Tuesday, 21 October 2014
Minister Oduber ta percura pa salvaguardia derecho di tur trahador Print E-mail
Monday, 10 December 2012 19:01

Otmar Oduber017

Mirando e mundo moderno cu nos ta bibando aden, Minister di Labor Sr. Oduber ta diopinion cu mester concentra riba e prosperidad economico di nos pais. Y pa por logra esaki mester pensa riba e proteccion di e forsa laboral. Ta hopi importante pa tuma nota cu ya caba tin 3 cambio den ley laboral cu ta den preceso na Parlamento. Aki ta trata di e cambionan den ley di e Ordenansa Laboral, cu ta sali for di e punto di bista pa proteha mas trahador. Una bes cu e leynan aki wordo implementa na 2013, Minister Oduber ta indica, 80% di trahadornan lo haya proteccion di e ley aki. Otro aspecto importante cu ta tumando lugar ta den e cuadro di cambionan di ley den e Codigo Civil di Aruba, cu ta sali na vanguardia di e trahador. Di e forma aki ta crea mas posibilidad pa trabou y ta preveni problemanan di caracter social pa comunidad di Aruba. Igualmente Minister Oduber kier atende y regla leynan di e fenomeno di “uitzendkracht”. Esaki lo proteha e posicion huridico di e trahador temporal bou di e leynan di Ordenansa Laboral. Cu esaki e mandatario kier trece seguridad financierio den hogar di tur trahador. Pa por a yega asina leu di por trece cambionan den ley laboral, mester a cana un proceso basta largo, pero ya caba pa otro siman, dia 17 di december 2012 lo trata 3 di e 5 cambionan di ley laboral den Parlamento. E otro 2 leynan cu mester wordo trata tambe ta canando e proceso necesario pa tratamento den Parlamento mas pronto posibel. Aki ta trata di e Ley di Salario Minimo como tambe Ley di Aplicacion Administrativo di Leynan Laboral. Pa por pasa e leynan mester tuma na cuenta cu mester trece cambio den e 7 decretonan, cu ta bayendo Raad van Advies e siman aki. Tambe, Minister Oduber ta di opinion cu mester informa pueblo di e proceso y e significado di e cambionan aki pa e trahador y dunador di trabou. Pa e motibo ey ta haci uso di e oportunidad pa gradici tur esnan cu a sintonisa e programa informativo riba e Cambionan di Ley Laboral. Minister Otmar Oduber ta sumamente contento cu e bon comentarionan cu a wordo ricibi riba e programa aki. Hopi a haya e cu programanan asina ta trece claridad y alivio pa e trahador. Te hasta e dunador di trabou ta di opinion cu e cambionan aki lo trece motivacion y productividad di parti e trahador. Tambe a trata e tema di control y informacion encuanto e cambionan aki di parti di Departamento di Labor (DAO). Awe por informa cu DAO bou guia di Minister Oduber lo bay tin programa di infomacion pa publico como tambe trainingnan pa su trahadornan pa asina por haci e implementacion di e leynan aki sosode na un manera flexibel. Tambe DAO lo eherce control pa mira si e dunador di trabou ta cumpli cu e reglanan aki, creando seguridad den e forsa laboral. Minister Oduber a insisti pa trece cambionan positivo pa e trahador, pasobra manera e reglanan aki wordo re-enforsa e trahador tin tur beneficio y garantia di e proteccion cu e cambionan di ley laboral ta trece cu ne. Minister di Labor su motivacion principal pa a bin cu e cambionan aki ta pa por brinda seguridad finaciero, como tambe posibilidadnan pa tur trahador por tin un trabou fiho.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter