Tuesday, 29 July 2014
Parlamentario Rene Herdé: "Presencia di Miembronan di Parlamento den reunion no mester ta punto di discucion" Print E-mail
Friday, 21 December 2012 01:09

mep
Atrobe a surgi un discucion riba presencia di miembronan di partidonan di oposicion den reunionnan den parlamento. Durante di e ultimo tres aña y mey e tema aki a surgi mas biaha. E discucion ta si ta exigi pa tur 21 miembro di parlamento ta presente pa tur reunion y pa nan ta sinta henter reunion den e sala.

E discucion e siman aki a lanta atrobe door di cu durante di tratamento di e dos prome leynan laboral importante cu ta toca mas cu 50 mil trahado na Aruba, majoria di e miembronan di oposicion, algun cu bon motibo, tabata ausente. Obviamente e discucion di comienso di siman no a cambia nada. Ayera ora di trata e ley pa proteccion di cacho, atrobe un majoria di oposicion tabata ausente. (Wak e potret.) Durante di majoria di e dia tabata tin un miembro di e partido MEP so presente.

PUNTONAN DI BISTA

Tin dos punto riba e tema aki. Un punto di bista ta cu tur miembro mester ta presente pasobra nan ta wordo paga bon door di pueblo pa traha full-time riba asuntonan di nos pais. Full-time kier men cu nan mester atende tur reunion y sigur tur reunion publico importante. Si nan no ta presente, nan lo mag di cobra tampoco mescos cu ta conta pa otro trahadonan na Aruba. E otro punto di bista ta cu cada fraccion y cada miembro di parlamento mester dicidi ta cua temanan e kier ocupa su mes cun’e y cua reunionnan e ta atende. Esnan cu ta sostene e ultimo punto di bista aki ta haya cu miembronan di parlamento, specialmente esnan den un fraccion chikito of esnan cu ta nan so den parlemento, no por atende tur reunion, hasta si nan tabata kier. Den parlamento di otro paisnan manera Merca y Hulanda, cada fraccion ta apunta un of mas persona pa atende tur cos di un tema of ministerio. E personanan aki (-y no henter e fraccion-) ta atende e reunionnan riba e temanan aki. Solamente ora tin cu vota riba un ley of otro asunto, henter e fraccion ta presenta. Den un situacion asina Bo ta haya cu ta trata leynan y temanan completo cu algun persona so den sala. Mientrastanto e otro miembronan di nan fraccion ta atende otro asuntonan. Un complicacion cu tin, ta cu den e Reglamento di Orden di parlamento di Aruba tin stipula, cu pa reunionnan publico mester tin por lo menos 11 miembro di parlamento presente. Den realidad esaki ta nifica cu ta e miembronan cu ta sostene gobierno mester percura cu nan ta presente pa forma e majoria rekiri. Oposicion no ta sinti cu nan mester ta presente, pasobra no ta nan tin cu forma e majoria di 11 miembro rekeri. Hasta sa sosode cu oposicion ta keda sin drenta sala di reunion pa forsa tur e miembronan di partido cu ta sostene gobierno pa ta presente den sala. Rene Herdé, lider di fraccion di AVP, ta un di e miembronan cu for di tres aña y mey pasa cu ela drenta parlamento, ta boga pa mas eficiencia den e trabou di parlamento, miho planificacion di e reunionnan, mas uzo di comunicacion via internet y hasta mas reunion via internet (“video conferencia”) enbez di biaha. E kier wak menos uzo di papel y mas documento digital, modernisacion di e organisacion di parlamento incluso un reglamento di orden cu ta promove mas eficiencia y efectividad den e trabou di parlamento. Pesey a puntra Rene Herdé su opinion riba e presencia di miembronan di parlamento den reunionnan. Rene Herdé: “E presencia di miembronan di parlamento den reunionnan no lo mester ta un punto di discucion. Pero tanten cu e Reglamento di Orden di parlamento ta rekeri pa tur miembro ta presente den reunionnan y tanten cu no tin un organisacion mas eficiente di e trabou di parlamento, tur miembro mester ta presente. Pasobra ta asumi den reglamento y organisacion, cu ta pa esey nan ta wordo paga. Ora nan no presenta cu rason ta puntra ta unda nan ta? Na momento cu tin un organisacion di e trabou y reglanan cu ta promove mas eficiencia, den cua un miembro ta autorisa pa papia den nomber di henter su fraccion, e situacion ta cambia. No tur miembro lo mester ta presente den tur reunion, pero tur miembro lo ta ocupa cu un of otro asunto di nos pais. Asina nos lo logra haci mas tambe! Pero mes ora e peso di responsabilidad di kico si cada miembro ta haci ora nan no ta den e reunion, ta cay ainda mas pisa riba nan.”

Comentarionan (2)Add Comment
The Observer
December 22, 2012
201.229.2.4
Votes: +1
...

Si sigui asina, nos como pueblo lo mester lanta y cu un protesta magno pa EXIHI respet den Parlamento di Aruba. Ora ta falta respet den Parlamento di Aruba, ta nos e como 110 mil hende cu ta biba aki na Aruba boso ta faltando respet. Esaki no por sigui asina... Unda Gobernador di Aruba a keda???

jos
December 21, 2012
201.229.76.242
Votes: +3
...

awel sr herde si ta asina anto ta avp mester cuminsa cu e ehempel di duna pais ARUBA bek placa cu su miembronan a cobra pa 8 anja tempo di gobierno di mep no twt hasi acto di presencia den parlamento anto tin di nan cu lunanan bo no twt wak nan den parlamento smilies/smiley.gif

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter