Monday, 20 October 2014
Gobierno: Gabinete Mike Eman a kita Aruba for di e caminda di empobrecemento social cu tabata riba dje Print E-mail
Monday, 18 February 2013 20:10

Mike Eman025

“Un total di 25 mil persona den sector priva ta bin na remarke pa ricibi Reparatietoeslag; empleadonan publico, tres aña sigui a haya aumentonan tres aña sigui, incluyendo indexering y voor- y najaarspremie; 16 mil pensionado di AOV ta haya reparatietoeslag y 700 pa 800 persona, cu nunca a haya uitkering pa pension, awor ta haya esey via APFA.”

Esey tabata un resumen den cifras di e maneho social di e gobierno aki duna dor di Prome Minister Mike Eman kende a hiba palabra ayera mainta hunto cu Minister di Finanzas Mike de Meza na ocasion di e aumento di e Reparatietoeslag pa pensionadonan. Contrario na loke opositornan ta purba troce, e gobierno actual ta ofrece e cantidad mas grandi di sosten financiero pa esnan den mas necesidad. E maneho social di Gabinete Mike Eman ta un di e obhetivonan primordial for di e tempo cu e gobierno a keda huramenta na november 2009. E motibo di e urgencia cu Gabinete Mike Eman a mira pa atende e aspecto social tabata simpel. Durante henter gobernacion anterior e ciudadano a perde su poder di compra. Den transcurso di ocho aña, gobierno anterior a hisa e prima di AZV, a aumenta invoerrechten, y tambe a introduci BBO. Tur esaki a causa un inflacion nunca mira prome na nos isla cu na 2007 a yega na e cifra di dobbel digito di 10.2%. Den Dialogo Social, un biaha tras di otro, Gobierno a sinta cu gremionan pa traha riba e recuperacion di poder di compra di e ciudadano Arubiano. A pone enfasis riba cuater grupo importante cu ta pensionado,trahadonan cu salario minimo, empleadonan publico y esnan riba bijstand. Empleado publico pa tres aña consecutivo a haya indexering. Na 2011 cu 105 Florin, na 2012 cu 140 Florin y 2013 cu 85 Florin. Adicionalmente a conoce un aumento den e voor y najaarspremie. Ora bo ta conta cu tur esaki y multiplica pa 13 luna cu ta ricibi salario, e empleado publico promedio a bay dilanti cu casi 5 mil Florin pa aña, compara cu 2009. Sin ningun tipo di distincion, esta “for di e schaal di mas chikito te na esun di halto,” Prome Minister a indica. E grupo cu ta ricibi Bijstand a conoce un aumento di 25% di su entrada na aña 2009. Fuera di esey Gabinete Mike Eman a introduci e Schoolkinderentoeslag di 100 Florin pa cada mucha. Na aña 2010 a aumenta e toeslag aki cu 100 Florin mas, kier men 200 Florin pa cada mucha of hoben cu ta bay scol, pa luna. Pa ilustra e mehoracion den e entrada di esnan cu ta ricibi e bijstand, Prome Minister a duna un ehempel cla caminda “Un mama soltero cu dos yiu na aña 2009 tabata haya apenas 605 Florin, mientras cu awendia e ta ricibi mensualmente 1.135 Florin. Nos ta papiando aki di mas cu dobel di loke e tabata haya,” Premier Eman a indica. Trahadornan di sector priva cu salario minimo of cu un salario te cu 2.500 Florin pa luna tambe ta bin na remarke pa haya un Reparatietoeslag. Esaki ta un iniciativa unico den Reino despues di Hulanda, caminda for di sector publico ta sali e recursonan pa un aumento pa esnan di sector priva. Despues cu el a wordo introduci na 2012, e aña aki a dune un aumento di 75 pa 100 pa esnan cu salario minimo y di 25 pa 100 pa esnan cu un salario di 2.500 Florin of menos. Otro grupo cu Gabinete Mike Eman a tene hopi cuenta cune ta esun di Pensionadonan/AOVers pa kendenan na aña 2011 a introduci un Reparatietoeslag di 50 Florin pa luna. Durante e sesion di Dialogo Social di november a dicidi cu ta necesario pa aumenta e Reparatietoeslag cu 50 Florin mas. Pesey a inicia cu e registracion y na april proximo tur pensionado cu registra y cu ta bin na consideracion lo haya 200 Florin. E suma aki lo ta e pago retroactivo corespondiente na e prome cuater luna di aña. Y asina na Mei lo sigui cu e pagonan normal. Por ultimo, pero no menos importante ta e grupo di persona cu pa un incapacidad fisico no por traha y como tal ta ricibi un bijstand. E aña nan tambe ta conoce un aumento, e prome den 8 aña, cu ta di 100 Florin. Den conclusion, Gabinete Mike Eman a cambia e rumbo cu Aruba tabata riba dje den direccion di empobrecemento social. “Nos ta dunando oido y poniendo pleister caminda mester y unda cu por cura, nos ta cura.” Pa ningun hende mester keda e duda cu futuro di nos poblacion ta e compromiso principal di gobierno aki. Manera a priminti, ta cumpliendo tambe. Ta transformando Aruba den un isla di cinco strea y esey ta conta tambe pa e bienestar social y financiero di su hendenan.

Comentarionan (3)Add Comment
miho laat cu nunca
February 19, 2013
74.82.68.33
Votes: +1
...

Bo no por solutiona tur cos manera cu tover stok "magic stick" mas Val laat cu nunca por lo menos nos a hanja un alivio cu nan tapa e solo cu ta kaba cu nos papia ki bo kier abo no sa ki d**or hende mester a pasa den pa sobrevivi tur dia danki na e dede cu a tapa e pida solo por Hala rosea di alivio por resta cen pa come.

Crudo
February 19, 2013
201.229.17.32
Votes: +0
...

Aruba tin pobresa na gran escala,si ta asina e choller nan tambe anto ta bon caminda nan ta.y e adicto nan tur e cosnan aki ta motibo di cu no tin trabow y opleiding nan cu ta sigura trabow,Mi ta duna @colochi razon bo no por tapa solo cu un dede...its an illussion...

colochi
February 18, 2013
201.229.87.127
Votes: +0
...

Abo ta purba di tapa solo cu un dede !!!!

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter