Minister Michelle Hooyboer-Winklaar: “World Of Feng Shui ta cumpli cu 3 punto importante di negoshi chikito”

Wednesday, 27 June 2012 18:59

Diamars tabatin e gran apertura di “World of Feng Shui” unda cu den un ambiente spectacular y yena di inspiracion di e mundo fascinante di Feng Shui, e invitadonan a reuni pa yama bon bini na un negoshi nobo y peculiar. Minister di Asuntonan Economico, Asuntonan Social y Cultura, tambe tabata entre e invitadonan y a sintie honra di por a hiba algun palabra durante e ceremonia oficial.

“Pa mi ta un gran honor pa por para kinan y hiba poco palabra tocante e evento special aki, un evento cu nos lo keda corda pa hopi tempo mes,” segun e mandatario. E ta hopi contento di por mira cu nos hendenan ta haciendo e decision di inicia negoshi, specialmente negoshi chikito, mirando cu aña pasa tabatin un tremendo conferencia di “Small Business Week”, unda cu a concentra riba varios aspecto importante pa e personanan cu tabata interesa pa inicia nan propio negoshi.

“Durante e Small Business Week, nos a enfoca y concentra hopi riba kico ta haci un negoshi chikito exitoso, kico tur ta haci bo negoshi diferente, ya cu tin negoshi cu si ta logra bira exitoso y otro no, p’esey tabata importante pa haci e cosnan cu ta sigura bo exito. Papiando di esaki, e prome cos cu ta bin na remarca ta, pasion. Esey ta netamente loke Milly tin pa su negoshi, ya cu esaki no ta solamente comercial, sino un pasion cu Milly ta dedica completamente na dje. E clave di exito ta, con bo ta diferencia di otro. World of Feng Shui ta innovativo, e ta trece algo cu ta masha "niche" y cu sigur no ta existi na Aruba, pero tampoco den Caribe. Y finalmente, credibilidad y prome impresion, y Milly por ta sigur cu e impresion cu el a causa durante su apertura, ta uno fantastico.

Milly tabatin curashi y determinacion y no ta algo cu a sosode di un dia pa otro, ya cu el a tuma hopi aña pa prepara esaki”, e dignatario a expresa.Na Aruba un 25-30% di negoshi eenmanszaak ta di hende muhe, un porcentahe cu sigur ta hopi abou y cu nos tin cu mehora, pa demostra un variedad den mundo comercial y economia di isla. Minister Michelle Hooyboer-Winklaar a keda masha encanta cu e luga como tambe e teoria cu tin tras di Feng Shui y ta sigur cu na Aruba esaki lo tin un bon impacto, mirando tur e gran beneficionan cu Feng Shui ta brinda nos hendenan.