Saturday, 30 August 2014
Lider di MEP sra. Evelyn Wever-Croes ta felicita e famia di MEP cu su 42 aña di existencia Print E-mail
Friday, 08 February 2013 14:37

Evelyn lider 

Awe 9 di februari 2013 partido Movimiento Electoral di Pueblo (MEP) ta celebra su 42 aña di existencia. Durante e trayectoria largo aki, MEP semper a sali na vanguardia y defensa di e pueblo humilde y a concretisa logronan historico pa pais Aruba. Alavez durante e 42 añanan aki partido MEP tabata tin e honor di tabata den gobierno durante mas cu 25 aña, un hecho inigualable den historia politico di nos pais. Fundacion di MEP Dia 9 di februari 1971 nos lider inmortal Gilberto François (Betico) Croes a funda e prestigioso partido Movimiento Electoral di Pueblo y cual partido a lanta pa lucha pa mas autonomia pa e isla aki. Desde principio caba partido MEP a pone su dilanti e ideologia social-democrata, nos structura estatal y un union di henter e pueblo Arubano, sin distincion di rasa, color, religion, status social etc. Den apenas dos luna di tempo e partido aki a logra obtene un tercera parti di e electorado Arubano, esta 7 asiento for di 21. Desde e tempo ey MEP a crece drasticamente, tanto den voto como den asiento y ta e unico partido na Aruba cu nunca a yega di baha bao di 8 asiento. Esey ta demonstra e forza di e nucleo fiel cu semper a sostene nos partido, tanto den tempo bon como tempo menos bon. Durante di e 42 añanan di existencia di MEP, e partido aki a participa na 16 eleccion, tanto pa Eilandsraad, Staten di Antiyas y Parlamento di Aruba y den 9 di e 16 eleccionnan aki MEP a haña e mayoria absoluto. Algo impresionante y historico den Reino Hulandes! MEP ta un partido cu desde su fundacion te cu awor apenas a conoce tres lider, esta Betico Croes den feliz memoria, sr. Nelson Oduber y nos actual lider sra. Evelyn Wever-Croes. Lucha pa Status Aparte Sin duda algun cu partido MEP tabata e vehiculo principal di nos Libertador Betico Croes den su lucha pa nos Status Aparte. Pa por a cumpli cu e deseo di pueblo pa su libertad, nos Libertador mester a haci hopi sacrificio, drama sanger, sodor y lagrima pa realisa e anhelo aki. MEP ta e partido cu a percura pa nos simbolonan di union y libertad, esta himno y bandera, nos moneda, nos ortografia, nos propio constitucion, Gobierno, Parlamento, nos propio Gobernador, Banco Central etc. Den henter e lucha pa Status Aparte a resalta e accionnan di augustus 1977, ya cu tabata danki na e accionnan aki cu Aruba a wordo scucha dor di Hulanda. Finalmente e deseo di Aruba a wordo concretisa durante e Conferencia di Mesa Rondo na 1983 na unda nos derecho di autodeterminacion a ser reconoci y aproba pa nos sali for di Antiyas dia 1 di januari 1986 y cu nos lo bira independiente dia 1 di januari 1996 den un Man Comunidad cu Hulanda. Y ta cu honor dia 13 di juli 1990 sr. Nelson Oduber a percura pa schrap e fecha di Independencia 1996 for di den Statuut pero manteniendo e derecho pa bira independiente dia cu e pueblo aki den un referendum dicidi esaki den su mayoria cu aprobacion di 2/3 parti di Parlamento, cual ta un garantia solido y responsabel. Logro y proyectonan di MEP Hecho ta cu ta danki na e logro di Status Aparte na 1986 cu MEP a realisa, Aruba a haya e instrumentonan economico pa por logra desaroya e pais aki. Un gran cantidad di logro y proyecto a ser realisa durante cu MEP tabata den gobierno. Algun di e proyectonan cu a wordo realisa door di MEP tabata: Waf di container, Plan Sasaki pa desaroya henter e area turistico, edificionan di Domeinbeheer, Douana, Ontvanger, SVB, Biblioteca Nacional, FCCA, companianan estatal Arubus N.V., APA N.V., WEB N.V., Elmar N.V., Setar N.V., oficinanan auxiliar di gobierno, ampliacion di Zona Franca, pista di aterisahe, renobacion y construccion di facilidad/stadionnan deportivo, casnan di pueblo, construccion di centronan di bario, Lotto pa Deporte, planta di purificacion di awa, wardanan di polis nobo, Hotelvakschool Bushiri, Sporthal, Centro Medico San Nicolas, PAAZ, construccion di careteranan, construccion y renovacion di schoolnan etc etc. Un otro logro importante tabata e reapertura di e refineria Lago na 1991. Tambe e firmamento di un acuerdo cu ‘SACE’, unda a trece un solucion den e problema di garantianan: un debe di 206 miyon dollar a ser reduci te na 110 miyon dollar. E acuerdo cu Hulanda na unda 250 miyon florin di Plant N.V. a pasa pa Aruba ta un logro historico den cual ta demonstra un biaha mas cu MEP semper a goberna cu curashi, perseverancia y determinacion. Locual cu ta resalta durante henter e trayectoria impresionante di MEP ta e sinceridad y honestidad cu e partido aki ta desplega den e comunidad Arubano. MEP ta e unico partido cu na varios ocasion a bisa e pueblo adelanta con e situacion financiero y economico ta y si tin cu tuma pasonan necesario pa trece solucion, MEP semper ta haci esaki pa bienestar y futuro di nos criaturanan, sin importa cu esaki lo por costa partido voto den eleccion. Actualmente partido MEP, bao di liderazgo di sra. Evelyn Wever-Croes, den oposicion ta demonstrando nan solidez como un partido cu ta sali constantemente na vanguardia di esnan mas vulnerable den comunidad. E forma ehemplar y profesional cu fraccion di MEP ta hibando nan oposicion den Parlamento ta muestra cu pueblo por tin e siguransa cu nos pais lo wordo salba un biaha mas y esaki na momento cu MEP asumi gobernacion proximamente. Gradicimento di lider di MEP Awe lider di MEP sra. Evelyn Wever-Croes kier a gradici tur esnan cu a funda partido MEP y cu a yega di forma parti di e lista aki, en especial na nos lider inmortal Betico Croes y nos lider honorario Nelson Oduber pa nan pasenshi y dedicacion. Alavez un felicitacion na tur e candidato, directivanan di e urnanan electoral, Forza Femenina Grace, e hala hubenil YEGA, militantenan y tur e votadornan pa cu e 42 aña di existencia di nos partido. MEP ta conta cu un nucleo solido cu lo keda sostene e partido aki y esaki lo wordo demonstra un biaha mas na september proximo den eleccion pa Parlamento.

album album album
album album album

Comentarionan (1)Add Comment
Spanta pato
February 08, 2013
174.91.110.186
Votes: +0
...

si boza a keda den gobierno , boso lo a sink Aruba. Loque Betico a bisa Nel baha promer cu bo sink Aruba.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter