Friday, 24 October 2014
Hopi interes y participacion local Veronica Molina a convence publico tocante e programa “Guia di Alimentacion” Print E-mail
Friday, 07 June 2013 18:32

IMG 3184

Durante e prome dia di e conferencia internacional PACO, cu ta tumando luga na Westin Resort, un di e oradornan cu a guia un di e tayernan a capta atencion di tur den sala, tabata di Veronika Molina, di Guatemala, cu ta “Specialista den Educacion Nutricional’ y cu ta consehero di FAO , Food and Agriculture Organization) tambe.

El a presenta varios tema di guia di alimentacion y a traha cu algun pais den Caribe y Latino America riba un guia di alimentacion pa comunidad. Veronika Molina a elabora riba un metodologia cu a crea pa facilita e guia di alimentacion y con esaki ta funciona directamente riba e poblacion. Meta ta pa uza e programa como instrumento pedagogico y den e accionnan di educacion di nutricion. E guia di alimentacion ta enfoca pa mehora e factornan cu ta interveni den e disponibilidad, acceso y consumo di e alimentonan cu e comunidad ta uza. “Nos mester conscientisa tocante kico ta e ultimo tendencia den alimentacion y ta importante pa sa kico e poblacion ta pensa tambe. Tin hopi factor pa tene cuenta cu ne. Actualmente nos ta desaroyando un tayer tocante esaki y tin hopi interes y participacion di Aruba pa haya sa con pa adapta e guia di alimentacion pa preveni obesidad infantil, ya cu esey ta netamente un problema cu tur pais ta pasando aden. E prome cos cu mester haci ta traha riba prevencion y tambe ta importante pa tur hende haya sa con pa alimenta corectamente, kico pa eligi y ki alimento mester evita y sin laga afo, e parti di actividad fisico, cu ta hunga un rol grandi tambe,” Veronika Molina a duna di conoce. Segun e presentacion di Veronika Molina, experiencia y investigacion ta indica, cu ta hopi importante pa bin cu e mensahenan pa yuda e poblacion siña scoge un alimentacion saludabel, poniendo mayor enfasis riba e enfermedadnan cronico, haci actividad fisico, bebe awa y teniendo un alimentacion varia y balansa. Esakinan mester sirbi como base pa forma e normanan y e reglanan pa crea e menu di e scolnan, pero tambe p’e industria di alimentacion. Na scol e muchanan mester siña tocante e guia di alimentacion y mester percura pa e menu cu ta ofrece e muchanan ta uno saludabel. Como ehempel Veronica Molina a tuma e pais Brasil, cu a incorpora e guia di alimentacion na scol, unda cu tin un norma tocante e cantidad di fruta cu un mucha mester come. Na Chile a haci henter un innovacion tocante regulacion di kico por of no por bende na e scolnan y na Merca ta prohibi e mashinnan di refresco na scolnan. “Mester percura cu e opcionnan cu e muchanan ta haya na scol, mester ta uno saludabel. En bes di brinda nan mangel of bolo, laga nan tin e opcion di appel of druif. Hopi mayor ta pensa cu miho nan yiu bebe juice cu refresco, pero e contenido di sucu den cualkier juice ta super halto. Aki ta resaltae hecho cu e mih bebida panos muchanan ta awa. Actividad fisico, siguridad riba caya mester ta primordial pa un comunidad por haci movecion. Ciclovia ta un evento masha uza na varios pais, unda cu ta duna e comunidad oportunidad pa haci movecion y actividad fisico. Mester percura pa drecha siguridad civil, p’asina comunidad por haci nan actividadnan fisico sintiendo nan protegi”. Finalmente Veronika Molina a indica cu no ta solamente educacion ta hunga un rol, pero e accion mester tin un enfoke integral y hunto mester haci e accion agresivo pa traha riba prevencion. Tin hopi trabou pa haci y un accion integral ta e unico manera pa educa e muchanan tocante alimento saludabel, p’asina haci e transmision di informacion modifica e custumbernan di alimentacion y adopta un estilo di bida saludabel..

Comentarionan (1)Add Comment
El Casique
June 08, 2013
201.229.117.226
Votes: +1
...

Stop di uza alcohol.Suco,salu,y vet den bo cuminda /come moderato >e tip aki ta gratis...

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter