Saturday, 20 September 2014
Gobierno: Oportunidadnan y un relacion mas beneficioso cu Union Europeo pa Aruba Print E-mail
Sunday, 16 December 2012 16:26

mike eu

Un audiencia hopi interesa a scucha Prome Minister Eman cu masha atencion ora el a duna su gastcollege pa cua el a wordo invita, na Erasmus Universiteit. Despues di un introduccion na unda Eman a haci comparacion di e crisis actual y e situacion na Merca tempo Lincoln tabata presidente, el a sigui splica cu Aruba ta confontando retonan similar ora nos wak pakico e isla kier sigui traha hunto cu Hulanda den Reino y cu Europa den Union Europeo. E cooperacion ey tambe mester ta basa riba bentaha pa e pueblo di Aruba.

Den e proceso pa identifica oportunidadnan Europeo pa pueblo di Aruba, na prome lugar mester sigura cu Aruba mes por scohe ki tipo di relacion e pueblo ta desea. Na 2003 Aruba tabatin un relacion di LGO cu Europa. Un relacion basa riba ayudo di desaroyo cu originalmente tabata diseña pa paisnan pober. E tempo ey UE tabata trahando un Constitucion nobo pa bin na lugar di e tratadonan. E constitucion no a crea espacio pa duna paisnan manera Aruba cu tin un relacion LGO pa upgrade esaki pa algo miho si un dia esaki ta deseabel. Hunto cu e gran estadista constitucional Arubano dr. Mito Croes, Eman a constata cu esaki no ta na beneficio di pueblo di Aruba. Eman y Croes a cuminsa un proceso largo pa convence Parlamento den Eerste y Tweede kamer, Gobierno di Hulanda y Comision Europeo cu mester cambia e concepto di e Constitucion pa crea un opcion cu paisnan LGO manera Aruba por upgrade nan relacion cu Europa. Finalmente e constitucion Europeo no a keda aproba, pero e esfuersonan bou liderazgo di Mike Eman na Aruba, Den Haag y na Brussel, pa crea e opcion di escohencia si a resulta victorioso. Den e tratado nobo di Europa (firma na Lissabon) cu a bin na lugar di e Constitucion, awe tin e siguiente derecho ancra den art. 355 inciso 6:

‘ The European Council may, on the initiative of the Member State concerned, adopt a decision amending the status, with regard to the Union, of a Danish, French or Netherlands country or territory referred to in paragraphs 1 and 2. The European Council shall act unanimously after consulting the Commission’

E derecho pa hasi uso di e opcion tabata un logro grandi y un paso importante pa obtene mas beneficio Europeo pa e Arubiano. Awor Aruba no ta condena mas pa keda LGO pa semper y por haya aceso na mas oportunidadnan Europeo na momento cu esaki bira deseabel y necesario.

Mas derecho Europeo pa e Arubiano: Acceso na Parlamento Europeo

Buscando mas oportunidadnan Europeo cu e Arubiano por haci uso di dje, Eman hunto cu colega Sevinger a yega te dilanti Corte Europeo pa defende interes di su pueblo. Pasobra a resulta cu e Arubiano cu ta ciudadano Hulandes cu derechonan Europeo, no por a eherce su derecho pa vota pa Parlamento Europeo.

‘Un ley disciminatorio tabata regula cu cuidadanonan Hulandes naci na Aruba (cu ta gran mayoria di Arubiano) no tabatin derecho pa vota pa Parlamento Europeo cu dos exeption. Solamente si un Arubiano a biba mas cu 10 aña na Hulanda, of si e ta biba pafo di Aruba cu no ta Hulanda, e tabatin derecho pa vota pa Parlamento Europeo’ Promer Minister Eman a bisa. Eman no tabata di acuerdo cu Hulandes Arubiano no por a vota y a cuminsa lucha for di 2003 pa kita e inhusticia, e disigualdad aki. Despues di diferente casonan huridico na Den Haag y na Luxemburg y cu dr. Mito Croes como abogado constitucional, Eman y colega Sevinger a sali un biaha mas victorioso ora corte superior Europeo den un veredicto historico a dicidi cu e Arubiano tin e derecho di voto pa Parlamento Europeo. E caso aki conoci como un ‘landslide case’ ta carga e nomber Eman/Sevinger y ta defini e derechonan di cuidadano Europeo. Na 2009 Aruba a lanza hasta su prome candidato pa Parlamento Europeo cu tabata e propio dr. Mito Croes kende a falta solamente algun cien voto pa por a keda eligi.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter