Tuesday, 21 October 2014
Booshi Wever (UPP): Aumento di criminalidad ta pone nos ciudadanonan sinti insigur, y ta pone nos turismo na peligro Print E-mail
Thursday, 13 December 2012 20:21

Booshi Wever015

Den e ultimo simannan partido Union Patriotico Progresista (UPP) a bin ta den preparacion di su programa di partido pa asina presenta esaki na nos comunidad. No obstante esaki, mirando e situacion alarmante di criminalidad, UPP ta kere ta necesario pa cuminsa presenta algun punto di atencion, cu e meta di por contribui na e discusion andando na e momento aki, y cu kizas lo por yuda na soluciona of suavisa e situacion cu Aruba ta aden.

Mescos cu estado di derecho ta algo importante pa nos partido, UPP ta kere tambe cu nos sistema hudicial ta mes importante. E ciudadano di nos pais mester tin garantia y sinti e confianza den nos sistema hudicial cu ta funciona na bienestar di su proteccion y seguridad. Den e cuadro aki UPP kier presenta algun di su ideanan riba e tereno di combatimento di criminalidad.
UPP ta di opinion cu e aumento di criminalidad di un banda ta wordo ocasiona pa e situacion socio-economico cu un gran parti di nos pueblo ta pasando aden.

Di otro banda causa di esaki tambe ta e politica liberal di admision, esta e politica di porta habri, mientras cu no tin ningun control na nos fronteranan.

Fuera di e dos causanan aki nos ta kere cu e falta di inversion den nos aparato hudicial y nos enseñanza al final tambe ta hiba nos pais na e situacionnan indesea aki.
Despues di mas di tres aña di e gobernacion actual, ainda e minister di Husticia, encarga cu proteccion y seguridad di nos pueblo, no por a presenta un plan con pa combati criminalidad, mientras cu durante di campaña electoral 2009 a cana broma cu tin un plan cla pa ehecuta for di day one den gobernacion.

Riba tereno di seguridad un maneho efectivo mester ta dirigi principalmente riba prevencion di criminalidad, pues mester por premira situacionnan pa evita lo peor.

Na di dos lugar mester pensa riba e combatimento di criminalidad riba su mes.
Pa hisa e seguridad riba nivel nacional, medidanan necesario mester wordo introduci pa proteha nos fronteranan, preveniendo y combatiendo ilegalidad.

Den su programa di partido, UPP a pone cu mester percura pa instala camaranan di surveillance den bario- y sitionan cu particularmente ta wordo afecta pa e anti-socialnan. Den nos zona turistico y comercial, mescos den esun di diberticion y recreacion, lo mester pone acerca postnan di vigilancia cu ta wordo opera den combinacion cu Polis, CEA y Warda nos Costa. E postnan aki mester wordo ekipa cu sistema di video y tambe un bon sistema di comunicacion pa ora di emergencia. Hunto cu esaki ta necesario, cu e apoyo di sector priva, pa mehora e proyecto di "visibility team". Ta pensa aki riba extra material, brommer etc., cu por sirbi como forma di patruyahe den cercanianan di e centronan turistico. Pa loke ta nos barionan, mester fomenta e sentido comunitario y respalda intencion di 'neighboorhood watch'.
Tambe lo mester introduci un seccion special entre e entidadnan cu tin di haber cu proteccion y seguridad, cu ta dedica na prevencion di crimen. Lo provee e seccion aki cu un centro di informacion na unda cu tur instancia- y ciudadanonan por haci advertencia adelanta di cierto situacionnan cu lo por bai for di man. Tambe e centro di informacion aki por sirbi pa tur esnan cu tin idea con pa combati criminalidad, trece esakinan dilanti. E seccion special aki lo mester bai wak kico ta alcanzabel (esaki ta e concepto di   “out of the box“). Pareu cu esaki, e seccion di prevencion di crimen aki lo mester bai scrutina tur e sitionan problematico, of cu por ta vulnerabel pa crimen (organisa). Asina mester pensa cu p.e. na e ultimo atraco den nos zona turistico dilanti nos hotelnan, banda di falta di seguridad, camara etc., e caya ta yena cu garoshinan cu ta bende souvenirs etc., cu ta stroba e visibilidad.

Mester mira si e sistema di vergunning den e caso aki ta funciona, y cu doñonan di mallnan mester siña biba cu menos entrada, na bienestar di seguridad y e bon nomber di Aruba, cu finalmente lo ta benificioso pa nan mes tambe.
Tambe UPP ta kere firmemente cu e castigonan mester wordo aumenta, saliendo for di e punto di bista tambe cu e crimennan aki ta afecta nos unico pilar economico cu nos tin na e momentonan aki.

E maneho riba admision mester bai bek na e situacion di antes, mientras cu nos fronteranan mester wordo controla mas intensivamente dor di polis, douane (pa arma) y tambe Kustwacht y Warda nos Costa. UPP ta kere cu Warda nos Costa mester wordo rehabilita bek y duná mas contenido manera cu e tabata tin bou di e gobernacion anterior, pa asina mehora nos seguridad.

Ta tempo pa henter nos comunidad realisa cu nos poblacion no por sigui crece na un manera ilimita pa medio di importacion di mas trahadornan. Crecemento ta trece cu ne scarcedad den nos cuerpo policial y otro instancianan, mientras expansion di e servicio aki ta nifica mas placa. Aruba mester cuminsa pensa cu su recursonan poco poco ta birando mas limita.
Apesar cu den un comunicado anterior nos pensamento ta cu Minister Dowers tin di tuma su retiro, nos ta kere cu esaki lo no sosode prome cu eleccion; e ora ey e palabra lo ta na pueblo pa wak si e minister y e partido actualmente na mando, ta keda of ta bai. Den e tempo cortico cu ta keda, hopi di e dañonan cu a wordo haci, no por wordo drecha mas.

Mirando e hecho cu e minister di Husticia actual a demonstra cu e ta incapaz y indispuesto pa hasi algo contra e ola di criminalidad cu ta azotando nos pais, e  minister di Husticia mester duna mandato completo na nos instancianan cu ta anda cu seguridad pa nan haci nan trabou manera mester ta.

Comentarionan (6)Add Comment
Mojendi
December 14, 2012
31.151.210.190
Votes: +0
...

Booshi tur loke bo tin cu haci ta, haci un copia (esta e programa) di bo otro partido (Geel) y bin cu ne, y ya bo ta cla.

guardian local
December 14, 2012
201.229.14.175
Votes: -3
...

Bon comentario Pueblo na Pecho. Tur hende por bisa kiko nan kier pero Booshi ta e UNICO politico cu a sali na defensa di e arubianonan contrario di e esnan cu ta anti-arubiano. Ami tambe ta pro pa e reintroduccion di modelo suizo.

Pueblo na Pecho
December 13, 2012
201.229.37.219
Votes: +3
...

Dog: stop di blaf. Bin cu cos concreto. Bin cu idea con pa combati criminalidad. Loke Booshi a menciona ta hopi bon pa nos tur.

R.R. Ras
December 13, 2012
201.229.45.78
Votes: +4
...

Na prome lugar ta e mentalidad di politico nan mester cambia y siña educa nos pueblo pa asina yuda combati criminalidad pasobra ta hunto nos tin cu haci esey. Esaki no ta fenomeno di Aruba sopero tur parti di mundo pero pa nos como communidad chikito e ta mas visible. Tip lijn nan tin cu traha y yuda pueblo haci uso di dje tambe. Pero para critica nunca a yuda ni nunca lo bay yuda na nada.

dog
December 13, 2012
201.229.31.58
Votes: +1
...

OTRO MAS .... si no ta BOOSHI ta BENNY y si no ta BENNY ta BOOSHI, por fabor, mihor cos boso haci ta baha cu PENSHOEN y laga hende drechi goberna e pida baranca aki.

user
December 13, 2012
201.229.91.212
Votes: +7
...

Pa prome MESTER cuminsa na saka tur stanhero cu no ta traha AFO .Cuminsa cu e grupo di hopi grandi di DOMINICANO NANCU TA BENDEDROGA.Pone POLIS UNDERCOVER AP-A DRENTA EGRUPO NAN EI.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter