Saturday, 20 December 2014
Premier Eman contento cu reunionnan na Hulanda Empresanan Europeo ta mustra interes pa participa den EMA Print E-mail
Wednesday, 27 March 2013 18:09
Comparti

Eman - Marine  Foto CNico van der Ven  01 (1)

Prome Minister Mike Eman su bishita na Hulanda tabata hopi mas cu e celebracion di Arubadag. E mandatario, hunto cu su colega di Finanza y Utilidad Mike de Meza y otro partnernan, tabatin un agenda basta pisa di encuentronan relaciona cu e Conferencia di ‘Europe Meets the Americas’ (EMA), cu ta wordo teni na Aruba na cuminsamento di luna di mei.

Na Hulanda a organisa un seminario titula “Investment Opportunities in a Sustainable Aruba”, cu a wordo organisa hunto cu Carbon War Room y TNO unda cu participantenan a tende tur loke Aruba, miembro di Reino Hulandes, ta haciendo riba tereno di energia renobabel y e oportunidadnan cu esaki ta crea. Hopi enfasis a wordo poni riba e oportunidadnan grandi cu e maneho aki ta crea pa companianan di tanto continente Europeo como Latinoamerica cu kier crea lasonan comercial, unda Aruba ta hunga un rol tambe. Premier Eman y su delegacion a logra reuni cu e.o. un compania di excavacion hopi bon conoci, esta Van Oord Marine Ingenuity, cu ta un compania conoci na Hulanda y internacionalmente specialisa den trabounan di excavacion. Asina nan a traha riba e Islanan Palmas na Dubai, unda cu nan a traha dijknan, pero tambe viaductonan. Pa haya un bista mas cla, por bisa cu “Van Oord” ta un di e cinco companianan mas grandi di mundo, pa loke ta trabounan di infrastructura maritimo y di excavacion. Nan ta envolvi den construccion di waf, aeropuerto y careteranan. E meta di e encuentro cu gerencia di Van Oord tabata pa lanta nan interes den e concepto Gateway Aruba. Gabinete Mike Eman ta averiguando cual ta e companianan Hulandes y Europeo cu tin interes den e mercadonan grandi di Latino America – enfoca riba infrastructura y energia nobo – y cu alabes kier haci uzo di Aruba como un partner cu tin hopi conocimento den e area aki. Importante pa e rol cu Aruba por hunga como un forma di intermediario, ta cu e isla conoce e idioma y e cultura comercial Latino. Premier Eman ta mira hopi posibilidad pa e companianan grandi establece un sucursal na Aruba, creando cuponan di trabou pa Arubianonan profesional di e ramo cu por “deal” cu e clientenan di Latino America den nan mesun idioma y conociendo nan cultura. E aspectonan aki ta wordo poni riba agenda di tur e combersacionnan cu a tene na Hulanda, cual ta puntonan cu ta hunga un rol grandi den cualkier relacion di trabou. Premier Eman na final di e reunion a indica cu e area di Latino America ta mercadonan di economianan creciente y estableciendo nan oficina na Aruba mescos cu TNO a haci, e bentahanan lo ta hopi pa empresanan Europeo y esnan di Latino America. Ta e aspectonan aki tambe ta hala atencion di companianan manera KLM, NACO, van Oord, Shell, Haskoning, pa participa den e Conferencia di EMA pa saca mas tanto probecho comercial pa nan empresa. Den e varios encuentronan cu e delegacion di Aruba a tene na Hulanda, a conclui cu tin un lista di casi 25 compania cu a mustra interes pa participa den EMA. Mientras cu di otro banda, Gobierno di Aruba a aserca companianan grandi di Latino America tambe cu e mesun argumentonan di pakico ta importante e concepto cu Gobierno di Aruba ta presentando, pa bira e brug entre e companianan di e dos continentenan. No solamente tin delegacionnan a biaha caba pa Colombia y Panama, pero tambe e Embahadornan di Reino den region ta haciendo nan parti, promoviendo e encuentro grandi di EMA cu lo tuma luga den e prome siman di luna di mei na Aruba. Na mesun momento, a invita Embahadonan di Reino Hulandes den region pa ta presente na Aruba durante EMA cu e meta pa nan pone nan mes na altura di tur loke ta pasando, y sigui construi riba e concepto di Gateway Aruba. “Mirando tur esaki, mi ta spera cu na luna di mei, durante e Conferencia di EMA, nos lo pone e fundeshi indiscutibel di e di tres pilar economico pa futuro di Aruba.”

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
Comparti
 

Connect with Us

Newsletter