| Wowo di Pueblo: Parke Molina di Biento na Alto Vista Urirama? Si of NO?? |
 |
 |
| Wednesday, 23 May 2012 12:38 |
|
Cu e lugar ta sagrado pa Oracion na Kapel, i e molinanan lo produci sonido cu lo stroba e tranquilidad di esunnan cu ta bai hasi orashon eynan. Cu e panorama di e landschap (paisaje) lo wordo tapa of destrui i tur sorto di argumentonan ridículo. Tambe nos por a skucha di parlamentaria Xiomara Maduro, cu ta asina preocupa pe mericanonan cu tin mansionnan den Tierra del Sol cu nan valor di nan propiedad tambe lo perde 30% di valor. Pero ningún pero ningún no a preocupa i skucha e sklamacion di mayoría di pueblo cu si kier mira un solución pa e brandstofcluasule, di e famianan cu no tin propiedad pa perde 30% di nan balor, pero si tur luna tin cu lucha cu nan recibo di awa i coriente asina halto pa motibo di brandstofcluasule i cu cada bez ta mira menos cuminsa riba meza pa nan juinan. I e gobierno aki, forma pa gabinete Eman si, tur siman ta skucha pueblo, tur diasabra nos promer ministro Eman ta skucha dolornan i necesidadnan di nos pueblo. Tur siman ta cana den barrionan i mira Kiko ta e necesidadnan di e pueblo. Pa awe skucha líder di oposiion Evelyne Wever-Croes, bisa nos promer ministro pe bai kana den pueblo i skucha pueblo ta un ridicules di marca mayor. Esun cu tin cu bai bishita pueblo, ta e líder di oposición aki cu su comitivanan i chaparonenan. No bai bishita e famianan elite cu e ta forma parti di dje, pero bai bishita nos pueblo humilde, den barrionan pafor di Urirama. Bai bishita i cana den cas di pueblo di Noord-Madiki- Jaburibari-Sero Patrishi-Sabana Basora-Juanamorto etc, anto skucha e famianan aki. Anto bisa nan, cu MEP ta contra e parke di Molina di viento na Urirama, pasobra hendenan elite (millonario) por perde 30% di valor di nan cas, cu mericanonan cu tin mansión den Tierra del Sol según Xiomara, por perde 30% di nan valor di propiedad. Cu e bista bunita ta e motibo, cu MEP no kier pe parke aki bini, i ta pesei, boso mester prepara, pa paga 30% mas di brandstofcluasule. Bai splika e pueblo eyfor, si e parke di Molina aki no bini, mirando e desaroyo mundial di crudo i fuel oil, cu prijsnan no lo subi cu 30%, pero tur cos ta mustra cu e por subi hasta cu 500%. Awor por skucha líder di Oposicion bisa den programa di Tito Lacle, cu e ta contra di e parke di molina na Urirama, pasobra e por trese malesa pe barrio, pero si ta bisa, pa mande na San Nicolaas mande na Vader Piet, manera cu e hendenan di San Nicolaas, ta un bestia, no ta hende, mande San Nicolaas numa, pasobra ja e pueblo di San Nicolaas tin malesa di e molinanan, i duna nan mas. Increibel expressionnan asina, i menos precio pa un pueblo asina humilde manera San Nicolaas, cu Semper a carga Aruba su economía pa 60 anja door di Lago, cu tu su huma holor i contaminación te awe. I nunca pueblo Sanicolaas no a protesta, pasobra e tawata pan pa hopi famia i desaroyo di un país manera Aruba. Nos a biba i lo keda biba cu centro cuidad di Sanicolaas como un centro di negoshi i prostitución. Nos a acepte i ta biba cu ne, i te awe, hombernan i mujernan di tur rond Aruba ta bin busca placer i nunca nos a keha, pasobra e ta parti di Aruba tambe. Nos a haya un parke di molina tira den nos skochi, sin un dia puntra e pueblo di Sanicolaas si boso kier esei, nos a acepta e parke di molina, i nos ta disfrutando di su bunita bista cu a duna nos costa oeste. Ningún hende di e barrio di Weg Fontein a grita, cu nan valor di cas lo baha, cu e molina lo trese malesa pa nan, aki nos ta mira, cu partido MEP no ta importa San Nicolaas, pasobra si awe e líder di MEP ta bisa, cu e parke di Molina ta malo pa salud di hendenan di Urirama, anto Kiko e parke di molina di vaderpiet tin pa e habitantenan di Weg Fontein cu si ta biba hopi cerca di nan? Un cos ta sigur, cu gobierno di AVP i su promer ministro ta hasiendo tur ejercicio pa mantene e prijs pagabel pa e pueblo, i asina nos por a mira, cu e gabinete Eman, for di dia a sinta, nos a reclama nan derecho, di dividendo, di winstbelasting, mientrastanto gabinete Oduber di Evelyn Wever Croes, si a chica WEB/Elmar un suma di mas cu 250 miyon florin, na dividendo winstbelasting i voorschotten. Anja pasa e prijs di coriente tawata 53 cent pa kilowatt i fueloil na 95 dollars i awe e prijs ta riba 110 dollars pa fueloil, e gobierno aki a logra na mantene e prijs na 53 cent pa kilowatt, a pesar cu e prijs di fueloil a subi cu mas cu 17 dollars den un anja. I esaki ta danki na e molina di viento vaderpiet, cu por absorba 20% di fuel oil i otro eficiencianan den WEB cu por a logra di mantene e prijs pagabel, si no bin e segundo parke di molina, pa absorba WEB 40% di fueloil, sigur nos tur lo bai paga e prijs caro di brandstofclausule pronto, pasobra MEP i consorcio, no KIER mira solución den nos recibonan di awa/coriente. Pero si ta exigi gobierno pa baha e prijs di awa/coriente, aki e mascarada di hypocrecia a jega su fin. Ta keda nos como pueblo dicidi, i no laga un grupito pa razonnan político partidista i un grupo di elite, pa kita pan for di boca di bo juinan. Atentamente, Alberto R. Vrolijk Comentarionan (11)Mustra/Kita comentarionan ...
mi kier tende di mep, kiko nan ta bai hasi, den e proximo 4 anja, pa reduci brandstofcluasule pa nos pueblo. AVP nos sa caba, e di dos parke molina, e parke solar na aeropuerto, i e proyecto di gas. awor esei nos sa, cu avp tin cla ehecutando i den negociacion. kiko mep tin pa ofrece, esei nos kier tende???????
,
May 23, 2012
...
Shonan, puro bla bla bla. Hecho #1. Mulinanan di Vader Piet NO a BAHA nos recibo di coriente y awa manera a wordo primiti; #2. Director di Elmar y cierto staff, ministernan y parlamentarionan, nan salario a subi y pa Pueblo brandstof clausule a subi; #3. si bo no ta capaz di baha coriente y awa manera primiti durante campanja berde, Urirama TAMPOCO lo haci esey, es mas, mas nan ta bay chica e 'mulinanan cu ta traha energia di oro', pa duna mesun grupito menciona aki riba mas benificionan; #4. e mulinanan NO ta di Aruba, riba NOS tera y cu NOS biento Pueblo ta wordo EXPLOTA door di un grupo di macamba cu blessing di partido bochornoso berde; #5 e INEPTO macamba cu a gaba di Vader Piet y awor bisa cu e lugar no ta sirbi, a raai awor cu Urirama lo ta mihor. Tin hopi cabrito na Aruba cu ta cana riba 2 pia cu tin nomber di Arubiano.
,
May 23, 2012
...
Klik kinan pa lesa e information si tin affecto riba nos salud, si bo klik riba e link aki y bai mas abao unda bo lo lesa subtitulo "Impacts on people" prome cu boso duna boso opinion
 : http://en.wikipedia.org/wiki/H...oise_level
,
May 23, 2012
...
Prome cu nos bay ariba e molina di biento nos mester puntra nos mes ki effecto e mast nan di cellular tin ariba salud di hende y e biaha aki mi ta bay mas leu tur e artefacto nan wireless den nos propio cas. Nos por keda piki pieuw y grawata pa wak kiko por saca afo y bin cu excusa pa ta contra e molina nan di biento y pakiko excusa pasobra si nos wak e bijsluiter di hopi remedi cu tambe ta papia ariba e POSSIBEL effecto ariba otro organo nan den nos curpa. Puro spec*lacion y nada concreto loke ta haci spec*lacion y mas spec*lacion. Nos kier cu pa aki un par di aña corriente ta pagable of no?
,
May 23, 2012
...
Mi kier sa cu cada bez cu Evelyn habri su boca, e boroto cu sali ta hasi hende mas malo cu e boroto di 20 molina pareu.
,
May 23, 2012
...
Skirbi pa chaparita.Tempo di nos grandinan Aruba tabata yen di molina di biento no leu di cas sino na cada cas tabata tin uno. Nunca un di nos grandinan a bisa cu e molina a haci nan malo of a corre cu e pajaritonan. Al contrario tabata tin mas pajaritonan e tempo aya cu awendia. Y keremi e molinanan di e tempo aya si tabata hasi DESORDO no loke boso ta keha awendia. So boso grow up y sinja biba cu loke progreso di awendia ta trece pa boso. Boso no por kere cu boso ta disfruta so di e beneficionan y no e sacrificionan.
,
May 23, 2012
...
Loke hopi di esnan contra no kier realisa ta cu e crisis den mundo di petroleo lo bay keda bira mas grandi y rebaho cu lo bay yuda nos reduci prijs di awa y coriente no ta bay tin mas. E crisi mundial por bay bira te hasta un guerra den medio oriente y si esey bira e caso nos tur lo sufri ora bin scarcedad y te hasta pa esnan pa kende e prijs di coriente ta pagable pasobra si no no haya combustibel no por produci coriente tampoco. Si un dia nos no por paga coriente y of no tin coriente ta tur esnan cu protesta awe ta responsabel pa esey. E futuro di dependencia ariba crudo ta birando dia pa dia mas scur y si no no realisa esey of no kier realisa esey anto si e crisis aki bin ken nos ta bay c*lpa e ora, gobierno?
,
May 24, 2012
Duna Comentario y/of Comparti riba Social Medi |
Mustra/Kita e formulario di comentario
