Saturday, 25 October 2014
Minister Timmermans ta sostene concepto gateway di Aruba y ta 'presta' Aruba un top diplomatico Print E-mail
Tuesday, 11 December 2012 20:31

Minister Timmermans

Den Haag/Oranjestad- E peticion di Prome Minister Mike Eman haci na gobierno Hulandes pa duna activamente sosten na e demas planificacion di e funcion di gateway di Aruba entre Europa y Latino America, a wordo honra. Durante e encuentro cu e tabatin diamars cu Minister Frans Timmermans di Asuntonan Exterior, el a priminti Prome Minister Eman cu e departamento ta ‘presta’ Aruba e top diplomatico sra. Marion Kappeyne van de Coppello pa yuda cu e planificacion aki.

No mucho tempo pasa ainda sra. Kappeyne tabata embahadora di Reino na Colombia y a sigui e desaroyonan di e ultimo añanan na Aruba hopi di cerca. "Mi ta sumamente contento cu nos ta haya refuerso di un hende di e caliber aki. Desde cu mi ta Prome Minister mi tabatin contacto a base regular cu Marion Kappeyne. Semper nos por a conta cu su cooperacion cu e ta duna cu masha entusiasmo den promove Aruba na Colombia. E conoce Aruba bon, e conoce Latino America bon y e ta comparti nos vision cu Aruba ta e gateway ideal entre Europa y e Americanan. Cu e ta bay haci su esfuerso pa Aruba, ta hopi bon noticia. E tin un netwerk internacional grandisimo cu ta na nos bentaha”, asina Eman a bisa despues di a reuni cu Minister Timmermans.

E compromiso pa pone e top diplomatico aki disponibel pa Aruba ta resultado di un protocol di cooperacion cu Aruba y Hulanda a firma na luna di october 2011 y cu tin como meta traha hunto riba e terenonan na unda por papia di un situacion win-win pa ambos pais. "Posiciona Aruba como hub ta bon pa nos economia local, pero Hulanda tambe por tin bentaha dor di haci uzo di nos como trampolin pa paisnan cu tin economianan fuerte creciente den Latino-America”, Eman a bisa. Sra. Kappeyne ta cuminsa traha mesora. "Otro aña na luna di mei Aruba ta e pais anfitrion pa e conferencia 'Europe meets the Americas'. Inversionista y empresarionan influyente for di Europa, di henter Merca (Norte, Central y Sur) ta topa otro na Oranjestad. E evento aki ta ofrece Aruba e oportunidad pa presenta su mes como e stepping stone ideal entre e continentenan aki. Marion Kappeyne lo ta di hopi cerca envolvi den e organisacion aki”. Minister Timmermans kende recientemente a keda encarga cu e puesto aki, a bisa den e combersacion cu Prome Minister Eman di ta entusiasma pa sigui amplia e cooperacion cu den e ultimo añanan a crece entre su ministerio y Aruba. Den e cuadro aki nan a papia tambe over di e asina yama EU-LAC-summit cu ta bay wordo teni den luna di januari na Santiago di Chile y na unda hefenan di estado y ministernan di Asuntonan Exterior di paisnan di Union Europeo ta topa otro pa papia riba e tema 'Working Together for Growth and Sustainability'. "Mi a pidi Minister Timmermans pa propaga e gateway concepto di Aruba eynan. El ta bay haci esaki sigur”. 

Comentarionan (1)Add Comment
Sabio
December 13, 2012
84.80.2.154
Votes: +1
...

Gateway sin bisa ken na Aruba lo beneficia di esaki. Esun cu lo beneficia sigur ta NV Eman Handels Maatschappij cu tin gran parti den ASTEC NV. Conflicto di interes total, pues un prome minister sinberguensa.smilies/angry.gif

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter