Diabierna anochi a sosode un accidente cu herido riba e cruzada di Avenida Juan Pablo Dos cu Dadelstraat. Apesar di e daño material tabatin solamente dos herido leve di cual un di nan ta un dama polis na civil den su Swift. E chauffeur di e Yaris, studiante di Universidad di Medicina a nenga asistencia medico. Debi impacto e Swift a bay dal den cura di cas. Materialenwagen di Bombero tabata cerca a pone luz pa ilumina e sucedido. Ambulance a transporte e herido den e Swift pa Hospital.

Polis y Ambulance a bay diabierna atardi pa Macubaristraat ora bisiñanan a yama pidi auxulio pa un choller cu a agredi un hoben dilanti su mesun cas. E hoben lo a baha for di bus cana bay cas ora a dal den un choller cu tabata bendiga pa placa. E hoben a bisa e choller cu no tin cent pa dun'e pero e adicto no kier a tende a bira agresivo. Despues di a dal e hoben cu un biga na su schouder, e choller a baha na awa.

Den oranan di diahuebs atardi lat un grupo di 4 pa 6 hoben conoci pa Polis pa ta involucra den gang a drenta cas na Palm Beach cuminsa bringa cu habitantenan. Sla tras di sla a cay, bisiñanan a scucha e boroto yama Polis bin mesora prome e situacion bira mas serio. Den algun minuut un batayon di Polis a yega cera e cayanan di Palm Beach te na Caya Cocolishi.

Un ciclista a keda herida na Savaneta diahuebs atardi. E tabata bahando for di San Nicolas y un auto bayendo direccion pariba a lora su dilanti. E no por a evita e accidente. E chauffeur di e auto no a mira e ciclista. Ambulance y polis a yega mesora na e sitio. El a ser atendi. E tabata na tino. E atleta aki ta core hopi na pia y tambe riba su bicicleta y competi tambe. Polis a bai cu su bicicleta despues di investigacion.

Tur cos ta mustra cu ta un vehiculo halto lo a pasa y medio ranca parti di un mata den Caya Milio Croes na Dakota. Polisnan tambe a wordo notifica pasobra e tabata colga di tal forma cu e tabata un peliger pa trafico. A busca manera di comunica cu instancianan concerni pa atende cu e mata prome cu autonan por a dal den otro pa motibo di e peliger cu e tabata causa.

Presencia di polis a wordo pidi basta pura den e area di e cas di partido AVP na Ayo. Aki lo tin un pelea basta pisa andando. Na yegada di polis a topa cu algun homber poco bebi. Nan no ta bende alcohol parce e momento ey na e cas di partido. Mas bien e personanan aki tabata tin nan mesun drinks cu nan y tabata laba man despues di entiero.

Trio ta ataca homber pa placa

TANKI LEENDERT—Presencia di polis a wordo pidi diaranson 3.17 di madruga, na un cas na Tanki Leendert, naunda un homber ta bisa cu el a wordo, ataca pa tres homber. Segun e ta declara cu e hombernan ta Ruben, Dodo y Chino. E ta sigui bisa cu nan tabatin un machete y e ta sospecha tambe cu nan tabatin un arma di candela. Segun su declaracion, nan a kibra su porta di cas y tambe un carson. Polis a bise pa e bay Recherche pa duna keho.