| Prome Minister Eman na Esso Heights: Nos ta trahando riba un miho calidad di bida den cada skina di Aruba |
 |
 |
| Wednesday, 12 September 2012 11:07 |
 Esso Heights tabatin oportunidad algun dia atras pa comparti directamente y personalmente cu nos Prome Minister. E espacio aki, habri na cualkier ciudadano di e bario, ta practicamente un privilegio cu pueblo di Aruba tin.
Ningun otro Gobierno den e region, si no ta den henter mundo, ta mantene un contacto estrecho y directo cu su pueblo manera Gabinete Mike Eman a haci, por lo menos no den temporada cu no tin eleccion. Semanalmente Prome Minister Mike Eman ta bishita otro bisindario di Aruba, den tur districto pa asina combersa directamente cu su hendenan y tende kico ta biba y reina meymey di e comunidad. Di cas pa cas y di caya pa caya, e Mandatario a bishita for di Rooi Santo den Noord te Esso Heights na San Nicolas, incluyendo Primavera y Kadushi Largo. “E trabounan aki ta forma parti importante di e esfuersonan cu ta wordo haci pa e ciudadano sinti cu Gobierno no a lubida nan. Gobierno sa cu nan t'ey, cu nan tin necesidad. Y esaki ta duna nan motivacion pa di nan parti tambe, participa den e programanan aki y mehora nan calidad di bida,” asina nos Prome Minister a splica. Hunto cu e mandatario tin presencia y cooperacion varios departamento manera Serlimar, GKMB, DOW, FCCA, entre varios otro. Un instancia cu ta forma parti integral di e bishita di Prome Minister y Accion BoBario ta Serlimar. Cuater ploeg a haci limpi den e bario eliminando sushi for di areanan publico y te hasta ta yuda saca sushi pisa for di algun cas di hende di edad avansa y/of cu handicap fisico cu di otro manera nunca lo por haci esaki. Tambe Servicio di Limpieza Aruba a pone un containernan grandi den bario pa tur cu kier deshaci di tur tipo di sushi for di nan cura. Adicional na e accion di bario den Esso Heights, recientemente e bario a conoce Proyecto Pinta BoBario. E ultimo aki ta un proyecto cu ta incentiva hobennan di e bario mes pa duna un man den verfmento di casnan di e bario. E proyecto ta tuma luga durante di periodo di vacacion y cada un di e hobennan cu participa ta haya un compensacion pa nan trabou. Banda di esaki, un otro meta tras di e proyecto ta pa e hobennan haya mas aprecio pa nan bario mirando cu nan mes a contribui na su mehoracion. Esaki ta un aspecto comunitario cu ta hopi importante den desaroyo di hobennan en general. Na final di e proyecto por a mira e hobennan masha orguyoso mes di nan trabou y e bisiñanan di bario hopi gradici. Diabierna ultimo, tabata asina leu cu Proyecto Pinta BoBario, un cooperacion entre FCCA y Gobierno di Aruba, a haci entrega di e certificadonan na e hobennan y nan a haya esaki for di man di Prome Minister Mike Eman. Awo e bario no solamente ta limpi, y e casnan ta bunita pinta; pero su ciudadanonan sa cu nan ta biba den un pais cu un Gobierno cu ta pendiente di nan y ta traha tur dia pa nan por tin un miho calidad di bida. Nan ta gosa di un bario caminda por sali di cura, convivi cu bisiña y disfruta di e bienestar di un aparato publico y instancianan gubernamental cu ta cumpli cu nan deber. “E servicio na nos ciudadanonan ta hayando e contenido cu nos kier pa e tin. Pa asina cada ciudadano, cada bario sinti cu hunto cu Gobierno, nos ta trahando riba un miho calidad di bida den cada skina di Aruba,” Prome Minister Eman a duna di conoce. Esey ta e vision di Gabinete Mike Eman; un vision no a keda den promesa, pero a cristalisa den e Accion BoBario. Fuera di duna esnan involucra e sinti di un deber y labor haci, adicionalmente ta aporta satisfaccion personal den e manera con pueblo ta demostra cu nan ta contento y gradici. “E forma con e bario ta reacciona ta duna nos tambe hopi estimulo pa sigui traha asina paso nan ta brasa bo, nan ta encurasha bo, nan ta duna bo entusiasmo pa sigui,” e mandatario a indica cu hopi animo.
|
Mustra/Kita e formulario di comentario
