| Santa Rosa su Mercado di productonan local ta uni cu Carubbean Festival |
 |
 |
| Tuesday, 04 September 2012 19:28 |
|
Santa Rosa lo bay pariba, ya cu e tan gusta mercado di Santa Rosa lo forma parti di e celebracion semanal di Carubbian Festival na San Nicolas riba dia 6 y 27 di september. Den e forma aki Santa Rosa su mercado lo ofrece productonan local mas serca di e consumidornan pariba di brug y alavez dunando sosten na economia di San Nicolas. Santa Rosa su grandioso mini mercado lo ta presente pa prome biaha na Carubbian Festival cu diferente standnan bendiendo cumindanan crioyo manera pisca fresco y carni di cabrito riba grill y tambe diferente sopinan como tambe e famoso sopi di lionfish. Lo tin diferente boca dushi manera chuculati di pinda, raspao, gingersiroop, honing local y un surtido grandi di bolo. Remedi di tera, pica den coco, batido di sorsaca, tamarijn, papaya y nuni tambe lo tin na benta. Pa e vegetarianonan lo tin un stand special cu un surtido amplio di snacks, sin lubida e standnan di mata di fruta. Tur esaki na prijs local manera Santa Rosa ta conoci pe. Hunto cu e mini mercado di Santa Rosa, bishitantenan por disfruta di e dushi ambiente carnavalesco di Carubbian Festival, cu bandanan local manera The Sailors, Tipico Ola Tropical y e banda popular Glen y Gang di Bonairo. Trahenan carnavalesco colorido lo dorna e cayanan di San Nicolas, pa asina por wordo admira dor di turistanan y localnan. E iniciativa pa combina Carubbian Festival cu e grandioso mercado di Santa Rosa ta bin cumpliendo cu e visionnan di Minister di Turismo, Transporte y Labor, Otmar Oduber, kende for di inicio a lucha pa engrandece economia y turismo na San Nicolas, como tambe sostene agricultornan y criadornan na Aruba. Pueblo di Aruba completo ta keda cordialmente invita pa bin disfruta di un dushi mini mercado di Santa Rosa combina cu Carubbian Festival riba dianan 6 y 27 di september cuminsando for di 6or di atardi pa 10or di anochi. |
Mustra/Kita e formulario di comentario
