| Minister Arthur Dowers: "Integrale jeugdbeleid", pa un desaroyo bon y sano di nos hobennan y comunidad |
 |
 |
| Thursday, 21 June 2012 16:53 |
 Durante un presentacion tocante "integrale jeugdbeleid" den aula di EPI diahuebs mainta, Minister di Husticia y Enseñansa, mr. drs. Arthur Dowers y su homologonan, Minister Michelle Hooyboer-Winklaar y Minister Richard Visser a demostra cu nan ta para ariba un linea.
E cuater ministerionan, esta husticia, enseñansa, asuntonan social y salubridad publico, ta comprometi na cumpli cu e muchanan y hobennan di Aruba y ofrece nan proteccion y tuma decisionnan den nan miho interes cu lo conduci na un desaroyo positivo, Minister Dowers a expresa. "Integrale jeugdbeleid" ta un tema cu tin e interes di Minister Dowers for di hopi aña y e tabata un di e personanan envolvi caba ora cu mas di 20 aña pasa e discusionnan ariba e topico aki a cuminsa. El a splica cu di e tempo ey te cu recientemente tabatin kisas demasiado discusion tocante autoridad di e diferente instancianan envolvi y porfin awo tin tres minister cu ta trahando hunto ariba e tereno aki y enbez di autoridad ta papiando di trahamento hunto y pa mantene semper e hoben y su interesnan central den tur proceso. Tur ministerio ta wak e situacion di hubentud y maneho di hubentud di un otro perspectiva, por ehempel husticia ta keda confronta cu situacionnan hopi biaha mas dramatico y casonan cu a bay den un extremo hopi malo. Di otro banda enseñansa ta wak hopi casonan di exito, di hobennan cu kisas no tabatin tanto oportunidad, pero toch ta caba nan scol y hasta ta bay studia den exterior. E ta e responsabilidad di esnan cu ta traha cu hobennan pa percura pa nan desaroyo y "pa nos pone balansa den desaroyo di e hobennan y preveni pa yega na extremonan malo. E ta un reto grandi," Minister Dowers a enfatisa, añadiendo cu semper mester tene e interes general di hubentud na prome luga. E ministernan a dicidi cu hunto cu esnan cu ta traha den "veld" mester percura pa hiba un maneho integral. Plannan di maneho mester ta alinea cu otro den e mesun direccion, integrando procesonan y accionnan. Minister Dowers a duna como ehempel cu ora tin aresto na un cas unda tin mucha ta biba, voogdijraad mester ta envolvi pa yuda protehe e muchanan pa nan no keda den un situacion dificil of unda nan ta core risico innecesario. Hunto nos mester preveni cu nos hobennan ta haya nan mes den situacionnan complica, mester proteha nan pa nan no bira victimanan di e sistema, pa nan por desaroya sano y bon, Minister Arthur Dowers a bisa.
Comentarionan (2)Mustra/Kita comentarionan ...
Campanja a cuminsa mi Shon nan. Tin un integrale jeugdbeleidsplan cu jama: Bo Futuro. E plan aki a worde traha pa profesional den veld cu sa di kiko nan ta papia. Tur trahadort nan den veld a keda asombra di a tende e speechnan y e informacio. Un show total. BAy serca Drs. Marisol Lopez y puntre kiko ta kiko riba e tereno di integral jeugdbeleid. three stooges.
,
June 22, 2012
...
Bo mester cuminsa cu un jeugdbeleid pa e polisnan jong cu a drena cuerpo policial ultimamente. Nan ta riba un trip di powerplay y nan no sa con pa baha di e trip ey. Nan ta bati hende inocente mata, tira hende mata, aresta hende inocente y batinan. Bo tin un problema hopi grandi den KPA. Drecha esei prome pa nos por cuminsa respeta polis atrobe.
,
June 22, 2012
Duna Comentario y/of Comparti riba Social Medi |
Mustra/Kita e formulario di comentario
