Thursday, 23 October 2014
Cero Tolerancia y Faya bo Haya Print E-mail
Thursday, 31 January 2013 15:34
DSC_2063
Ministerio Publico y Cuerpo Policial di Aruba (KPA) ta informa cu Polis lo listra preventivamente durante tur evento di Carnaval na San Nicolas y Oranjestad. KPA lo actua strictamente durante e ultimo dos weekendnan aki pa garantiza seguridad riba caya. Manera a bira custumber tur Carnaval, Ministerio Publico ta sostene Zero Tolerancia di KPA cu su maneho Faya bo Haya.

Den cuadro di e accion di listramento preventivo KPA ta autoriza pa para hende na manera arbitrario riba caya y listra nan pa arma na nan paña. KPA ta tambe autoriza pa listra autonan y otro vehiculonan pa arma. Ademas KPA ta autoriza pa pidi pa habri cahanan, tasnan y otro pakinan pa listra pa arma. Ministerio Publico a autoriza KPA pa por haci esaki y na su turno, Ministerio Publico a pidi e autorizacion aki na Huez Comisario.

Husticia lo actua severamente contra personanan cu wordo haya cu arma di candela. Pa posesion ilegal di arma un hende por wordo condena pa un castigo di prison di un aña of mas.

Mescos cu den añanan anterior, Ministerio Publico y KPA lo usa e maneho Zero Tolerancia y Faya bo Haya pa trata cu hende cu ta comporta nan mes malo den Carnaval. Tur dos a resulta te awor hopi efectivo durante temporada di Carnaval.

E maneho Faya bo Haya ta encera cu Ministerio Publico ta duna personanan cu wordo deteni relaciona cu delitonan relativamente simpel y infraccionnan (manera actonan di violencia leve, destruccionnan, buracheria y otro comportacion intolerable), un boet ey mes na Warda di Polis. Si e persona dicidi pa paga mes ora, anto Ministerio Publico ta cla cu ne. Si e persone dicidi cu e no ta paga, anto e lo wordo sirbi inmediatamente cu un citacion pa presenta dilanti Huez. E exigencia pa castigo durante e tratamiento dilanti Huez ta cay den regla mas halto cu e boet cu wordo ofreci na Warda di Polis, asina ta cu ta cumbini hende pa paga na Warda di Polis mes. Pa facilita e pagonan tin mashin di swipe disponible na Warda.

Ministerio Publico ta haci un apelacion urgente riba publico pa paga tino y usa alcohol concientemente. Bebe cu moderacion y gosa di Aruba su Carnaval 59.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter