Friday, 19 December 2014
Minister Oduber a celebra 30 aña di existencia di Oficina di Turismo di Aruba na Colombia Print E-mail
Wednesday, 27 March 2013 17:20
Comparti

IMG 8746

Durante estadia di Minister Otmar Oduber na Bogota, Colombia, caminda el a sostene diferente reunionnan importante cu resultadonan hopi positivo pa Aruba, tambe e tabatin e placer di celebra e 30 aña di existencia di ATA na Colombia.

E celebracion aki a tuma lugar na cas di Embahador di Reino Hulandes na Bogota, Robert van Embden y su señora Maria Estele van Embden-Laguna y a conta cu presencia di diferente partnernan di nos isla na Colombia. E mandatario a gradici e embahador y su señora pa a habri nan cas pa e bunita recepcion aki celebrando 30 aña di existencia di Oficina di Turismo na Colombia, igualmente el a yama bon bini na e invitadonan special di e anochi. Minister Oduber a mustra riba e hecho cu e palabra Aruba ta pone hende pensa riba beachnan grandi di santo blanco, lama blou y solo. Un lugar magico caminda “nos hendenan di diferente cultura y cu conocemento di diferente idioma lo duna bosonan e bon bini cu sonrisanan amigabel y un tradicion di hospitalidad”. Dunando un poco mas informacion, Minister di Turismo, Transporte y Labor a conta cu nos “Isla Feliz”ta duna e bon bini na mas di 1.5 miyon bishitante di henter mundo cu ta yega nos isla pa disfruta di un cantidad di actividadnan riba tera y lama, cu ta disfruta di e variedad y calidad gastronomico di 200 restaurant, bishita museonan, asisti na diferente demostracionnan di arte y cultura, goza di anochinan unico y relaha riba beach, disfrutando semper di e atencion di calidad halto y servicionan den sector turistico. “Durante e 30 añanan cu Oficina di Turismo di Aruba a bin ta presente na Colombia, e la prercura pa profesionaliza agentenan di biahe riba diferente areanan, lo cual a permiti pa Aruba consolida como un destinacion diferente, atractivo y di un porcentahe halto di repeat visitors”, Minister Otmar Oduber a duna di conoce. Mustrando e importancia di turismo Colombiano pa Aruba, e mandatario a indica cu den e 30 añanan aki cu ATA Colombia ta existi, nos isla semper a kere den e turista Colombiano, motibo pa cual semper a considera e pais aki como un di e mercadonan mas importante, realizando inversionnan eynan di te hasta un miyon dollar anual. Siguientemente el a comenta riba e desaroyo di nos isla den e 30 añanan aki, comentando cu nos isla a desaroya hopi y a consolida su mes den varios aspecto. Tanto sector priva como Gobierno a bin ta inverti hopi esfuerzo y fondonan pa Aruba sigui briya como un lider den Caribe, specialmente den e area di turismo, pero tambe pa eleva calidad di bida y promove energia alternativo. Specialmente den ultimo añanan Gobierno a bin ta inverti 670 miyon Dollar den proyectonan pa renova, rehuvenece y mehora calidad di bida di habitantenan, inversionistanan y turistanan. “Nos kier eleva e experiencia di e turista y nos ta logrand’e”, Minister Otmar Oduber a duna di conoce. “Esaki ta un momento pa celebra y medita riba tur e momentonan excelente di e 30 añanan aki. Bosonan ta un parti di e exito aki di Aruba na Colombia y nos ta felicita boso tur, specialmente ATA y su socionan na Colombia”, Minister Oduber a finaliza.

album album album
album   

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter