Thursday, 23 October 2014
Regla pa mantencion di orden publico durante e paradanan di carnaval 2012 Print E-mail
Thursday, 10 January 2013 13:08
DSC_2063
Cuerpo Policial di Aruba t’ey pa mantencion di orden public o y pa garantisa seguridad di un y tur. Pa esaki Cuerpo Policial ta anuncia e reglanan pa mantencion di orden publico durante di e paradanan di carnaval. Tur polis lo tin e instruccion cu ta duna solamente UN (1) ADVERTENCIA.

Si no cumpli Cu e advertencia policial aki, bo persona por wordo deteni inmediatamente conforme articulo 190 di nos Codico Penal cu ta encera: “ Esun cu deliberadamente ( opzettelijk) no cumpli cu un ordo duna door di un empleado publico (ambtenaar) apunta pa ley ( pues polis) etc etc, y tambe esun cu deliberadamente ( opzettelijk) stroba, purba di preveni pa of stop e trabou di un empleado publico por wordo castiga cu un castigo di prizon (gevangenisstraf) di maximo tres luna of un boet di maximo 5000 florin”.

Lesa tambe articulo 35 di e Algemene Politieverordening: “esnan cu ta participa of ta presente na un parada of manifestacion riba caminda publico y ta wordo ordena door di polis den cuadro di orden publico pa bay for di e sitio, mester cumpli cu e ordo aki mesora y bay den e direccion cu polis ta indica”

Conforme articulo 191 di nos codico penal cu ta bisa: “ esun cu, durante un audiencia of na un lugar na unda un empleado publico ta cumpliendo cu su trabou, ta ocasiona turbulencia of despues cu e empleado publico apunta pa ley, duna e persona un ordo pa bay for di e lugar deliberademente no cumpli cu e ordo aki, por wordo castiga cu un castigo di prizon di dos siman maximo of een boet di 120 florin maximo.”

Conforme articulo 192 di nos codico penal: “ esun cu, na un aglomeracion (‘samenscholing’) di persona, deliberadamente no bay for di e luga, despues di e di tres advertencia di polis, ta wordo considera como culpable na participacion na un‘samenscholing’, y por wordo condena cu un castigo di prizon di tres luna maximo of maximo 600 florin”

Reglanan GENERAL:

  1. 1.Polis e aña aki lo eherse e reglanan di cero tolerancia estrictamente. Conforme cu articulo 147 di nos codico Penal no lo permiti pelea publico y tur persona cu ta participa na esaki lo wordo deteni inmediatamente.
  2. 2.Insulto (Belediging) di e miembronan di Cuerpo Policial lo no wordo tolera y e persona cu haci esaki lo wordo deteni inmediatamente si acaso e polis sinti su mes ofendi door di gesto of palabra.
  3. 3.Polis lo wordo instrui pa duna, conforme na ley e advertencianan (waarschuwing) corespondiente. E aña aki conforme locual cu a wordo treci padilanti, polis lo duna un waarschuwing. Un y tur ta wordo pidi pa por favor tene cuenta cu esaki y comporta nechi pa evita un mal momento. E momento cu un miembro di Cuerpo Policial tuma e decision cu un persona ta wordo deteni, ta pidi e persona aki pa no resisti e aresto pa asina evita mas momentonan fastioso. Tambe ta pidi e publico rond di e persona cu a wordo deteni pa keda calmo y no lanta contra polis, como cu polis lo tin su gruponan prepara pa cualkier situacion.

Reglanan ESPECIFICO:

  1. 1.Ceramento di caminda.

E momento cu Cuerpo Policial cera e camindanan pa e celebracion di carnaval conhuntamente cu DOW no ta permiti pa kita e baricadanan pa pasa ni auto ni ningun otro vehiculo di motor. Esun cu haci esaki lo por wordo deteni.

  1. 2.Baricadanan riba e ruta di carnaval.

-          Tur persona, no participante di e parada, mester keda patras di e baricadanan poni riba e ruta y no ta permiti ni pa

  1. a.Sinta riba e baricada;
  2. b.Para dilanti ni abou di e baricada ( mucha tampoco)
  3. c.Kita e baricada pone abou.
  4. 3.Na lugarnan na unda no tin baricada poni riba e ruta di parada di carnaval.

Akinan e regla lo ta conta cu na momento cu e parada cuminsa no ta permiti ningun hende mas para ni baila riba e caminda, y durante e pasamento di parada esaki absolutamente lo no bay wordo permiti. Akinan tambe lo conta e regla cu e polis lo adverti e persona concerni solamente un biaha, y si e persona aki no cumpli cu e regla of orden di polis aki e lo por wordo deteni inmediatamente. No ta permiti pa pone ningun obheto riba e caminda na unda e parada ta pasa.

  1. 4.Pasamento cu brommer y bicicleta riba e ruta di parada na momento cu baricadanan wordo poni y ruta wordo cera.

No ta permiti brommer of bicicleta riba e ruta di carnaval na momento cu e ruta wordo cera pa trafico. Ta pidi tur manehador di brommer/bicicleta pa yega prome cu e ruta wordo cera pa evita cu nan lo wordo manda bek y si nan no cumpli cu e reglanan di polis e chens por t’ey cu e brommer/bicicleta lo wordo kita.

  1. 5.Musica dilanti di trucks den parada.

No ta permiti pa tin speakernan dilanti di e trucknan cu ta core den cierto parada. E medida aki ta wordo tuma pa proteccion di e participantenan. Aña pasa un accidente a pasa cu a hera bira algo lamentable, pero danki na e accion rapido di un polis por a evita lo peor.

Ta pidi tur lider di grupo pa tene bon cuenta cu esaki. Si baila dilanti di e truck mester tin por lo menos un distancia di 5 meter entre e truck y e participante na tur momento.

  1. 6.Bailamento/sintamento ariba e dak di truck/trailer durante parada.

No ta permiti pa ningun hende para ariba of baila of sinta ariba e truck/trailernan cu ta core den parada. Esaki pa motibo cu tin wayanan di coriente cu ta sumamente peligroso. Esnan apunto door di e grupo pa lanta e wayanan di coriente mester notifica esaki na SAC na ora, y nan so lo wordo permiti ariba e dak di e trucknan/trailernan.

  1. 7.Control di chauffeur bou di influencia den parada.

Prome y durante di e parada lo laga tur chauffeur di truck y auto cu ta core den e parada supla pa controla nan riba alcohol. No ta permiti ningun chauffeur bou di ningun circunstancia pa ta bou di influencia tras di stuur. Si e chauffeur no coopera cu e blaastest of e blaastest sali negatief e chauffeur lo wordo deteni y lo mester carga e consecuencianan.

  1. 8.Canamento door di e participantenan di carnaval door di gruponan y na banda durante e parada y na final di e parada.

No lo wordo permiti pa ningun persona, cu no ta participante, cana riba e ruta di carnaval; tampoco participante cu sea door cu nan a yega laat pa join nan grupo of a yega final caba pa bolbe bek cana na banda y bay jump den otro gruponan. E participantenan aki lo wordo manda tras di baricada y si nan sigui cu nan actuacion lo wordo deteni. Lesa articulo 35 di e Algemene Politieverordening cual ta bisa textualmente:

“ esnan cu ta participa of ta presente na un parada of manifestacion riba caminda publico y ta wordo ordena door di polis den cuadro di orden publico pa bay for di e sitio, mester cumpli cu e ordo aki mesora y bay den e direccion cu polis ta indica”

Tur participante ta wordo pidi encaresidamente pa yega na ora of pa drenta den nan grupo for di pafor y no canando riba e ruta pa yega na nan grupo.

  1. 9.Comportacion di miembronan di prensa/sacamento di potret door di publico

E aña aki lo no permiti ningun miembro di prensa pa stroba e fluho di carnaval door cu den e ruta ta entrevista, corona participante of saca potret/filma. Esaki a wordo discuti durante un reunion apart cu e medionan di comunicacion. Tampoco lo permiti personanan individual para ariba caminda pa saca potret durante parada, tampoco strobando of obstaculisando e parada. E persona aki lo wordo adverti un biaha y e por wordo deteni si acaso e no sigi orden di polis of sigi saca potret.

  1. 10.Actonan immoral.

No lo permiti, conforme cu nos leynan vigente ningun actonan immoral riba caminda publico, ni riba e ruta, ni pafor. Ta pidi publico y participante encaresidamente pa comporta decentemente, y no laga alcohol domina bo comportacion. Articulonan cu lo wordo aplica ta entre otro articulo 244 y 245 di nos codico penal. Tambe lesa articulo 49 y 50 di nos Algemene Politieverordening.

  1. 11.Seguridad den/rond di trailernan.

Nos ta descurasha tur hende pa bay cu tankinan di gas of carbon pa hasi BBQ. Candela ta e peliger di mas grandi pa seguridad y bida di hende na un ocasion asina unda tin aglomeracion grandi di hende. Tankinan di gas por causa explosion y BBQ pits lo por causa candela of hopi sushi y molester di huma. Zorg pa semper bo tin un fire extinguisher mediano of grandi (yen) na man pa cualkier emergencia. Zorg pa tin EHBO kit y vooral ijs tambe na man. Si tin cuchiu pa traha cu cuminda, zorg pa e ta bon warda cu un hende intoxica of rabia no por tira man p’e di biaha. Tene esakinan leu di mucha. Tira bon bista riba e muchanan of laga esnan mas chikito na cas cu supervision apropia. No hiba alcohol den botter, sirbi esakinan den cups of bleke pa evita peliger di cortamento of cu nan ta wordo usa como arma.

Por ultimo:

Cuerpo Policial di Aruba t’ey pa mantencion di orden publico y garantisa seguridad di un y tur: participante, publico, miembronan di SAC, voluntarionan etc. Nos no t’ey pa daña ningun ambiente ni stroba e carnaval. Ta nos mas sincero deseo cu tur e actividadnan di carnaval bay den bon ambiente pa un y tur. E apelacion ta bay na tur hende pa no abusa di alcohol, no bebe si bo tin cu stuur despues y comporta manera un pueblo civilisa. Un yamada special ta bay na tur persona cu a bin establese na Aruba pa respeta e reglanan y ordonan di polis. E reglanan ta conta pa nan tambe.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter