|
Secretario di Estado Ben Knapen impresiona cu rol di Aruba como intermediador |
 |
 |
|
Thursday, 21 June 2012 14:09 |
|
Durante e reunionnan di Conferencia Rio +20, Prome Minister di Aruba mr. Mike Eman a haya e chens di reuni cu Secretario di Estado Ben Knapen, cual pa Aruba tabata masha importante ya cu e ta forma un parti importante di e delegacion di Reino. Ademas di hecho cu Knapen a caba di yega for di Colombia unda cu el a tende hopi riba e aporte cu Aruba por duna den un conexion comercial entre Colombia y Hulanda v.v.;
Aya na Colombia el a tende hopi di e rol cu Aruba por hunga como pais intermediador, un pais caminda ehempelnan di tecnologia y conocemento Hulandes por wordo etala pa habri porta pa Hulanda den mercadonan Sur Americano. Esaki na mesun momento ta pone Aruba den un otro luz na Hulanda, ya cu hopi biaha, lamentablemente, e islanan ta wordo mira door di e parti Europeo di Reino como islanan di polemica, discusion y negativismo. Pero, Prome Minister Eman a bisa, Gobierno durante e ultimo tres añanan a logra cambia hopi e desconfiansa y a crea un diferencia den tono. Pero tambe Aruba a tuma pasonan cu ta duna un balor agrega di Aruba pa e propio Hulanda, den tur e pasonan cu ta tuma. “Tur esaki ta cay den bon tera y e interes di parti di Secretario di Estado Knapen pa e rol aki cu Aruba por hunga, di ta e gateway y vitrina pa hopi producto y servicionan cu Hulanda por ofrece pa Sur America ta algo cu ta wordo ricibi den forma hopi positivo na Hulanda.” Tur esaki, e mandatario a agrega, ta crea e ambiente positivo cu Gobierno di Aruba kier pa wordo sinti den Reino Hulandes. E nificacion cu cada un parti den Reino por tin pa otro lo ta un di e temanan cu lo bay wordo discuti durante e Simposio di Reino cu ta bay tuma luga dialuna awor den Europe House riba Sasaki. Oradornan den e Simposio ta Tjeenk Willink, ex Vice Presidente di Raad van State; Peter Hartman, Presidente di KLM riba e balor di Aruba como un hub pa e aerolinea; Profesor Hirsch Ballin, ex Minister di Relacionnan di Reino; sra. Marion van Kapijnen, Embahador di Reino na Colombia; Jaime Saleh, ex Gobernador y ex Presidente di Hof y conocedor grandi di Reino.
 |
Mustra/Kita e formulario di comentario
