| Parlamentario Arondino Croes: Gobierno ta broma cu 600 compania a registra pero no ta bisa cuanto a cera |
 |
 |
| Friday, 15 June 2012 16:55 |
 Aruba ta enfrentando hopi problema riba diferente tereno. Un di esun mas preocupante ta nos economia cu ta mal stanca den su desaroyo. Si economia no ta draai negoshinan ta bai malo y na su turno gobierno no ta hanja su entradanan pa cumpli cu necesidadnan di e pueblo, sin papia mes di e consequencianan pa e clase trahador.
Gobierno di AVP den un intento pa impresiona e pueblo a publica un registracion di 600 compania nobo na camara di comercio. Aki según parlamentario Arondino Croes pueblo mester ta bon alerta pasobra e gobierno ta purba di pinta e economia bunita mientras esaki no ta e caso. Gobierno no ta duna e pueblo full e informacion. Falta porehemplo e informacion di cuanto compania a cera nan porta y ta duna solamente cuanto compania nobo a inscribi den registro di camara di comercio (KVK). Di acuerdo cu Arondino Croes di fraccion di MEP durante e ultimo 3 anjanan hopi negoshi a cera porta. Si haci un comparacion cuanto compania a cera y cuanto a habri e ora pueblo lo haya e realidad. Arondino Croes ta di pensamento cu mas compania a cera nan porta durante e ultimo anjanan cu tin negoshinan cu a habri. E miembro di Parlamento a indica cu e ta bay manda preguntanan pa e Minister concerni relaciona cu e situacion. A menciona cu na 2010 un total di 480 compania a registra. Na 2011 e minister a menciona cu tin registracion di compania cu 660 compania nobo. Arondino ta kere cu ora cu bisa tin companianan nobo mester menciona cuanto compania no ta activo mas na KVK. Tambe mester menciona cuanto compania no ta activo mas na departamento economico y na SIAD. Ora di papia di crecemento cuantitativo teoretico, mester refleha tambe un crecemento cualitativo practico. No ta paso den KVK a registra 450 compania esey kiermen nan ta activo. Esey no necesariamente kiermen nan ta funciona. Tampoco e ta garantia pa trabao. Si djis cana den caya grandi wak cuanto compania a cera y cuanto compania a manda trahado cas e ta diferente. Den registro di departamento di labor ta mira un cantidad grandi di personanan ta busca trabao.Algo cu tambe MEP a bin tuma nota di dje ta e hecho cu hopi hende ta riba onderstand. Esaki ta nifica cu tin menos hende na trabao. E informacionan aki ta contradictorio cu loque gobierno ta trece dilanti. Ora papia di crecemento teoretico di companianan registra mester papia di e parti practico kiko e registracion a produci. Registracion di compania no kier men nada. Por registra 1000 compania pero 2000 compania por cera. Gobierno mester mustra cuanto compania ta funciona real y nan contribucion real na e economia. Cuanto compania ta activo realmente y cuanto ta solamente registra na camara di comercio. Según parlamentario Arondino Croes gobierno di AVP mester stop di broma y cuminsa traha serio riba nos economia.
|
Mustra/Kita e formulario di comentario
