Friday, 31 October 2014
Benny Nisbet(PPA): “Aruba mester duna respet y exigi respet pa nos pais den reino Hulandes !! Print E-mail
Friday, 15 March 2013 10:21
DSC_2063
Desaroyo estatal a sina nos cu cambionan importante …cambio di profundidad NO ta bini facil. Kada pueblo cu a worde colonisa …mester a pasa den nan propio proceso pa nan a logra e cambio cu nan a considera nan Libertad, pa Aruba esaki ta worde considera e logro di acuerdo na 1983 cu tabata un Independencia acopla na un Status Aparte pa e periodo di DIEZ ana.  

Historia ta sina nos cu politiconan cu a vota pa e Independencia aki …..mester a kana e caminda di Canossa y firma e protocol 93 pa nan por a logra pa kita e fecha di Independencia cu tabata 1 januari 1996 for di den Statuut. Esey a alarga nos Status Aparte di tal forma cu ainda nos pueblo ta bibando y saboriando nos Status Aparte.

E proceso Estatal di Aruba ta hopi torbulente pero tambe hopi interesante…..! Den decada 40 despues di guera Naciones Unidas a procloma e derecho di Autodeterminacion di kada pais cu a worde coloniza. Rapport van Poelje a worde accepta pa tanto Aruba, Corsow y Hulanda como e soluccion di e tempo ey, pero ora di ejecuta esaki Hulanda a bini cu un Ley di Reino cu tabata duna Corsow 12 asiento y Aruba 8 asiento, locual NO tabata conforme e promesanan hasi. AVP a accepta e INTERIMREGELING contra conseho di sr. Juan E. Irausquin y sr. Porfilio ‘fichi’ Croes y acceptanto e interimregeling aki AVP encabeza pa sr. Henny Eman a bira e tata di e Federacion Antiyano den cual Corsow a hana 12 asiento y Aruba 8 asiento algo cu No tabata acceptable pa Aruba y e motibu cardinal pakiko den decada 70 porfin un proceso nobo a inicia.

DERECHO DI AUTODETERMINACION !!

E tempo ey e derecho di autodeterminacion segun expertonan hulandes tabata un derecho cu e totalidad di e Islanan tabatatin esta ‘ Antiyas Neerlandes’. E falta di e derecho aki tabata perjudica Aruba den su proceso pa bandona e Constelaccion Antiyano. Pero tambe mester tene cuenta cu e cambio den e concepto di e derecho di Autodeterminacion ! Entre 1948 pa 1973 Naciones Unidas su resulocion tabata dicta cu ora un pais hasi uso di su derecho di autodeterminacion E tabata por a boga solamente pa INDEPENDECIA !! Esaki ta conoci como e Interpretacion LIMITA di e derecho di Autodeterminacion! Na 1973 ora Naciones Unidas a cumpli 25 ana nan a expande e concepto aki cu locual a worde conoci como e Interpretacion AMPLIO di e derecho di autodeterminacion…y den practica tabata nifica cu e pais cu a worde colonisa por a usa su derecho di autodeterminacion pa un ‘variacion’ di alternativa.!!

Na 1981 a worde teni e prome Conferencia di Mesa Redonda di e periodo nobo. Un delegacion di Aruba a representa nos pueblo y mi tabata e honor di por a representa partido PPA hunto cu sr. Maximo Croes Q.E.P.D. e tempo ey Lider di PPA y Ing. Virgilio Kock Lider di fraccion den parlamento. Ta durante e Conferencia aki ….pa e prome vez e derecho di autodeterminacion di Aruba a worde re-conoci. Pesey pa PPA e conferencia di mas importante ta keda e Conferencia di Mesa Redonda di 1981, pasobra Sin e logro aki ningun acuerdo lo tabata posibel na 1983.

E conferencia di Mesa Redonda na 1983 a duna como resultado un Independencia pa worde ejecuta dia 1 di Januari 1996, accopla pa un Status Aparte pa DIEZ ana….anto SIN garantia pa e INDEPENDECIA.

Pero Aruba a keda lucha y a logra pa kita of los e Independencia for di nos actual Status Aparte un logro di Gabinete Nelson Oduber forma pa MEP-PPA=ADN, gracias na e logro final aki ….Aruba tin un Status Aparte pa e periodo cu NOS pueblo scoge pele…Pasobra esey ta libertad di nos pueblo…..nos derecho di autodeterminacion y NO di e Hulandesnan cu tur respet pa nan.

Status Aparte na 2013 ! Aruba mester usa nos instrumento economico pa garantisa progreso pa un y tur !!

Awe ….Aruba tin su Status Aparte……esta como pais Soberano den Reino Hulandes …..pa e periodo di 27 ana !! E pregunta cu nos pueblo Arubano mester hasi su mes ta ….SI gobernacionan a usa e ‘Libertad’ aki pa mejora bida di e pueblo Arubano den su totalidad. Y si no ta keda un espacio hopi amplio pa nos como pueblo ‘realmente’ por papia di un PROGRESO pa UN y TUR.

Con nos huzga algo asina ?

Pa PPA esaki ta primeramente den e ‘aerea’ di Ensenansa….PPA ta hopi critico…nos ta sinti cu NO tin suficiente atencion NI suficiente Inversion den Ensenansa den e periodo di nos Status Aparte. Cu Aruba den su 27 di Status Aparte a cumpli solamente 1 vez cu e criteria di Naciones Unidas pa invert minimalmente 6% di nos entrada Nacional na Ensenansa.

Pa PPA esaki nos ta mira den e forma cu nos Entradanan Nacional ta worde reparti. Na Aruba esaki ta hopi cla…Un grupito di Rico….un clase mediano cu ta bai atras tur dia….y un massa grandi cu mester biba di apenas …… un salario minimo of un poco mas…..Tur esaki basa riba un sistema di CPI (Consumer Price Index) cu ta crea pobreza y ta mantene pobreza. ILO a propone Aruba pa cambia e sistema aki pa e sistema di NAWI cu ta un sistema cu ta ‘garantisa’ nos pueblo un progreso pa UN y TUR !!

PPA ta sinti y ta nota cu NGO’s cu ta labora riba cierto tereno cu gobierno No ta organisa pa hasi….NO ta ricibi e sosten financiero y di expertisio necesario di gobernacion, consecuentemente esaki tin un effecto riba nos sociedad…

Y asina nos por continua….

Un situacion economico cu ta basa riba UN PILAR ECONOMICO sin cu partidonan politico dedica realmente atencion pa diversifica esaki……cu e instrument di tanto nos ‘autonomia Insular’ logra na 1954 como nos Status Aparte logra na 1986.

PPA ta conclui cu e uso ‘positivo’ di nos Status Aparte pero tambe e respet cu nos mester duna pa nos por ricibi ta larga hopi di desea. PPA ta kere den un Aruba cu su Status Aparte pero cu un politica responsabel ….dentro di Presupuestonan realistic …..cu por garantisa un sociedad realmente liber dentro di e significacion di nos Status Aparte.

Finalmente PPA kier reconoce e nos grandinan dentro di e lucha pa Aruba su Status Aparte……Henny Eman(Q.e.p.d.) di AVP cu ta parcialmente responsabel pa e Autonomia Insular pero na mes momento a bira tata di e Federacion Antiyano.

PPA kier reconoce e epoca di sr. Juan E. Irausquin(PPA) q.e.p.d. cu a dicidi di dedica atencion na e desaroyo social-educacional y mas cu tur Economico di nos Isla/Pais y a logra cu awe E ta worde recorda como e Tata di nos Turismo y e Motor di nos Economia. PPA ta reconoce tambe e labor y contribuiccion grandi di sr. Gilberto Francois ‘Betico’ Croes         (MEP) cu a duna un contribuiccion cu a conduci na e Status Aparte na 1986 y e Independencia na 1996 cual e ultimo aki a worde cambia bao Liderato di sr. Nelson Oduber. No kabe duda cu e ‘perseverancia di sr. Betico Croes q.e.p.d. a contribui cu Aruba tin su Status Aparte awe !!!

PPA ta felicita henter nos pueblo Arubano cu celebracion di nos Status Aparte…y nos dia NACIONAL…..! Celebre na grandi pero tuma e tempo pa analisa e Aruba awe y puntra nos mes Si nos mester di cambio y adaptacion pa mejora e nivel di bida di henter nos pueblo y generacionan cu lo sigui nos.

Comentarionan (1)Add Comment
kommer en kwel
March 15, 2013
201.229.85.79
Votes: +0
...

Benny,
Respect is, net als vertrouwen, een kwaliteit die je niet kunt eisen of afdwingen. Je moet het verdienen!

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter