Segun Premier Eman: A busca pa Aruba haya un ex Embahadora Hulandes na Aruba pa promove e isla como gateway comercial

Thursday, 20 September 2012 13:22

Prome Minister Eman a sali masha satisfecho for di e reunion cu Minister di Asuntonan Exterior Interno di Hulanda Uri Rosenthal, kende ta un persona cu semper a mira e vision di Aruba cu e isla por funciona den e region como un punto di entrada pa Hulanda y Europa den e mercadonan di Sur America.

Pero tambe for di e area aki pa Europa Aruba lo por hunga un rol importante di entre otro contacto entre e diferente mercadonan. “Eynan tin un potencial grandi, y el sostene tambe e tempo cu Aruba a bay Brussels pa haya un Europe House na Aruba. Awe nos a sigui papia riba e funcion di e gateway ey y di e cooperacion cu kier desaroya entre e Ministerio di Relacionnan Exterior cu Aruba pa duna mas contenido na e pensamento di e gateway y hub cu Aruba ta mira como un potencial grandi pa empresa y institutonan di Hulanda.” Prueba di esaki, e mandatario a bisa, ta instituto of organisacionnan cu a establece caba na Aruba manera TNO, Rietveld Academie, Schiphol, GasUnie cu ta bay haci trabou cu Aruba. E ta importante pa Hulanda pasobra cada esfuerso exitoso cu wordo haci na Aruba, segun Eman, den cualkier sector cu ta, cada un lo bay sirbi como un muestra di tecnologia y conocemento Hulandes cu ta wordo aplica cu exito na Aruba por bay establece nan mes tambe na SurAmerica. E paisnan por simplemente bini Aruba y mira con e conocemento Hulandes ta funciona cerca di nan cas.

Ta papia aki di diplomacia economico. El a sinti cu for di e pensamento politico di Rosenthal ta existi e plan pa saca Hulanda for di e crisis economico y nan ta mira mercadonan den Sur America como mercadonan hopi interesante pa Hulanda den cual Aruba lo por hunga un rol den esaki. E ta un tema, segun Premier Eman a declara, cu sr. Rosenthal ta sostene. “Nan ta aprecia e vision y e forma proactivo cu Aruba ta canando e caminda pa duna contenido na e vision aki, y cu nos a tende for di diferente Politico / Mandatario Hulandes e dianan aki,” Eman a duna di conoce. A palabra na final di e reunion cu lo prolonga e presencia di un ex Embahador di Hulanda na Aruba pa yuda riba e tema menciona y a pidi pa un persona mas pa yuda “trek” e concepto di e gateway. Ta trata di un persona cu un capacidad grandi di conocemento cu el a acumula durante e periodo cu el a traha como Embahadora pa Reino na Colombia. Ta haciendo un esfuerso grandi pa e bira e persona cu lo traha na Aruba pa duna contenido na e concepto di gateway. Otro aña lo tin e evento di Europe Meets America cu lo trece un trabou grandi caminda cu e funcionario aki lo por hunga un rol grandi.