Thursday, 31 July 2014
AVP: Studiantenan di IPA a haci un bon trabou durante pasantia internacional Print E-mail
Monday, 15 April 2013 17:36

DSC03337

Diabierna anochi e studiantenan di tercer aña di IPA a duna un bunita presentacion di nan pasantia internacional. Mi persona tawata presente na e presentacion di St. Maarten y di Peru. Cu hopi entusiasmo e studiantenan a conta di nan experiencia di comienso te final y e investigacionnan cu nan a haci riba tereno di enseñansa y cultura.

Loke tawata remarcabel ta cu cada pais ta confronta casi e mesun retonan den enseñansa cu Aruba, pero e asercacion ta varia di pais pa pais. Loke mi por bisa di e presentacionnan y loke e hendenan presente por a observa ta cu Aruba tin hopi conocemento y herment in place, pero hopi biaha e ehecucion di loke nos a siña no ta wordo realisa of cu nos no ta consistente. Un ehempel ta “project onderwijs of thematisch onderwijs.” Di tempo cu mi persona a cuminsa traha den enseñansa na 1975 nos a traha cu “project onderwijs” bou di guia di PDB e tempo ey. Ya caba “project onderwijs” ta wordo duna den enseñansa preparatorio y sporadico e tawata wordo duna den enseñansa basico. Den e plannan di inovacion di Priepeb e intencion tawata pa traha cu “projectonderwijs” y pa amplia e curiculo unda cada area di formacion di e mucha lo a haya atencion (enseñansa holistico), pero lamentabelmente hopi di e plannan aki no a wak lus di dia. Hopi di e paisnan cu e studiantenan a bishita ta traha cu e sistema di “project onderwijs.” Loke a wordo treci dilanti tambe ta e rol cu cultura ta hunga den enseñansa. E area cultura ta den e curiculo di scol y e conscientisacion y e cariño pa e cultura di pais ta hopi importante. No tin espacio pa diferente aspecto di cultura bay perdi. E observacion aki a haya hopi atencion durante di e presentacionnan y e ta algo pa pais Aruba cuminsa introduci y promove. Un otro observacion tawata e idioma di instruccion di e paisnan y con e paisnan a maneha e problematica aki. Na final tur presente a wordo invita pa bishita e exposicion di e materialnan cu e studiantenan a trece di a paisnan unda nan a bishita un luna largo. Mi kier a felicita e studiantenan pa e bon trabou cu nan a desplega den exterior y desea nan tur hopi exito cu nan estudio den futuro.

Comentarionan (1)Add Comment
TE
April 15, 2013
201.229.28.51
Votes: -1
...

Mi ta contento di lesa e stuk aki. Mi ta un di e studiantenan cu a haci e presentacion y mi ta spera cu den futuro Aruba lo por haci cambio den su enseñansa. Cambio semper ta pa mihor y cu cada rato mester evalua y pa asina mehora nos enseñansa.

Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter