Thursday, 23 October 2014
Lectura di Prome Minister Eman na Universidad Erasmus elogia pa studiante y docentenan Print E-mail
Monday, 17 December 2012 18:28

1 Mike IMG 9783

Prome Minister Mike Eman a impresiona studiante y docentenan presente na Erasmus Universiteit na Rotterdam unda el a duna un lectura riba e relevancia di Union Europeo pa Aruba, su esfuersonan pa Arubianonan vota pa Parlamento Europeo, e bentaha y desbentaha di LGO y UPG, riba cual Aruba mester tuma un decision den 2013.

Remarcabel ta cu no solamente e lectura a impresiona e studiantenan, cu ta trahando riba nan Masters Degree , pero tambe e tabata un inspiracion segun e diferente comentarionan duna na final. Helen Stin, docente di Ley Europeo na Erasmus Universiteit, na final a comenta cu su coleganan con e ta haya interesante cu tin e posibilidad pa haya inspiracion for di aspectonan practico. Loke el a referi na dje ta cu e mandatario tin e responsabilidad politico pa splica su ciudadanonan con, te na cierto limite, soberania ta un bon idea y cual ta e beneficionan si haci uzo di sea LGO of UPG. “E tabata sumamente educativo pa nos como Europeo, sigur e tabata un ehempel. E tipo di analisisnan aki di kico e potencial beneficionan di un LGO of UPG,” Stin a expresa. Docente Stin a admiti cu aunke cu e ta duna lectura riba Ley di Union Europeo, e tin masha poco conocemento di e dos formanan di asociacion, pa cual e lectura di Prome Minister Eman tabata uno masha educativo pa su persona, pero tambe pa e mas di 50 studiantenan di e universidad mes y otronan cu a acudi for di otro ciudadnan pa scucha e pensamento di e Prome Mandatario di Aruba. Ta un custumber cu Erasmus Universiteit ta invita politiconan di caliber pa duna nan opinion riba cierto temanan interesante pa Union Europeo. Den pasado a yega di invita ex Prome Minister Balkenende y Brinkhorst. Por a nota cu un di e personanan cu a acudi na e lectura di Eman tabata ex Presidente di Parlamento Hubenil Jarius Berry. El a acudi no solamente pasobra e ta un Arubiano pero tambe e kier a scucha cua ta e vision di Prome Minister di Aruba pa cu e lasonan cu e ta desea pa su pueblo mantene cu UE, principalmente con Aruba como isla lo por funciona den e grupo aki. “Awe nos a haya un bon splicacion di kico ta e vision di Gobierno pa Europa y con ambos banda por beneficia di e tipo di cooperacion cu wordo scogi.” Importante, el a bisa, cu pa medio di tipo di lecturanan asina ta haya un impresion di kico ta e vision di e Gobierno y pakico a yega na e vision aki. E ta splica con tur cos a wordo poni den balansa pa yega na e miho posicion. Igual cu Berry, Franschella Lacle a sinti su mes inspira pa e vision presenta door di Prome Minister Eman. Loke el a haya masha interesante di e lectura di Prome Minister Eman ta cu el a bay bek den historia, for di 1948 te cu awor, con Aruba a posiciona su mes y kico kier logra den futuro. “Mi ta masha contento cu e splicacion aki ta wordo duna den publico y cu e cosnan no ta sosode tras di pantaya so,” el a bisa. Lacle, kende ta graduado di Environment & Resources Management, ta haya importante e tipo di presentacionnan asina di e Prome Minister di Aruba. Principalmente pasobra e lectura no a wordo atendi solamente door di Arubiano. Tabatin hopi studiante internacional, kendenan di e manera aki ta cera mas conoci cu Aruba y con e paisnan ultramar ta pensa. Personalmente Lacle ta kere cu den tur sentido ta bon pa uni cu Union Europeo pa hiba e pais padilanti. No solamente Arubiano, pero tambe studiantenan Hulandes tabata impresiona pa e carisma y e forma con Prome Minister Eman a trece su pensamento dilanti. Un di e studiantenan aki ta Arin van het Hof, kende a cataloga e lectura uno masha interesante caminda cu “e Prome Minister di Aruba a demostra su conocemento grandi riba e tema. El e defende y siña nos con a lucha pa logra cu e Arubiano su voz ta wordo scucha den Parlamento Europeo.” Di loke el a scucha e mandatario trece dilanti, e ta kere cu ta importante pa Aruba keda cu su lasonan cu Union Europeo pa reforsa su posicion, ya cu di e manera aki ta aumenta su comercio cu e continente Europeo. “E Prome Minister claramente a mustra cu e bentaha cu esaki lo por tin pa e mesun Union Europeo cu lo por aumenta su lasonan comercial cu paisnan Latino por medio di Aruba. Sigur e lo stimula e economia di Aruba,” el a bisa. Van het Hof ta haya e tipo di lecturanan aki importante ya cu pa medio di nan ta haya mas informacion y ta bira mas consciente di paisnan ultramar, di nan rol den Union Europeo. Tambe pa loke ta Reino Hulandes, e ta haya un bon relacion ta necesario mirando e lasonan historico cu ta existi pa casi 200 aña caba.

Comentarionan (4)Add Comment
juancito piki nunu
December 18, 2012
80.187.201.33
Votes: +1
...

Minister ta bula te hulanda pa duna charla na un universidad hulandes por nada! y si studiante nan rubiano pidiele pa un charla na universidad na aruba e ora si su schedule ta ful of mester paga pa asina e por dal un stap na e scol.. kiko esey ta bisa? cu universidad di aruba su nivel ta demasiado abow pa su mahestad "la reina Eman"want to be? esaki ta opinion di un studiante cu si kier wak education di Aruba bay na prome lugar...

me
December 18, 2012
201.229.69.26
Votes: +1
...

Bon sinta hasi cos di payaso rond numa: SHOW MAN COMPLETO!!! BAY TRAHA!!!

Bje
December 18, 2012
84.24.250.59
Votes: +2
...

Cu tur respet pa PM, pero stop di gaba bo mes. Laga otro gababo, paso asina bo ta desfrauda como homber. E studiante nan di Erasmus no a elogiabo. I di dos ami me como un studiante di Erasmus, docente ta pone nos tur klap despues di speech di tur gast docent. Elogio den nos wowo na Erasmus ta ora nos como studiante ta asina inspira cu nos ta bin personalmente duna bo un man of bisa cu bo a haci bon. Ora un docente (esun cu a invitabo) i bo mesun hende cu ta viaha cubo haci esey. Esey no kiermen cu bo a haya elogio di nos na Erasmus. Dus 24ora pensa poco mas leeuw prome boso scirbi coi loco i danja nomber di Erasmus. Erasmus no ta duna elogio na cualkier hende.

te
December 17, 2012
201.229.11.183
Votes: -2
...

Mike ta un colonialista te den su higra, un homber cu ta contra independencia di su pais ta mitar homber.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter