Friday, 01 August 2014
Aruba a atende caso, tratamento, testing y diagnosis di TBC conforme cu tur protocol internacional Print E-mail
Tuesday, 11 December 2012 12:13
DSC_2063
E departamento encarga cu malesanan contagioso, Dienst Besmettelijke Ziekten (DBZ), a atende e caso, tratamento, testing y diagnosis di tuberculosis (TBC) completamente conforme cu tur protocol internacional, Minister di Salubridad dr. Richard Visser ta subraya. Esaki a pasa for di e prome momento cu DBZ a wordo notifica cu a diagnostica un persona cu TBC na Aruba, e ta aña di.

Usualmente DBZ ta atende entre seis pa ocho caso di TBC pa aña. Esaki ta asina pa algun aña y pues e personal tin conocemento di e materia y ta experencia y altamente cualifica pa trata e pashent, como tambe testing y brinda guia na personanan preocupa.

Na diferente ocasion e mediconan specialista di pulmon a declara esaki tambe publicamente y a bisa cu nan tin pleno confiansa den e manera cu casonan di TBC ta wordo atende na Aruba. "Mi tin pleno confiansa den e team di DBZ," Minister Visser a bisa. El a agrega, "DBZ ta cumpliendo cu protocolnan pa atende cu cada caso di malesa infeccioso y nan ta eherciendo un bon trabao."

A surgi informacion eroneo tambe den diferente medio di comunicacion tocante e kitnan pa test pa TBC, PPD-Tuberculine y e "bentana di tempo" cu tin pa test otro hende cu a bin den contacto cu e persona diagnostica cu TBC.

Protocol ta indica cu tin entre seis pa ocho siman pa e testing wordo haci. Den e caso di e alumno di Colegio Arubano, e notificacion cu el a wordo diagnostica a drenta na DBZ ta dia 22 di november. Den e siman di dia 26 di november, pues ni un siman despues, ya tur e contactonan di mas cerca di e pashent a haci e test caba.

Pa loke ta trata e siguiente linea di contacto di e pashent, e testnan lo tuma luga durante e siman aki y tur resultado lo ta cla e siman aki tambe. Esaki ta pues e di dos siman despues cu DBZ a ricibi e notificacion.

E mayornan di e alumnonan di Colegio Arubano a atende un anochi di informacion ariba dia 3 di december y por a haci tur pregunta pa aclarea cualkier duda cu nan por tabatin. Specialista di pulmon, dr. Schwengle y representantenan di DBZ a duna un splicacion tocante e malesa y e test, como tambe a pidi mayornan permiso por escrito pa haci e test cerca e muchanan mas hoben cu 18 aña. E dia despues di e reunion e hobennan a haci e test y e resto di siman a test e otro contactonan di e pashent di pafo di e scol.

E testnan cu a wordo haci den e simannan cu a pasa ta wordo considera asina yama "base-line" y mester wordo ripiti 2 pa 3 luna despues pa confirma e resultado.

Tur proceso ta wordo sigui segun e protocol internacional.

A menciona diferente motibo pa cual e testnan no a tuma luga mas lihe, pero tur proceso a bay y lo sigui di acuerdo cu e protocolnan internacional.

Wordo bisa cu tabatin falta di test pa TBC na Aruba debi cu DBZ no por a paga pa e kitnan pa haci e test. Esaki no ta berdad y e hecho ta cu PAHO-Washington a cambia di distribuidor y esaki a ocasion un tardansa den e pedido cu Aruba a haci pa medio di Pan American Health Association. E problema aki a wordo atendi y resolvi di inmediato pa Departamento di Salud Publico di Aruba, cual a haya cooperacion di profesionalnan na Corsou, kende a manda e cantidad di kit cu tabata necesario pa e testnan inicial pa DBZ na Aruba. E yudansa aki ta wordo hopi aprecia.

Ademas, e bon relacion entre Departamento di Salud Publico di Aruba y dr. Horacio Oduber Hospitaal a haci cu Hospitaal a colabora pa medio di haci un pedida di emergencia, cual lo a yega Aruba durante fin di siman.

Minister dr. Richard Visser ta enfatisa cu tur proceso a bay y ta siguiendo di acuerdo cu protocolnan internacional y na Aruba tin bastante PPD-Tuberculine test disponibel na e momentonan aki.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter