Encuesta di Forza Laboral na Aruba ta mustra cu desempleo na Aruba pa aña 2011 a baha te na 8.9 %

Thursday, 21 June 2012 15:49

Diabuebs mainta durante rueda di prensa yama pa Minister di Turismo, Transporte y Labor, Otmar Oduber, e mandatario a mustra riba cifranan positivo ricibi for di e encuesta haci dor di Departamento di Labor y Investigacion (DAO) conhuntamente cu Oficina Central di Estadistica (CBS).

Den pasado encuestanan manera esaki a wordo haci dor di CBS, e ultimo a wordo haci na aña 2007, cual resultadonan a sali na aña 2008, y na aña 2010 a tuma lugar e Censo.

Banco Central tambe ta un fuente cu ta duna resultado pa loke ta trata desempleo na Aruba, y ta usa e mesun metodologia cu CBS, cual ta sigui e criterianan di ILO, cu ta mustra cifranan reciente di desempleo na diferente paisnan.

Pa aña 2009 ultimo cifranan revisa di Banco Central ta mustra cu tabatin un porcentahe di desempleo di 12.3%. Minister a indica akinan cu e aña aki tabata uno caminda tabatin diferente desaroyo negativo cu e ciere di refeneria, y tambe e crisis financiero internacional cu tabatin efectonan negativo riba turismo.

Na october di aña 2010, Censo a declara un cifra di 10.6% di desempleo na Aruba, cual cambio a bin dor di e reapertura di e refineria y e crecemento den e sector turistico.

Pa loke ta trata aña 2011 e encuesta riba desempleo na Aruba cu a wordo haci dor di Departamento di Labor, ta mustra e cifra remarcabel di 8.9%. Den e forma aki por mira cu den dos aña cifranan a baha for di 12.3% te na 8.9%.

For di aña 1991 pa aña 2000 por mira un trend sumamente positivo, por mira un crecemento leve pa loke ta trata desempleo na Aruba, y for di aña 2000 pa 2009 por a mira un trend hopi mas agresivo, indicando cu desde aña 2009 pa 2011 constantemente a logra rebaha e cantidad di desempleo na Aruba.

Cifranan di Censo ta mustra cu e total di hende homber desemplea pa aña 2011 a baha cu 500 persona, cual ta un porcentahe di 18.4% y cu e total di hende muher desemplea a baha cu 321 persona cual ta 11.9%.

Factornan cu a hunga un rol grandi ta e reapertura di e refineria como tambe e crecemento di entrada di turismo cu a subi cu casi 10% pa aña 2011.

Minister Oduber a extende palabranan di felicitacion na tur e empleadonan di DAO como tambe CBS pa e tremendo trabou cu nan a haci cu e encuesta aki, cual ta sumamente importante pa e maneho y control di labor na nos pais.