Tuesday, 21 October 2014
Pa prome biaha den mas cu 50 aña Un minister a pasa cambionan di ley laboral asina importante Print E-mail
Wednesday, 27 March 2013 20:04

Otmar Oduber002

Minister di Labor Otmar Oduber a logra despues di mas cu 50 aña pasa leynan laboral hopi importante pa mehoracion di nos forsa laboral. Ta trata aki di 5 cambio di ley supremamente importante cu a haya aprobacion di Parlamento entre december cu maart y cu den su mayoria lo drenta na vigor entrante 1 di april 2013.

Pa promer biaha den mas di 50 aña cu e Leynan Laboral a haya un cambio fundamental y positivo pa e clase trahador. Den e cuadronan di e 5 leynan laboral cu a wordo trata y apropa pa Parlamento, Minister Oduber a haya hopi importante pa e trahador por haya mas proteccion y seguridad na trabou. Cu esaki como meta principal a trece cambio den e Ordenasa Laboral, unda cu ta sali di e punto di bista di flexibilidad pa reglanan encuanto e condicion di trabou pa loke ta trata e orarionan di trabou, oranan di descanso y dianan di fiesta. Minister Oduber kier trece cu e cambionan den Ordenansa Laboral proteccion pa mas trahador posibel. Contrario na e situacion anterior caminda 60% so di nos forsa laboral ta haya proteccion di e ley aki, awor cu e aprobacion di Parlamento, e porcentahe aki ta subi te na 80. E limite salarial pa e trahador wordo protehi pa e ley di orarionan maximo cu anteriormente tabata Afl. 32.214,- pa aña, cu ta Afl. 2685, - pa luna, a aumenta te na Afl. 3209,20 pa luna. E proteccion pa e trahador riba su mes ta sumamenta importante y den cuadro ey Minister Oduber kier a atende cu e fenomeno di “Uitzendbureau”, reglando e situacion di “uitzendkracht” den ley. Esaki kiermen cu e posicion huridico di e trahador temporal ta wordo protehi bou di e ley di ordenansa laboral. Definicion di “Uitzendkracht” ta un trahador temporal, cu por wordo poni na pia di trabou pa un temporada cortico, na momento un trahador bira malo of den high season. Un di e elemento importante di e ley aki ta cu e “uitzendovereenkomst” entre e uitzendbureau (contratista) y e uitzendkracht (trahador) ta bira legalmenete un contrato di trabou. Esaki ta haci e ora cu e trahador por bai goza di tur e proteccion cu e ley ta trece cu ne. Tambe cambionan importante a wordo aproba den e cuadro di cambionan di ley den e Codigo Civil di Aruba, cu ta enfoca pa brinda proteccion na e trahador pa loke ta trata su contrato laboral. E cambionan aki ta sali na vanguardia di e trahador, creando asina mas posibilidad pa trabou y pa preveni problemanan di caracter social pa e comunidad di Aruba. Minister di Labor Otmar Oduber ta sumamente contento cu e resultadonan satisfactorio encuanto e aprobacion di e ultimo dos cambionan den ley laboral. Manera ta conoci e mandatario y su team di expertonan a traha pa casi 2 aña riba e diferente posibilidadnan pa trece cambio den nos leynan laboral. Finalmente diamars a logra cu tur cinco leynan laboral cu ta sali na beneficio di e clase trahador a wordo aproba pa por drenta na vigor desde 1 di april di e aña aki. Un cambio sumamente positivo pa e trahador ta e reglamentacion di e Ley di Salario Minimo. E cambio di e Ley di Salario Minimo ta encera cu desde awor no por conta entradanan cu ta deriva di e tips ni tampoco "loon in natura" pa calculacion di e salario minimo. Tur tipo di componenentenan aki mester bin adicional riba e salario minimo. Igualmente e mandatario a introduci un ley completamente nobo. Idea tras di e Ley di Aplicacion administrativo di leynan laboral ta pa duna mas responsabilidad y autoridad na inspeccion laboral. Minister di Labor Otmar Oduber a dicidi pa bin cune pa ta mas efectivo den e forma di controla y forza doñonan di trabou pa cumpli cu leynan laboral. Cu e aprobacion y introduccion die tur 5 cambionan den ley laboral riba 1 di april a logra un proteccion enorme pa e clase trahador pa tin e seguridad den trabou. E avance aki ta crea flexibilidad tambe pa e dunador di trabou pa por crea eficiencia y productividad na pia di trabou. Manera palabra Minister Otmar Oduber a splica cu na final di juni e reunionnan tripartidario lo continua cu e segunda ronda pa loke ta trata e flexibilisacion di leynan laboral y otro temanan cu a bin dilanti manera e calculacion di salario minimo. Minister di Labor Otmar Oduber ta felicita Aruba henter riba un logro cu tanto tabata spera pe.

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter