|
Minister Michelle Hooyboer-Winklaar: Maneho integral di hubentud ta importante y un di e miho proyectonan cu nos por realisa como Gobierno |
 |
 |
|
Thursday, 21 June 2012 20:34 |
|
Diaranson mainta durante e “kick off meeting” di e grupo di trabao pa establece "Integrale jeugdbeleid" den auditorio di EPI, e tres ministernan envolvi den e proyecto y e proceso, esta Minister Michelle Hooyboer-Winklaar, Minister Arthur Dowers y Minister Richard Visser a confirma nan compromiso cu e establecimento di maneho integral pa hubentud.
Minister di Asuntonan Economico, Asuntonan Social y Cultura, sra. Michelle Hooyboer-Winklaar a comenta cu e falta di un maneho integral pa hubentud ta e unico fayo cu UNICEF a constata como un reto grandi pa Aruba. E analistanan di UNICEF cu a haci un investigacion profundo di tur servicio y organisacionnan cu ta traha na interes di muchanan y hubentud na Aruba. E mandatario ta conta cu esaki ta den cuadro di e aconticimento importante cu Aruba na 2011 a bira e di 36 pais den nos region pa bira miembro di UNICEF. E grupo di experto a conclui cu Aruba ta haciendo un trabao excelente den e diferente instancianan pa mucha y hoben, pero lo por cumpli casi por completo cu e tratado di derechonan di mucha si e servicionan tin mas cooperacion cu otro, pues ta traha mas integral, Minister Hooyboer-Winklaar a splica. Esaki ta e roadmap, nos no mester mas prueba ni motivacion pa realisa un "integrale juegdbeleid" lo mas pronto posibel, e minister a enfatisa. Minister Michelle Hooyboer-Winklaar a comenta cu e ta convenci y tin tur confiansa cu esaki por wordo realisa. "No tin ningun motibo pakico no por traha integral pa yega na e miho solucionnan pa nos hubentud y nos muchanan di Aruba," el a subraya. E titular di asuntonan social a expresa cu ta un placer pa wak tur hende tumando e mesun compromiso aki na serio. "Integrale jeugdbeleid" ta un di e miho proyectonan cu nos por realisa. E ta sumamente importante pa nos hubentud y nos pais," Minister Hooyboer-Winklaar a conclui bisando.
 |
Mustra/Kita e formulario di comentario
