Concepto Gateway Aruba ta haya bon acogida cerca inversionista y empresario di Hulanda y Europa

Thursday, 13 December 2012 18:14

Dilanti un sala completamente yen cu inversionista y empresario di tanto Hulanda como otro paisnan Europeo Prome Minister Mike Eman a duna e señal pa start e asina yama 'kick off meeting' na Den Haag di e evento 'Europe meets the Americas' di cua Aruba na luna di mei otro aña ta e pais anfitrion. E encuentro cu tabata masha bon mes atendi tabata un bon oportunidad pa test den cua tera e concepto 'Gateway Aruba' ta cay cerca inversionista y empresario di Hulanda y otro parti di Europa.

E reaccionnan na final di e presentacion tabata di un entusiasmo sin igual y no a keda lugar pa duda cu e escogencia di gobierno di Aruba pa posiciona e isla como un hub di intercambio comercial entre Europa y Latino America ta zona manera musica den horea di e mundo empresarial. Pakico Aruba ta e marcado perfecto entre e continentenan a wordo aclarea di varios banda. Dor di Prome Minister Eman mes, pero tambe dor di otro oradornan manera José Maria Figueres, Presidente di Carbon War Room y ex president di Costa Rica, Marion Kappeyne van de Coppello, e diplomatico cu e siman aki a keda apunta como e 'gateway-gezant' kende tabata embahadora di Reino na Colombia pa hopi aña, director di TNO Mart van Bracht, investigadora Caroline Rodenburg di Ernst & Young y ex Minister di Asuntonan Economico y experto riba tereno di Union Europeo Laurens Jan Brinkhorst. Despues di palabranan di bon bini dor di Minister Plenipotenciario Edwin Abath Prome Minister Eman a ilustra den su introduccion e puntonan fuerte di Aruba, manera su posicion geografico bentahoso, su infrastructura di calidad halto cu un aeropuerto moderno, bon facilidadnan portuario y tambe di telecomunicacion, hendenan bon studia cu ta papia e idioma di e paisnan envolvi y cu ta conoci cu e cultura regional, un gobierno stabil y e siguridad hudicial cu Reino ta brinda. ,,E concepto gateway di Aruba ta ofrece oportunidadnan nobo, no solamente pa Aruba pero tambe pa e mundo empresarial di Hulanda y di otro partinan di Europa y Latino America. Pesey nos ta organisa na luna di mei otro aña e evento 'Europe meets the Americas' unda empresario y inversionista por topa cu otro di cua awe boso ta haya un ‘voorproefje’”, asina Eman a bisa su audiencia. José Maria Figueres a bin special for di Madrid pa splica dicon Carbon War Room ta mira den Aruba un ehempel pa mundo y pakico e isla ta e hub perfecto. ,,E economia di Latino America ta creciendo cu 6 a 7% a base anual. Pero Latino-America no ta un region homogeno. E diferencianan ta grandi. Den esaki e balor adicional di Aruba como gateway ta hinca. Trinta kilometro di largura y diez kilometro di hanchura cu tur loke bo mester pa cuminsa un negoshi y tur esaki na un distancia di 35 miya di distancia di un continente cu 500 miyon di consumidor. Si abo como empresario kier ta cerca di esaki y kier mantene e bentahanan di Europa, anto bo mester ta na Aruba. Pa bis’e den terminonan di mercadeo “Aruba is very bullish."