Sunday, 20 April 2014
Rene Herdé: Tene prijs di coriente pagabel pa pueblo Print E-mail
Friday, 01 February 2013 21:00

rene

“E meta mester keda pa tene prijs di coriente pagabel awor y den futuro!” Esey lider di fraccion di AVP a bisa prensa durante di e reunion den parlamento ayera riba e didos proyecto di mulina di biento cu tin planea na Urirama. Rene Herdé a keda sorprendi cu ningun miembro di oposicion cu a papia ayera, a referi na e meta importante aki.

Ta parse cu nan no kier papia di esey. Siendo cu e ta un di e motibonan importante pa tur cos cu haci riba tereno di energia na Aruba. Rene Herdé a sigui splica: “Tanten cu nos sigui usa ‘Heavy Fuel’ cu ta bini di petroleo, como fuente di energia pa genera coriente (y awa) na WEB, nos por conta cu e prijs di coriente (y awa) lo sigui subi. Si den e ultimo shete aña ya ela subi cu 290% segun WEB mes, imagina Bo cuanto e ta bai subi den e añanan nos dilanti. E demanda pa petroleo ta sigui subi y cu esey e prijsnan ta bai sigui subi. Pa e benidero tres aña so caba ta anticipa un aumento 50% compara cu awe. Ta p’esey gobiernonan rond di mundo ta busca forma pa usa menos productonan di petroleo den produci coriente. E uso di energia “berde” cu no ta caba, ta renovabel y limpi, tin hopi beneficio. Awor aki e prijs di energia “berde” ta caro ainda, pero manera e prijs di petroleo sigui subi, e prijs di energia “berde” ta bira mas atractivo. Aki na Aruba nos tin e suerte di tin solo tur dia, biento constante casi henter aña y un lama cu coriente constante. Mas cu hopi otro pais, nos tin e oportunidad pa haci nos mes menos dependiente di petroleo pa genera coriente. Asina nos lo por tene e prijs di coriente (y awa) mas pagabel awor y den futuro tambe. Pasobra e prijs di energia “berde” ta keda mas stabiel pa hopi tempo!”

INTERES GENERAL

Manera hopi biaha ta e caso, den desaroyonan grandi manera esaki, tin hopi diferente interes den wega. Tin e interes di naturalesa, interes di e compania WEB, e interes di e inversionistanan y e interes importante di e hende cu ta biba serca di e area caminda e mulinanan ta bai wordo poni. Rene Herdé: “Mester tene cuenta cu tur e interes of factornan aki. No por y no tin mag di neglisha ningun. Ta p’esey a tuma asina hopi tempo pa prepara y studia e proyecto grandi aki. Tambe a papia cu habitantenan den e area di Alto Vista, Sero Pela, Boroncana, Curimiau, etc, pa tende di nan kico nan ta haya di e proyecto aki. Contrario na e forma cu a prepara y ehecuta e proyecto di mulinanan di biento na Vader Piet (San Nicolas), awor si ta tene cuenta cu tur e hendenan y factornan envolvi. Ta scucha tur opinion y ta purba acomoda esakinan den e proyecto. Asina ya a tuma e desicion di cambia e posicion di algun di e mulinanan y sacanan mas for di bista di e kapel di Alto Vista. Na final di dia sinembargo, ora di tuma desicion, ta tene specialmente cuenta cu e interes di henter nos isla. E interes general. Pero hamas lo tuma un desicion si e ta ensera peliger pa un hende. Ta p’esey a sigura cu no tin ningun riesgo pa salud di hende. Un aspecto di e interes general ta pa sigura cu nos pais lo tin coriente na un prijs pagabel den futuro. E prijs cu nos lo mester paga den futuro lo depende di e fuente di energia cu nos usa. Mas nos sigui usa petroleo, ta mas nos lo mester bai paga. Menos nos usa petroleo, ta mas stabiel e prijs lo keda. A tene cuenta cu e posibilidadnan tecnico di WEB y a scohe hunto cu e ingenieronan di WEB pa un combinacion di fuentenan di energia. Mientras ta reduci e uso di petroleo door di ta mas eficiente den produccion di coriente, lo haci mas uso di energia di solo, biento y otro posibel fuentenan, cu ta yuda sigura coriente pagabel y limpi pa hopi aña! Pa nos esey ta e caminda corecto pa cana y p’esey e parkenan di mulina di biento cu lo produci entre 30 pa 40 % di energia cu nos tin mester, ta asina importante. Nan ta sirbi mas cu tur e inters di henter nos pais sin causa daño na salud di hende of na naturalesa.” Asina Rene Herdé di partido AVP a splica.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter