Sunday, 26 October 2014
Minister Hooyboer-Winklaar: Obranan bunita cu ta sirbi pa habri combersacion riba un problematica actual Print E-mail
Tuesday, 16 April 2013 16:38
DSC_2063
E siman aki Minister Michelle Hooyboer-Winklaar a participa na apertura di e exposicion di e di 12 Competencia di Obra y Arte Recicla di Aruba Hotel and Tourism Association, AHATA. E entusiasmo pa e competencia, cual tin shete categoria di participante - pa scolnan: kleuter, klas 1 pa 3, klas 4 pa 6 y scolnan secundario y pa individual amateur y profesional, como tambe grupo - ta crece cada aña mas y mas.

Segun Vanessa Rasmussen, kende ta representa e comision di medio ambiente di AHATA, ta bisa cu particularmente e categoria di participante individual a conoce un crecemento e aña aki y tabatin registracion drentando for di december 2012. El a splica cu tin un enfasis riba carton e aña aki y e ingeniero industrial cu ta yudando AHATA durante su vakantie cu e competencia e ultimo tres añanan aki, a wordo inspira pa e obranan pa trece diferente tecnica y ta ofreciendo workshop na scolnan y pa gruponan durante e periodo di e exposicion.

Como e titular di asuntonan economico, asuntonan social y cultura, e ta gusta bishita exposicionnan local y ta promove activamente nos artistanan, Minister Hooyboer-Winklaar a conclui despues di bishita e exposicion cu esunnan cu a traha e obranan a desplega hopi creatividad. E obranan aki ta sublime y por para banda di cualkier piesa di arte, e mandatario a subraya.

Minister Hooyboer-Winklaar tabatin hopi elogio pa e iniciativa di AHATA y e participantenan kende ta contribui activamente na conscientisacion tocante reciclahe y cu nan obranan ta habri e combersacion tocante e problematica actual di desperdicio y con pa yega na un isla sostenibel.

Gobierno di Aruba ta enfoca hopi riba "green" y sostenibilidad y exposicion y competencia di AHATA ta fit den e cuadra y maneho aki y ta motiva nos comunidad pa pensa mas structura tocante e tema aki, segun Minister Hooyboer-Winklaar. “Esaki ta parti di nos futuro, unda cu nos hendenan ta pensa riba e retonan cu nos tin y con pa uza materialnan atrobe, pa asina contribui na crea e sostenibilidad cu nos ta desea”, asina e mandatario a añadi.

Minister Hooyboer-Winklaar ta di opinion cu por crea e oportunidad pa presenta algun di e obranan na scolnan y asina hiba e combersacion tocante e situacion di nos isla, nos costa y nos medio ambiente na un forma interactivo.

Vanessa Rasmussen y Minister Hooyboer-Winklaar ta invita tur hende bishita e Exposicion di Obra y Arte Recicla na Cas di Cultura di dialuna pa diabierna, te cu dia 26 di april. E orario di apertura ta 2or pa 6or di atardi y entrada ta gratis.

Pa registracion y informacion tocante e competencia, como tambe pa haci contribucion como sponsor, por tuma contacto cu Vanessa Rasmussen na AHATA, telefon 5822607 of email vanessa@ahata.com">vanessa@ahata.com.

E exposicion y competencia ta cera dia 26 di april cu e anuncio di e ganadonan y entrega di premio na Cas di Cultura.

dowers dowers dowers
dowers dowers dowers
dowers dowers dowers
dowers   

Comentarionan (0)Add Comment
Duna Comentario y/of Comparti riba Social Medi
 
  smaller | bigger
 

busy
 

Connect with Us

Newsletter