| Parlamentario mr. Xiomara Ruiz-Maduro (MEP): Presidente di Parlamento ta malusa su poder pa aplica double standards |
 |
 |
| Sunday, 16 September 2012 15:18 |
|
E waarschuwing aki no tabata na su lugar y mi ta lamenta cu nos Presidente di Parlamento mester a yega na e nivel aki pa malusa su poder pa aplica e reglanan di e Reglamento di Ordo di Parlamento cu double standards. E ta bisto cu nos Presidente di Parlamento a malusa e waarschuwing aki como un medio pa silencia e voz di opocicion pa nos no sali na defensa di e Pueblo y di esnan den tribuna cu tabata wordo ataca personalmente pa nos Minister Otmar Oduber den Sala di Parlamento. Enves cu Sr Paul Croes a hala atencion di e mandatario, e a dicidi di purba na silencia mi persona cu un waarschuwing y a laga caminda habri pa Minister Otmar Oduber sigui ofende esnan den tribuna y de paso tambe haci chercha di tur e piscadornan na Aruba, insinuando cu ta pisca lo mi ta bendiendo den Sala di Parlamento. Den e mesun reunion, nos Presidente di Parlamento a permiti pa un miembro di Parlamento insulta y hasta invita un persona den tribuna pa bay bringa pafor, sin cu Sr. Croes a tuma ningun clase di medida di ordo, mustrando asina cu nos Presidente di Parlamento ta masha partidario den su manera di catergorisa ki ora ta trata di falta respet den Parlamento y na su persona como Presidente di Parlamento. Ta bin aserca cu na ciere di e aña Parlamentario, un parlamentario a bisa palabranan ofensivo publicamente den e microfoon den pleno reunion publico faltando respet na henter Parlamento y e Pueblo di Aruba, pero aki si nos Presidente di Parlamento no a duna ningun waarschuwing y no a saca e parlamentario aki for di Sala di Parlamento conforme e poder cu e Reglamento di Ordo ta dune. Nos Presidente di Parlamento a prefera di aplica double standards y laga nan sera e microfoon pa scapa su cara di mas berguensa, na lugar di a condena un acto inaceptabel asina cu un waarschuwing of expulsion for di Sala di Parlamento. Pesey mi ta lamenta cu Sr Croes a yega na e nivel asina abou di malusa su poder como Presidente di Parlamento pa aplica double standards y purba di crea e imprecion den Pueblo cu mi lo a comporta mi mes na un manera inaceptabel den Parlamento y lo a falta su persona respet como Presidente di Parlamento. E waarschuwing di Sr. Croes na mi persona mas bien ta muestra di double standards y e comportacion inaceptabel di un Presidente di Parlamento partidario. Comentarionan (2)Mustra/Kita comentarionan Duna Comentario y/of Comparti riba Social Medi |
Mustra/Kita e formulario di comentario
