Despues di Oranjestad, districto di Noord/Tanki Leendert ta esun cu mas habitante tin na Aruba y e ta un di e districtonan cu tin e populacion mas grandi di hobennan. E gobierno actual a dicidi pa haci e projecto aki bira un realidad dor di cuminsa cu e ehecucion den un futuro cercano. Parlamento y Gobierno di Aruba ta enfoca pa Aruba bira un modelo mundialmente riba tereno di Green Energy. Esaki ta un oportunidad unda nos por demostra cu Aruba ta walk-the-talk. Nos tin oficina di TNO na Aruba y nos tin masha hopi contacto cu profesionalnan cu ta experto den ramo di Green Technology. E compleho di scol aki mester bira un modelo pa Green School. “Mi ta di opinion cu nos por traha e scol aki completamente self-supporting tecnicamente. E ta un oportunidad y nos no mester perde”, Rasmijn ta bisa. Por ehempel, turbina di biento y panel solar mester ta e generadornan di coriente pa e scol aki. E airconditionersnan y tur otro aparatonan electronico mester ta tiponan cu ta spaar hopi coriente manera por ehempel inverters. Por hasta inclui un systema di airconditioning cu ta traha riba ‘warmte pomp’. E bouwvoorschriftennan di DOW mester wordo adapta pa asina e scol por wordo traha cu materialnan duradero, materialnan cu no tin impacto negativo pa salud y medio ambiente, y cu insulacion adecuado pa conserva energia. Awa cu ta wordo utilisa na e scol mester wordo re-utilisa pa por muha mata cu ne. Por ehempel, awa di labamano, awa cu ta wordo produci den systema di airconditioner y awa di yobida mester wordo colecta den un pos cu lo wordo usa pa muha mata na e scol y pa flush e WC nan.

Matanan agricola tambe por wordo planta pa stimula e muchanan riba e tereno aki. Enbes di usa buki cu ta costa hopi placa y cada aña nan prijs lo sigui subi, ta mihor pa muchanan usa un lap-top unda cu tur buki mester ta accesible via e-books. Otro ventaha di usa e-books ta cu e muchanan no mester carga un tas grandi y pisa pa bin scol cu ne. Naturalmente muchanan cu kier usa buki por sigui usa buki. E scol mester bin ekipa cu un systema di seguridad cu ta facilita e trabou di security y unda cu maestronan semper por log-in den e systema no matter unda nan por ta pa asina tur hende contribui na e seguridad di e scol. Educacion riba tereno di medio ambiente y self-sustainability tambe mester ta inclui den e curiculum. Asina nos por keda menciona diferente accesorionan cu ta cuadra cu un Green School pa haci e scol un modelo mundialmente. “TNO hunto cu expertonan local y internacional, mester por diseña y traha e scol aki pa ta un modelo riba tereno di entre otro energia alternativo y eficiencia den energia, pa nos demostra cu Aruba kier ta e modelo mundialmente reconoci locual cu ta encera un Green School”, Rasmijn ta termina. Pa mas informacion riba Green Schools por bishita www.greenschools.net

Comentarionan (0)

Mustra/Kita comentarionan

Duna Comentario y/of Comparti riba Social Medi

Mustra/Kita e formulario di comentario

Nomber

Email

Comentario

smaller | bigger

Subscribe via email (registered users only)

I have read and agree to the Terms of Usage.

Duna Comentario y/of Comparti riba Social Medi