Thursday, 21 August 2014
Minister Ing. Mike de Meza: “San Nicolas lo haya un joya di parke recreativo na Lago Heights” Print E-mail
Wednesday, 27 March 2013 19:35

IMG 5068

Aruba ta conoci pa tin varios luga cu ta relaciona directamente cu nos herencia cultural y San Nicolas sigur no ta un excepcion, mirando e gran importancia cu e districto aki a y ta nifica pa nos pais.

Cu esaki den mente, Minister di Finanzas, Comunicacion, Utilidad y Energia, Ing. Mike de Meza, ta anuncia cu un di su proyectonan ta cuminsa, e un Parke Recreativo na Lago Heights, of miho conoci como Lago Heights Hill Park, cu ta proyecta pa tin un inversion di 800 mil florin. E compania Van Kessel Construction, cu ta uno conoci pa nan gran experticio y calidad di trabou, lo ta na encargo pa ehecuta e proyecto aki. Aunke e nomber di e parke oficial no ta ainda confirma, sigur e ta uno cu lo duna merito na tur e baluartenan di San Nicolas, cu a contribui enormemente na nos cultura y economia. “Mi ta hopi orguyoso di por mira cu e gobierno aki lo realisa un Parke Recreativo na e famoso subida di Lago Heights, unda cu semper e tabata un area di onkruid. E Parke Recreativo aki tin como meta pa trece e famianan hunto, unda cu nan por bin pasa dia y disfruta di nos naturalesa, trankilidad y ambiente, como tambe un area pa cana y haci movecion. Nos muchanan tambe por bin y hunga, ya cu lo percura pa tin un bon cura pa evita cualkier incidente, mirando cu e caminda ta hopi cerca y tin hopi trafico. Na e parti ariba lo crea un veld di recreacion y nos lo mantene e matanan pa duna sombra y toke tipico. E area aki tabata conoce como ‘naked city’ y awo nos ta bay convertie den un parke dedica na tur esunnan cu a biba akiriba. E ta un manera pa duna merito na e bida socioeconomico di nos pais y sigur ta contribui na e infrastructura general di Aruba, specialmente San Nicolas”, e mandatario a expresa. Segun e plannan, e parke aki mester ta cla den un periodo di 4 luna y tin un cueba tambe, cu lo haci limpi y conserv’e pa e bishitantenan por bishit’e. Tambe lo tin un voetpad, luga pa haci diferente ehercicio y lo tin e brug, conoci como brug di Lago Heights, cu hopi hende lo ta sorprendi pa mira bek, ya cu lo embeyece esaki completamente y dun’e iluminacion. Otro atraccion cu e parke lo tin ta, e trapi riba Dr. Schaepmanstraat te na e subida di sero y lo percura pa mantene esaki mas natural cu ta posibel. Mas cu claro, lo percura pa presupuesta tambe un plan di mantencion completo y San Nicolas y pueblo di Aruba completo, lo por ta orguyoso di tin un joya di parke, cu lo tin un bunita funcion tambe den e temporada dushi di Pasco, unda lo dorna henter e luga cu luz, treciendo un ambiente di Pasco unico. Esaki sigur lo ta un joya di proyecto pa e bario di San Nicolas, unda cu famia, amistad of conoci por bini hunto y disfruta di nos parke recreativo na San Nicolas. Fin.

album album album

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter