Un fase nobo di e proyecto di renobacion centro di Oranjestad a inicia e siman aki cu instalacion di rails pa e streetcar. Den un conferencia di prensa diaranson mainta na cuminsamento di caya grandi a celebra inicio di instalacion di e infrastructura aki. Segun a wordo splica, e plan ta pa pone 80 meter di rails tur dia.

Prome Minister Mike Eman, kende tabata presente, ta sumamente contento cu inicio di otro fase di e grandioso proyecto renobacion di centro di ciudad, cu ta encera inversion di miyones di florin.

Prome Minister Eman a combersa cu diferente persona envolvi den e proyecto, incluso e trahadonan di MNO Vervat, encarga cu e proyecto y a mustra nan riba e importancia di e trabou aki y pa e por wordo finalisa na tempo.

“Awe sigur ta un otro etapa importante den renobacion di nos centro di ciudad, pero tambe e ta un etapa importante den duna e bista completo di e vision cu e gobernacion aki tin pa e desaroyo y un calidad di bida nobo pa Aruba,” tabata palabranan inspirativo cu Prome Minister Mike Eman a cuminsa su discurso. El a sigui splica e simbolo di instalacion di e railsnan. E ta mire como e conexion entre hende cu hende; e necesidad cu tin pa e comunidad bini hunto, pero tambe lidernan di un pais, cada tanto tempo, tuma e realidad di e pais, pone den perspectiva, haci analisis y yega na plannan pa revitalisa, renoba y tambe mehora e calidad di bida di su hendenan. E mandatario a sigui splica cu Gabinete Mike Eman a traha hopi duro pa yega te na e fase aki, esta e instalacion di railsnan, pero mester mire, na su opinion, como inicio di e renobacion grandi di pais Aruba.

E mandatario a ilustra otro proyectonan cu ta trahando riba nan den e renobacion di Aruba, manera por ehempel di Juwana Morto pa Madiki, di Dakota pa Santa Cruz y di Playa pa Oranjestad, pues tur caminda Aruba ta conociendo renobacion di scol, caminda, bario, facilidadnan recreativo y otro infrastructuranan. Hasta hospital ta bay mira un cambio grandi, cual plannan a keda presenta e siman aki riba su renobacion, expansion y modernisacion.

Tur e trabounan aki ta wordo haci cu dedicacion, e mandatario a bisa. “Cu curason den nos man y dedicacion pa transforma e pais aki, for di e estado deteriora y bandona den cual nos a haye, cu poco optimismo, pa un nacion cu tin speransa y optimismo atrobe .... ora nos a mira e decadencia, caya grandi, scol y barionan, nos a bisa cu Aruba no mester tin unicamente hotelnan di cinco strea, pero pueblo di Aruba merece di tin un centro di ciudad, scol, bario, casnan di anciano y hospital di cinco strea y awe nos ta añadiendo e streanan na cada un di esakinan pa un miho calidad di bida,” Eman a bisa.

E proyecto di renobacion di centro di ciudad ta wordo carga pa diferente persona y instancia cu e Prome Mandatario no por a keda sin gradici, manera su colega Minister Sevinger, DOW y InfraTeam. Na mesun momento el a recorda cu ora e proyecto pionero a wordo anuncia, hopi tabata e criticanan, manera ta tende tur dia, pero cambionan no ta bin sin un vision cu tin biaha ta transcende e capacidad di otronan pa mira e punto na unda e ta bay yega. “Pesey pueblo ta haci distincion entre esnan cu tin e necesidad y e dedicacion pa mira un poco mas leu, pa carga Aruba den un etapa nobo di progreso y pesey nos ta para aki awe cu dedicacion pa haci un trabou importante,” Eman a termina bisando.

Comentarionan (2)

Duna Comentario y/of Comparti riba Social Medi

Mustra/Kita e formulario di comentario

Nomber

Email

Comentario

smaller | bigger

Subscribe via email (registered users only)

I have read and agree to the Terms of Usage.

Duna Comentario y/of Comparti riba Social Medi