| Parlamentario mr. Xiomara Ruiz-Maduro: E falta di integridad na SIAD ta mustra nos cu Gabinete Eman no ta integro |
 |
 |
| Tuesday, 18 December 2012 08:34 |
 A peticion di Parlamento di Aruba, Algemene Rekenkamer Aruba (ARA) a haci un investigacion pa haya sa con ta para cu e integridad na SIAD.
E investigacion aki a bira necesario despues cu na dos ocacion tabata tin lekmento di informacion na dicho institucion di Gobierno. Poco dia pasa e rapport a keda presenta y a bira oficialmente conoci cu e integridad na SIAD no ta salvaguardia. E falta di integridad na SIAD combina cu e hecho cu e lekmentonan di informacion a tuma lugar bou di mando di e gobierno actual, ta mustra nos cu Gabinete Eman no ta integro. SIAD mester ta un departamento cu mester por conta cu e confianza di e Pueblo aki cu nan informacion ta wordo trata na un manera profesional y tambe na un manera integro. E instituto aki semper a goza di un nivel halto di integridad. Pero na momento cu Gabinete Eman a tuma mando na 2009, SIAD su integridad a cuminza sufri kiebro. Asina nos por a tuma nota con na 2010 informacion confidencial di un comerciante prominente a wordo saca den medio di comunicacion. Despues na 2011 informacion di un otro comerciante prominente ta wordo saca den medio di comunicacion, locual ta pone cu Pueblo ta cuminsa preocupa y ta cuestiona e integridad di SIAD. E rapport di ARA no a trata e dos casonan aki, pues e rapport no por a constesta e preocupacion di Pueblo con por ta posibel cu awor diripiente informacion confidencial di belasting por ta riba caya. Locual cu ARA si a faya den dje ta pa dedica atencion y investiga e kiebro di integridad di mas grandi na SIAD, cual ta wordo forma pa e management team cu Minister de Meza a pone na cabes di SIAD contra tur nos leynan. E ta bisto cu Minister de Meza hunto cu e team aki, cu consentimento y bou guia di nos Minister Eman lo a fabrica of lo a facilita e dos lekmento di informacionan aki pa asina nan por cumpli cu e meta di persecucion politico na e instituto importante aki na nos Pais. E pensamento aki ta wordo enforza pa e hecho cu Huez den su veredicto di 22 december 2010 ta bisa preto riba blanco, cu Minister de Meza a abusa di su poder na momento cu e a hala e directora di SIAD y e ontvanger di belasting un banda. Tambe mester tene den consideracion cu den e promer caso di lekmento di informacion, e persona haya culpabel di e acto aki a wordo exonera di tur castigo pa e Conseho di Minister di Gabinete Eman y por a bay traha bek na SIAD manera nada un pasa. Sinembargo den e secundo caso di lekmento di informacion si Minister de Meza a schors 4 empleado den pocicionan clave na SIAD, siendo cu awe un aña despues ainda e management team y Minister de Meza no por presenta of fabrica prueba contundente cu e personanan aki lo a lek informacion confidencial. E ta bisto, un Gobierno cu ta permiti pa un Minister sigi goberna apesar cu tin un veredicto di Hues cu ta bisa cu e a malusa su poder, un Gobierno cu ta kita castigo di un empleado cu a ser haya culpabel di lekmento di informacion confidencial, un Gobierno cu ta persigi empleado integro den pocicionan clave y un Gobierno cu ta pone un team di marioneta contra tur ley na cabes di un instituto manera SIAD, simplemente no por ta integro. E falta di integridad na SIAD ta mustra nos cu Gabinete Eman no ta integro!
|
Mustra/Kita e formulario di comentario
