tampoco e innumerabel paradanan di Carnaval di mucha y di hende grandi y tur e anochinan di bon bini festival y otro conciertonan na Cas di Cultura, Sociedad Bolivariana cu Eddy Tec a colabora cu n'e. P'esey mes, na entrega di su plakkaat, Premier Eman a menciona cu “semper Eddy ta entre e promenan presente y despues cu tur hende a bay, ainda e t'ey.” Cu esaki Eddy ta demostra e dedicacion y responsabilidad cu semper el a destaca cu n'e. Eddy a duna un man tambe na torneonan deportivo na tur parokia y na tur centro di bario, eventonan oficial di gobierno y te hasta ta pone zonido den misa y durante peregrinacion. Na 1972 Eddy a cuminsa traha na Departamento pa Cultura y Educacion, tambe como tecnico di zonido. Aki el a haci entrevista cu hopi di nos grandinan, un coleccion cu Biblioteca Nacional tin. Na 1986 Eddy ta bay pa Departamento Audiovisual di Biblioteca Nacional, tambe como profesional di zonido. Pa tur e trabounan importante durante su bida, Eddy a haya condecoracion di La Reina y tambe a comparti e famoso Prins Bernhard Cultuur Prijs. Maske cu Eddy a baha cu pensioen na aña 2000, e ta sigui traha den e fantastico ramo aki di zonido. Presente na e momento special di diahuebs mainta tabata un di e artistanan cu na tanto ocasion el a graba su presentacion y un bon amigo tambe, esta Jossy Brokke. Sr. Brokke tambe a expresa su palabranan di satisfaccion di mira con Gobierno di Aruba ta tuma e tempo y boluntad di reconoce e Arubianonan cu di un manera of otro ta destaca den comunidad pa nan meritonan. Eddy Tromp a keda masha contento cu e reconocemento cu el a haya di Gabinete Mike Eman pa su trayectoria profesional y su contribucion na sociedad. E ta gradici tur hende sin excepcion cu a dun'e un man di berdad durante henter su trayectoria como tecnico specialista di grabacion. Durante entrega di e plakkaat firma pa Prome Minister Eman, el a percura pa duna credito y danki na su señora Nacha y su yiunan, kendenan durante tur e anochinan tabata keda cas pa Eddy por traha pa comunidad di Aruba.

gallery1 gallery1 gallery1

Comentarionan (3)Add Comment
danfra
June 07, 2013
81.68.123.223
Votes: +0
...

Pabien Eddy, merecidamente. Persona humilde trahado un baluarte no di Noord so pero di Aruba henter.

bobito
June 07, 2013
201.229.76.153
Votes: +3
...

Mike stop di shupa um.bai traha

añoransa
June 06, 2013
201.229.67.63
Votes: +1
...

Un reconocimento completamente na su lugar! Tremendo persona, baluarte di Noord, sin duda!
Pabien, Eddy!

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter