Minister Oduber y ATA a duna Parlamento un presentacion amplio riba desaroyo di ATA y Aruba su turismo

Tuesday, 11 December 2012 20:01

Siman pasa Minister Otmar Oduber hunto cu ATA tabatin un reunion na Parlamento cu e Comision Fiho di Turismo y tambe cu miembro di Comision Fiho di Asuntonan Financiero, Juan David Yrausquin.E reunion a bay den hopi bon ambiente, caminda cu diferente tema di importancia pa loke ta trata Aruba su turismo y tambwe desaroyo di ATA a bin dilanti.

ATA a duna un presentacion amplio riba tur e logronan cu nan a obtene despues di e cambio di status legal. Algun ehempel cu por menciona ta entrega di presupuesto 2012/2013 na tempo y entrega di jaarrekening na tempo.

Otro logronan menciona ta e proceduranan administrativo organisacional nobo, un quick-scan financiero, sistemanan di raportahe mensual, regulacionnan pa gerencia y hunta di supervision, audit interno (den proceso), estudio di efectividad di mercadeo (den proceso).

No por laga sin menciona e finalizacion di varios raportahenan strategico, business plan 2011-2012, plan corporativo y budget 2012, e plan strategico pa Aruba su turismo pa e proximo 15 añanan como tambe e plan corporativo y budget 2013.

Oficina di Turismo a duna un presentacion amplio di e resultadonan te cu awor y obhetivonan pa 2012-2013.

Igualmente a duna informacion detaya riba presupuesto 2013 teniendo na consideracion tambe e preguntanan realiza dor di miembronan di Parlamento, specificamente preguntanan tocante cifranan cu a causa confusion recientemente a haya un splicacion amplio.

Ideanan y proyectonan cu ta den ehecusion tambe a haya atencion durante e reunion importante, proyectonan cu lo haci di Aruba uno mas atractivo y competitivo. Un ehempel di e proyectonan aki ta e lanzamento oficial di e website nobo di Aruba www.aruba.com cu lo tuma lugar na januari 2013. E imagen nobo di e website aki lo haci di dje uno mas interactivo, user friendly y mas atractivo pa e bishitantenan por keda riba dje mientras cu ta haya tur informacion desea pa loke ta trata nos isla.

Minister Oduber a mustra cu e ta hopi contento cu e resultadonan cu ATA a bin ta demostrando y den un tempo asina cortico, lo cual ta mustra cu e idea cu a reina pa mas di 25 aña, esta pa haci ATA un entidad independiente for di Gobierno, cual finalmente Minister Oduber mes a logra na 2011, ta dunando e resultadonan espera y ta hibando nos turismo den e direccion desea.