Sunday, 23 November 2014
Gobierno: Minister di Labor ta sali na defensa di e clase trahador, incluyendo esnan di horeca y casino Print E-mail
Wednesday, 19 December 2012 19:56
Comparti

Otmar Oduber005

Un di e cambionan den ley cu ta forma parti di ordenansa laboral ta sali di e punto di bista cu reduccion di orarionan di trabou den sector di horeca y casino pa un averahe di 45 ora pa siman, ta laga tempo pa e trahador por dedica na su mes unda su “quality of life” lo subi y loke ta hopi importante e trahador en cuestion ta mantene su salario.

E systema nobo aki ta trece mas flexibilidad cu ne unda cu e trahador lo ta mas productivo pa motibo cu e lo ta mas satisfecho di por pasa mas tempo cu su famia. Na diferente ocasion a reuni den forma tripartit cu representantenan di dunador di trabou y gremio sindical pa intercambia di ideanan y negocia y asina crea un sosten amplio den nos comunidad (“draagvlak”) pa e diferente cambionan den nos leynan laboral. Y awe Minister Oduber despues di e proceso tripartit aki, a logra pa e leynan aki wordo aproba e siman aki den Parlamento. Poniendo asina e bienestar di e trahadornan nan prome lugar. Pa añanan largo e dunador di trabou den e sector hotelero y casino, por a schedule e trahador pa 48 ora pa siman. Cu introduccion di e siman di trabou di 45 ora, e trahador ta keda cu mas tempo pa dedica na su famia y tempo liber. Durante tratamento di e cambionan di leynan laboral dialuna ultimo Sr. Thijzen na nomber di fracccion di MEP a entrega un amienda cu ta encera un siman di trabou di 6 dia cu un duracion maximo di 6 ora pa dia. Pues pa reduci e cantidad di ora di trabou na 36 ora pa siman pa trahadornan di casino. Esaki ta mustra falta di seriedad di e fraccion di MEP y particularmente di Sr. Thijzen. Aki mester menciona cu na 2004 Sr. Thijzen den representacion di gremio sindical tabata miembro di e comicion tripartit cu e tempo aya durante gobernacion di MEP a traha riba e cambio di nos leynan laboral. Hecho ta cu como miembro di e comicion tripartit Sr. Thijzen nunca a presenta un propuesta pa reduci e orario di trabou pa e trahadornan di casino pa 36 ora pa siman. Hecho ta tambe cu durante campaña na 2005 Sr. Thijzen a haci e promesa pa reduci e cantidad di ora di trabou pa trahadornan di casino pa 36 ora pa siman. Manera nos tur ta corda di 2005-2009 e mes un Sr. Thijzen aki tabata lider di fraccion pa partido MEP, na unda cu e partido aki tabata tin mayoria absoluto den Gobierno. Durante henter e periodo aki, cu Sr. Thijzen tabata lider di fraccion di MEP, na ningun momento no a papia riba e topico aki y mucho menos a haci un intento pa convence su Gobierno di MEP pa implementa e cambio aki cu e la priminti durante campaña. E falta di seriedad aki, di parti di partido MEP y Sr. Thijzena a keda demostra tambe dialuna ultimo na momento di entrega di e amienda, na unda cu ni sikiera su coleganan di fraccion di MEP a presenta den Parlamento pa sostene e amienda aki. Ta cu sosten di un miembro di un otro fraccion a yega na e cantidad di 3 miembro di Parlamento pa e amienda aki por a wordo trata. E falta di seriedad aki igualmente a keda demostra na momento cu Sr. Thijzen a splica e motibo pakiko nan ta vota contra e ley di trahador temporal (“landsverordering terbeschikking stelling arbeidskrachten) e argumento cu Sr. Thijzen a usa tawata cu MEP ta vota contra pa motibo cu no tin draagvlak pa regla e asunto di trahado temporal den un ley apart, mirando cu SER a conseha pa incorpora e asunto aki den nos Codigo Civil. Pero na momento di presenta y splica su amienda direpiente draagvlak y SER no ta importante mas pa Sr. Thijzen. Pasobra hecho ta cu nunca SER, ni ningun otro instancia of gremio a yega di duna un conseho riba e amienda di partido MEP y Sr. Thijzen. Por ultimo e falta di seriedad di partido MEP y Sr. Thijzen ta keda demostra tambe pa e hecho cu e amienda aki ta uno iresponsabel. Obviamente partido MEP y Sr. Thijzen no ta preocupa nan mes pa e concecuencianan negativo cu e amienda aki lo tabata tin si e la wordo aproba den Parlamento. Pa e trahador den casino e lo nifica cu su salario lo bai atras cu 25% of e lo por nifica pa e dunador di trabou den casino cu su costonan di salario lo aumenta cu 25%, locual seguramente lo conduci na aumento di des-empleo den sector di casino. Pues e unico conclusion possible ta cu partido MEP y Sr. Thijzen ningun momento tabata tin un meta noble cu e amienda aki. Nan tabata sa caba prome cu nan a entrega e amienda, cu pa e motibonan menciona aki riba, cu e amienda no lo wordo aproba. Pero nan a entrege toch pa e dia despues nan saca un articulo den prensa bisando cu AVP ta contra trahador di casino. Nos ta condena e tipo di politica populista oportunista aki. Minister Otmar Oduber kier haci uso di e oportunidad aki pa felicita tur trahador aki na Aruba cu e logro importante di dialuna ultimo. Un logro cu lo bai den historia, como un logro cu berdaderamente ta na interes di e clase trahador.

Comparti
Comentarionan (1)Add Comment
asina mes
December 21, 2012
201.229.9.27
Votes: +0
...

BO mester sali na defensa di trahador ARUBIANO. 80% di trahador den Horeca ta stranjero, bo no tin berguensa?

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter