Wednesday, 26 November 2014
Minister dr. Richard Visser ta contento cu e acuerdo firma pa Aruba haya un hospital nobo y renoba esun actual Print E-mail
Friday, 11 January 2013 11:50
Comparti
DSC_2063
Den apenas 3 aña di gobernacion, Minister di Salud Publico y Deporte, dr. Richard Visser, ta logra otro proyecto mas pa e pueblo di Aruba den e parti medico, cu ta primordial pa cualkier pais. Parlamento a vota na fabor di renobacion y expansion di   Dr Horacio Oduber Hospitaal.

Na aña 1972 a construi nos hospital actual, tempo cu Aruba tabata conta cu un poblacion di mas o menos 50 mil hende y tabatin un promedio di 200 mil turista pa aña ta bishita Aruba. Actualmente esaki sigur no ta e caso mas, ya cu Aruba ta conta cu un poblacion di mas o menos 105 mil hende y tin como 1.6 miyon turista ta frecuenta nos isla. Pues e necesidad pa tin un hospital mas amplio, brindando miho calidad di cuido medico como tambe cu mas capacidad, ta un prioridad.

Despues di 2 dia largo y intensivo di reunion den Parlamento, Gobierno di Aruba a haya autorisacion pa firma e acuerdo di huurovereenkomst cu SOGA, pa haci un construccion di dos parti di hospital y renobacion di esun existente. Henter gobierno a keda hopi contento cu a haya aprobacion di casi 80% di esunnan presente den sala di Parlamento, ya cu 14 di 18 voto, tabata pro.

SOGA ta conoci caba pa financia proyectonan grandi, di cua e gobierno anterior mes a haci uzo di nan pa realisa algun proyecto. ‘Esaki ta un dia hopi grandi pa henter nos comunidad, ya cu Aruba ta bay haya su hospital nobo. Nos a haya un mapa for di un grupo Hulandes cu sigur no tabata loke nos a spera. E mapa cu nan a presenta no tabata manera nos a premira nos hospital nobo y sigur p’e tempo actual cu nos ta bibando aden y pa garantisa cu e hospital por bay 25 aña of mas. Varios punto relaciona cu infrastructura no tabata cuadra cu e realidad y sigur pa tin 3 tipo di fundeshi, dak y muraya, ta haci’e hopi mas caro. P’esey mesora a dicidi pa busca otro arkitecto pa pinta algo cu realmente por ta adecuado pa nos, algo cu ta yuda nos cu e vision cu nos tin”, e mandatario a remarca.

E dignatario a splica tambe cu lo traha e hospital nobo, riba e mesun tereno unda esun actual ta ubica. E motibo di esaki ta cu e companianan di utilidad tin diferente liña cu ta drenta hospital y esaki ta costa demasiado placa pa hac’ie na un otro luga. E costo di e infrastructura aki ta core entre 30 – 45 miyon p’e trabounan bou di tera si mester traha esaki dinobo na un otro localidad. E hospital actual ta riba nos famoso ‘tourist corridor’, na momento di un fayo di elec tricidad, hospital hunto cu area turistico ta haya coriente prome. Tambe no por kita afo, cu varios specialista ya a ubica nan clinica rond di hospital actual y tur esaki ta djis pa ta mas accesibel y facil pa e pashentnan en cuestion.

E otro punto cu e dignatario a amplia riba dje ta, cu a haci varios estudio di tereno eynan, manera si e tera ta fuerte of no pa cualkier problema di naturalesa y tur cos a sali positivo. Tambe por haci uzo di e skelet di e hospital actual, ta djis mester reeinforz’e.

“E concepto di e hospital nobo, lo ta uno completamente diferente y sigur a tene cuenta cu e sugerencianan di e expertonan, como tambe esunnan cu ta traha diariamente eyden. E edificio no lo tin e structura bieu rectangular, pero mas bien e lo haya forma di un racetrack, unda cu e parti di enfermeria lo keda central. Di e forma aki e enfermeronan no mester cana hopi leu pa sea busca nan aparatonan, informacion, y of remedi ya cu tur cos ta bay ta central. Nos a sinta cu e nursenan y stakeholders pa papia di e nan necesidadnan, mirando cu nan t’esunnan cu ta haci 80% di tur e trabou den hospital. Despues di e intercambio di idea aki, e arkitectonan mester a haci un analisis y nos a dicidi di inverti 7 miyon mas, pa haci e cambionan cu a sali for di enfermeronan.”

Un aspecto hop importante cu e mandatario a pone enfasis riba dje, ta esun di medio ambiente. El a indica cu e medio ambiente lo ta ful nobo, unda cu na momento cu bo drenta e hospital, ya bo ta haya e sentimento cu bo ta bay bira miho. Tur aspecto di diseño, flur, textura, asta e pañanan y e colonan di tela ta diferente y ta aporta pa trece un ambiente mas positivo pa tanto e pashent como e bishitantenan. “Nos a enfoca completamente riba e pashent, como tambe con pa elimina contaminacion y infeccion, p’esey nos a dicidi pa bin cu 2 liña di trafico pa e liftnan pa evita cu e bishitantenan ta topa cu esunnan cu ta labora den hospital. Esaki ta djis un ehempel pa indica cu e edificio mes lo ta bay ta mas saludabel. Tambe nos a concentra masha hopi mes riba e wachtkamer, tanto den sala di emergencia, como tambe ora di warda un pashent. Nos a crea luga pa papia cu bo dokter mas priva, luga pa warda un persona cu ta haciendo test na hospital, unda cu bo por sinta y relaha y no ta sinta den un gang. Pues no solamente nos a enfoca riba e pashentnan, pero tambe e famianan lo haya un experiencia completamente nobo ora di drenta nos hospital. Intencion ta pa nos haya e “Gold Lead Certificate” cu sigur ta algo cu lo eleva e status di nos hospital internacionalmente. Nos a echt enfoca pa tur cos ta centralisa. Otro punto di atencion tabata e entradanan di diferente seccion di e hospital, di cua cada entrada lo ta mas priva y separa. Ta bay tin un entrada apart pa ambulance, wachtkamer manera mester ta den e seccion di emergencia, aumento di dokternan cu ta bay traha eyden, tambe 25 nurse specialisa. Sin laga afo un MOB, unda tur specialista ta bay tin nan mesun edificio conecta cu hospital, cu entrada separa pa no congestiona hospital.”

No tin duda cu Aruba ta ansioso pa mira esaki den practica, pasobra ta yega ora pa realmente nos cuminsa inverti y mehora nos instituto principal di cuido medico, teniendo na cuenta e futuro generacion y cu ta trah’e a base di un vision riba largo plaso, pues 25 aña of mas. Minister Visser ta gradici tur su coleganan pa nan sosten y e pueblo di Aruba, ya cu despues di poco mas cu 40 aña, Aruba lo haya un hospital nobo, cu ta completamente ekipa pa brinda e miho cuido medico y cu e poblacion merece..

 

dowers dowers dowers
dowers   

Comentarionan (3)Add Comment
Kadushi
January 12, 2013
67.23.232.242
Votes: +0
...

E plan no tawata pa traha e hospital central den Aruba, pabau di Drive Inn. E pueblo di San Nicolas, ta jega mas liher, an e cuido medico mas avanza, y amulance no mester corre cu sirena asina leeuw mas cu 10 biaha pa dia. Esey tawata e plan. Pueblo di pariba please observa, kiko e gobierno aki ta haciendo. Tur inversion nan ta aeropuerto bay abau. Esnan cu no a lanta foy sonjo, lanta awor. Tin rechazo grandi pa e gobiero aki den e pueblo nan di pariba.

Spotlight_101
January 11, 2013
67.23.232.242
Votes: +1
...

San Nicolaas a keda afo atrobe. Danki AVP!!!!!!!!

rod
January 11, 2013
67.23.232.242
Votes: +0
...

Pa 8 anja largo cada siman nos pueblo tabata
lanta cu memnaza di hizamento di premie di AZV,
dokternan tabata trata manera criminal,8 muyon horta
de landslaboratorium y un warehouse na San nicolas cu
tabata pretende di ta un centro cardiologico....!!!
E autor di tur e fechoria aki ainda tin cuero na cara pa vota
contra renovacion di hospital....!!!mester tin cuero di macaco na cara!

Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter