Premier Eman a sigura cu cooperacion Controlaria General di Hulanda lo sigui

Friday, 21 September 2012 20:53

Prome Minister Eman durante su bishita na Hulanda no por a laga for di su agenda un encuentro cu Gerrit de Jong, miembro di Algemene Rekenkamer Hulanda, cual organisacion a yuda Aruba hopi pa pone su cuentanan anual na ordo. Durante e encuentro aki a expresa e aprecio di Aruba pa e ayudo cu a ricibi den e proceso pa percura corta e retraso cu tabatin di 60 aña den e forma cu e cuentanan anual di Aruba tabata wordo traha.

Nunca a caba cu e cuentanan aki pa nan por yega Parlamento pa aprobacion. Na momento di entrega e cuenta anual di aña 2011 na Parlamento, Premier Eman a expresa cu esey tabata prome biaha despues di 60 aña y diferente gobernacion, cu ta cumpli pa traha y presenta e cuenta anual. Di e manera aki Parlamento por verifica si e manera cu Gobierno ta uza e fondonan publico ta corecto, y si Gobierno a cumpli cu su propio presupuesto.”Pa nos por a logra haci tur e trabou aki di 60 aña, nos a pidi cooperacion Algemene Rekenkamer di Hulanda y sr. Gerrit de Jong tabata hopi instrumental den esaki.” E ta un tema cu, segun Premier Eman, cu el a yega di papia cu Gerrit de Jong cinco aña pasa caba. E tempo ey a pensa cu Gobierno probablemente tabatin e miedo pa entrega un cuenta anual so mientras cu e otronan no ta cla. Di otro banda pa Gabinete Mike Eman ta importante pa por caba cu tur e cuentanan anual atrasa, cumpliendo asina cu reglanan di Constitucion. “Lamentablemente den pasado e no por a keda cla. Nos a insisti hopi pa na 2012 trata e cuenta anual di 2011 y nos a percura tambe pa entregue manera Constitucion ta prescribi, na Parlamento. Y esey tabata e prome biaha den 60 aña cu ta cumpli cu e regla ey.” Premier Eman a bisa cu e cooperacion cu a ricibi di Rekenkamer di Hulanda pa esaki tabata enorme y pesey el a haya importante pa gradici de Jong personalmente. Awor cu e cuentanan anual ta na tempo, e ta haci e control riba Gobierno hopi mas intensivo y fuerte. No ta simplemente presupuesto mester ta entrega na Parlamento, pero un aña despues e cuenta anual mester ta entrega pa wordo controla. E ta haci e reto di gobernacion mas grandi, pero tambe bo ta obliga pa duna mas seriedad den e proceso di administracion y mas cumplimento di reglanan di bon gobernacion. “No tabata solamente e rescate social economico di Aruba tabata importante na momento cu pueblo a duna nos e mandato na 2009, pero pueblo kier a mira tambe cu e fundamentonan di un bon democracia di un funcionamento debido di gobernacion tambe bay wordo poni na e nivel cu e comunidad kier mira manera di paisnan serio,” Eman a duna di conoce. A keda palabra cu un funcionario di e instituto aki lo sigui coopera cu Aruba riba algun tema. Por ehempel awor ta repasando un ley, cu tin na Europa, cu ta benchmark con un presupuesto mester ta hinca den otro, kico ta porcentahe di debe total di bo pais, di e deficit, cu ta cosnan elemental y cu tin un acuerdo universal na mundo riba esaki, y ta wordo poni den ley pa paisnan mantene nan mes na dje. Premier Eman den e combersacion cu ARN a papia riba con e leynan aki ta yuda finalmente pa e administracion financiero ta bon maneha y cu e metanan di finanza publico wordo miho midi door di Parlamento cu ta controla gobernacion. Aruba lo por siña di Hulanda cu tin hopi experencia den esaki, pesey ARN lo por yuda den e sector aki pero tambe den e control cu mester tin despues.