Cu un tremendo Blow Out Sale, cuminsando dia 29 di augustus proximo, Insel Air ta celebra cu cinco aña pasa e la start cu su prome vuelo. E Blow Out Sale lo cuminsa dialuna 29 di augustus  den marduga di diadomingo pa dialuna, 1 minuut pasa di diesdos y lo continua te cu diaranson 31 di augustus 2011, 12'or di anochi.

Pa celebra su di cinco aniversario Insel Air ta anuncia un tremendo Blow Out Sale di tres dia. “Tur hende sa tur aña di nobo cu lo bini un oferta  den cuadro di nos aniversario”, asina Edward Heerenveen, Chief General and International Affairs a bisa, “e aña aki nos lo organisa un tremendo celebracion di cinco aniversario na tur nos destinacionnan. Ticket ta bay ta  obtenibel na tur oficina di Insel Air cu ta bende ticket, nos website y tambe tur otro punto di benta di ticket, manera agencianan di biahe.  Ta nos aniversario y ora ta trata di bo di cinco aniversario bo ta bay den grandi”.

Pa cada ticket bendi e aerolinea lo haci un donacion di  nafls. 1.00 na Insel Air Community Fund (Fundacion pa Comunidad). Na final di e Blow Out Sale Insel Air lo regala na e Community Fund, dos biaha e suma cu a wordo haci como donacion.

Insel Air Community Fund a wordo establece na aña 2007 y su focus ta riba hubentud, deporte , cultura local, educacion y servicio pa comunidad. Tur aña Insel Air ta sponsor diferente eventonan  cu ta varia for di eventonan cultural grandi manera, carnaval te cu competencianan di domino y flie cu ta wordo organisa  localmente. E aerolinea ta hopi pro activo riba e tereno di  ponemento y ta di opinion cu pa crea un miho comunidad esey por sosode solamente  hunto cu e comunidad cu ta wordo sirbi.

“Ponemento ta un bon manera pa keda cu contacto y interes den nos  pasaheronan,  nan famia , amigonan i comunidad” segun Heerenveen. E aerolinea  cu  tambe ta un sponsor orguyoso di hopi teamnan local di hubentud, ta di opinion cu awor  ta tempo pa cuminsa promove e Community Fund un tiki mas.

“ Pa duna algo bek na nos comunidad, nos ta bay regala un florin Antiano pa  cada ticket cu nos bende durante e Blow Out Sale, na e Community Fund y despues di e benta Insel Air lo duna dos biaha e montante cu a wordo bendi” , asina Albert Kluijver,  CEO di Insel Air a bisa. “Djis despues nos lo anuncia pa cua bon causa e Community Fund lo haci un donacion grandi”.

Banda di duna algo bek manera ariba menciona na e comunidad cu e ta sirbi,  Insel Air cu normalmente no ta duna Insel Star Miles riba ticket cu wordo bendi den oferta  lo haci un excepcion den cuadro di su di cinco aniversario.  “Durante e oferta aki nos lo duna Insel Star Miles riba tur ticket. E sistema di Insel Star Miles ta duna cliente e posibilidad pa spaar pa ticket gratis y otro ofertanan.” Jurgen Lippinkhof, Chief Commercial Officer a agrega. “Den futuro cercano nos lo agrega e posibilidad pa cliente tambe por haci donacion di miles na e Community Fund.  Na e manera aki nos ke duna nos clientenan e oportunidad  pa haci donacion na e comunidad via di nos Fundacion”

Ticket ta bay ta obtenibel  “online”  y na tur Insel Air su puntonan  di benta, manera oficinanan di Insel Air cu ta bende ticket y agencianan di biahe. Ticketnan cu a wordo cumpra durante nos Blow Out Sale ta valido pa biaha te cu 10 de december 2011.

Clientenan cu publica nan ticket cumpra durante e Blow Out Sale riba nos pagina di Facebook tin chens di haya un ticket regalo di  InselAir.

Lippinkhof a bisa: “For di dia cu nos a start cu nos pagina di Facebook,  primeramente como un forma pa optimalisa nos relacion cu nos clientenan,  ta bon pa mira con e clientenan ta participa. Hopi biaha nos ta regala ticket, nos ta duna conseho di biahe y tambe informacion riba e destinacionnan cu nos ta bula.  Nos pagina di Facebook a bira un espacio tambe caminda  preguntanan di nos clientenan ta wordo contesta y  preocupacion di clientenan ta ser atende.

InselAir cu  a plania un conferencia di prensa riba dialuna 29 di augustus proximo,  ta sperando riba e gran dia  di Blow Out Sale y ta  spera cu tur hende ta haya e ticket cu nan ta desea.

Algo tocante Insel Air

Insel Air, situa na Corsou, a haci su prome vuelo  dia 28 di augustus 2006 pa Aruba y Boneiro. Despues di su prome vuelo  pa Aruba y Boneiro,  a agrega e destinacion Las Piedras.

Na 2007,  St. Maarten, Paramaribo - Surnam, Port au Prince- Haiti, Sto. Domingo y Valencia - Venezuela  a ser agrega.

Nos a bula e destinacion Trinidad entre  augustus  2007 y februari 2008.  Den 2008 Miami a wordo agrega  como e prome  destinacion di Estados Unidos  sigui pa San Juan den 2009.

Den 2010 a agrega e destinacion Kingston, Jamaica, sigui pa Medellin, Colombia, Charlotte, USA y Caracas, Venezuela  den 2011.

Awendia Insel Air  tin 15 destinacion,  46 vuelo pa dia i tur prijs ta ida i buelta.

E aerolinea ta focus riba experencia di biahe, siguridad i puntualidad.  Insel Air ta planeando  pa expande su experencia di vuelo  dor di agrega un comfort class riba su vuelonan  cu extra servicio cual  lo mehora e experencia di biahe pa su pasaheronan.

Comentarionan (0)

Mustra/Kita comentarionan

Duna Comentario y/of Comparti riba Social Medi