Wednesday, 22 October 2014
Parlamentario Booshi Wever: Perseverancia y firmesa di cierto sindicatonan ta conduci na indexering pa ambtenaarnan; otronan tabata para cla pa entrega Print E-mail
Thursday, 20 December 2012 16:25
DSC_2063
Despues cu Mike de Meza algun dia pasa ainda tabata bisa cu NUL ta keda NUL, ta danki na e perseverancia di algun sindicato cu awor ambtenaarnan por haya nan indexering di 85 florin, mas 150 florin di compensacion, tanto den e “gelijk bedrag” di fin di aña, como den e “bashi-premie” na januari, esaki entrante 1 di januari 2013.

Aunque cu e suma aki lo no recompensa nan perdida di forza di compra totalmente. No ta di mas menciona cu na mi parecer e sindicatonan cu mediante nan lidernan a para mas firme pa logra esaki, ta entre otro SPA, TOPPA, ABV, STA y SCCA! Apesar cu ni TOPPA, ni STA ni SCCA, a bai di acuerdo cu e loke lo bai firma diabierna awor. Sinembargo, e otronan cu ta colabora cu AVP den Dialogo Social, atrobe segun mi fuente, tabata para cla pa entrega y bisa ayo na e indexering, sea esaki tabata pa complace cu e gobierno aki, of tabata pa falta di “CURASHI” pa bringa pa nan derechonan, e “CURASHI" cu na 2008 sí nan a mustra door di bay den welga durante 7 siman largo. Pero nos tur sa cu ta un agenda scondi hunto cu AVP nan tabatin. No ta pornada, algun dirigente sindical ya a wordo recompensa pa nan colaboracion cu AVP e tempo ey, cu nombracionnan den posicionnan den gobierno, sin open sollicitatie y tambe nombracionnan den organonan oficial.  Pues un pabien, cu sentimentonan mixto, na e cuerpo di ambtenaar pues ta su lugar, pero sigur tambe na e dirigentenan sindical cu a haci esaki posibel, sin cu mester a bay den accion y welga, pero tampoco a bende nan alma cu e gobierno aki, manera algun otro cu si nan alma ta bendi, pa cos! Banda di e satisfaccion cu e ambtenaar mester por sinti pa e logro (minimo) aki, e - mescos cu cualquier ciudadano di nos pais - mester ta preocupa si pa nos situacion precario, cu ta haci necesario algun ehercicio pa cubri e deficit premira pa 2013.

Un deficit cu ta yegando 7%, cu finalmente ta e pueblo mester bay paga! Den tur e alegria aki, ta di lamenta si cu e acuerdo cu a logra, ta conta pa un aña so, y no a yega na ningun palabracion pa despues, esaki claramente pa schuif e problema pa despues di september 2013! Un filosofo Italiano a yega di comenta cu tur gobierno ta pinta tur cos mihor cu nan ta den realidad, cu tur cos ta OK. Den tur situacion e filosofo ta weita e gobierno manera den un tunnel, cu un luz na horizonte. Locual ta trata nos situacion, minister president no mucho tempo atras a yega di expresa cu Aruba ta “djies un tiki den corra”, sinembargo esaki mientras tanto a cambia di tal manera cu nos pais ta hopi mas den corra! Y e luz cu gobierno ta weita na horizonte, pa nos pais ta un trein cu manera un bola di fuego ta na punto di yega y dal den cara di tur ciudadano.  Mike Eman ta bay pidi ayudo na Hulanda, y un comision ta wordo forma pa atende nos situacion financiero, locual kier meen pues cu un biaha mas ta Hulanda ta bay dicidi y e gobierno di AVP aki ta cla pa entrega nos autonomia riba tereno di finanzas na Hulanda.  Gobierno mes ta entrega un presupuesto supletorio pa 2012, y ta hinca aden un aumento retroactivo di salario pa coordinadornan cu ta varia entre 4 pa 5miyon pa cada ministerio, pa un total pues di mas o menos 35.000.000,00 florin!  Aki gremionan no ta bisa nada, pero awor ata diripente Camara di Comercio (KvK) kier bai tene reunion den bario pa splica e situacion di nos fondo di pensioen y nos situacion financiero! Dicon KvK mester hasi e trabow aki pa gobierno? Esaki ta e pagamento back pa motibo cu gobierno ta fix belasting pa cierto comerciantenan? Ta e mesun KvK nomas algun luna pasa a bisa cu tur cos ta OK, ata awor cu nos financia publico ta na werki, nan kier trata di bin hunga e gran salbador ! Mi a adverti por escrito TUR gremio, tanto comercial como sindical, pa e situacion aki; incluso mi a informa Standard & Poor’s, lamentabelmente sin ningun resultado!

Ta p’esey Camara di Comercio, hunto cu otro gremionan mester wordo considera co-culpabel di e situacion aki. Nos por corda cu tempo cu, bao di e gobierno anterior, e “schuldquota” tabata di 43%, Banco Central a sapatia formalmente; awor sinembargo, cu e quota aki casi ta yegando na 80%, Banco Central ta bay di acuerdo pa hise na 60%; Banco Central pues tambe ta co-responsabel pa e bola di fuego cu ta na punto di explota den nos cara! Ta bisto cu gremionan ta permiti pa nan wordo manipula door di e gobierno aki; Banco Central entre otro tambe ta bay ciegamente tras di gobierno, y ta acepta cifra- y conclusionnan wowo será; por ehempel Banco Central no ta cuestiona di ki manera gobierno lo kier reduci gastonan cu 70miyon! Esaki mientras cu ya caba e cifra aki a subi cu otro 13miyon! Algemene Rekenkamer na su turno ta haci un “investigacion” na SIAD, y su conclusionnan mi a cualifica caba como un “studieboek”. ARA di berdad ta señala situacionnan robez, pero NO ta cuestiona esakinan. E ultimo hazaña na Belastingdienst ta e schorsing di e ultimo persona integro, pasobra e lo por a stroba e manipulacionnan den e departamento aki. Unda mi cantidad di pregunta na gobierno den e asunto di HOH, ta wordo contesta pa ni 10%, ARA ta bisa cu gobierno ta contesta debidamente. No ta nada straño tampoco si bo considera cu den ARA gobierno tin un “verlengstuk” den persona di un miembro cu ta conoci pa ta colabora (“heul”) cu gobierno. Conclusionnan cu por saca pues ta cu entre otro tanto Camara di Comercio, como Centrale Bank y Algemene Rekenkamer, ta instrumentonan cu cua gobierno ta manipula pa pinta cosnan “de color de rosas”, na unda ningun no ta preocupa pa nos futuro generacionnan, pero ta wak solamente e proximo eleccion na september 2013!

Comentarionan (5)Add Comment
Mojendi
December 21, 2012
31.151.210.190
Votes: +0
...

Mi ta kere cu e sindicatonan cu Booshi ta calificá como cobarde y traidor ta na palabra awor, mi no ta kere cu nan tin miedo di Booshi y ta sucumbí na su expresionan, pasobra ta expresionan hopi serio Booshi a dirigí nan nan, mi kier wak awor kiko ta bay sosodé.

Arubiano Realistico
December 20, 2012
201.229.14.105
Votes: +0
...

Hende por tin brio. Como minister den gobierno anterior nunca ela hisa ni un dede pa e ambtenaarnan, ni dia cu nan a subi caya pa seis siman.
Hunto cu Nel nan a trata e ambtenaarnan manera cacho, anto awor pa bin bisa sorto di cosnan asina. Bo no tin berguenza pa habri bo boca awor ?

amimes
December 20, 2012
206.53.144.160
Votes: -2
...

Atorbe ta kiko mas e ambtenaarnan kier. Cuminsa traha di duna servicio. Ami tin 7 anja sin haya aumento anto otro anja e bijdrage di pensioen ta 2 o/o y cu e aumento di a ambtenaarnan tue pris ta subi.

Mojendi
December 20, 2012
31.151.210.190
Votes: +12
...

Mi ta haña cu ta net Booshi (Mep light) mester sconde su cabes manera un struisvogel ariba e asunto di indexering. E no tin consenshi cu loke e cu su gobierno a haci en cuanto di indexering, awor ta net e ta bin duna comentario, ta berdad cu e hendenan ey no tin cuero di cara.

puro
December 20, 2012
201.229.47.175
Votes: +8
...

Booshi stop di busca problema caminda no tin problema. Bo nota wak cu ni 1 hende ta worry cubo? Spaar bo stembanden nan pa por papia cu e nieto nan.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter