| Dario Soemers: Seguridad y nos turismo |
 |
 |
| Sunday, 02 September 2012 21:20 |
|
Importante ta pa ora nos hanja nos confronta cu reto, ta pa wak con nos ta anda cu esaki y mas importante ta pa no perde for di bista con mas importante otro areanan di interes den nos bida ta bira ora un cay afo. Den e caso aki, si enberdad no tin solucion a corto plaza pa nos refineria, nos mester realiza con mas importante nos turismo ta pa nos isla y nos poblacion en general. Si e refineria bai, esaki mester significa cu nos mester pone mas prioridad ainda ariba nos industria di turismo y percura pa protehe mihor posibel, con nos por bin cu innovacionnan nobo y ingredientenan nobo con pa mercadeo nos turismo. Esaki no ta articulo pa eleva ningun politico ni ningun gobierno. Esaki ta un articulo na unda e bandera di Aruba ta presente den fondo y na unda berdad mester wordu bisa. E ta un articulo na unda ta duna Cesar loke ta di Cesar y bisando esaki mi mester admiti cu e gobierno actual su maneho den turismo ta hopi mas mihor di locual nos a custumbra cune den pasado. Sinembargo, esaki no kier men cu nos no tin preocupacion of reto. Preocupacion y reto tin hopi pero den e caso aki mi kier a enfoca solamente un rato ariba seguridad en particular den e mundo turistico. Mi mester a constata atrabez di e ultimo anjanan con un falta di seguridad y un crecemento den criminalidad ta un factor cu ta preocupante pa e sobrevivencia di nos turismo. Ta hopi preocupante pa experiencia e crecemento den criminalidad entre e hobennan di awendia y mas preocupante ta e area unda esakinan kier hiba nan operacion clandestino y destructivo. Si Aruba sigui victimiza su turistanan door di horta nan auto of kibra nan auto pa horta aden, comete atraco contra nan of sigui horta nan articulonan for di ariba beach of otro areanan turistico, nos mester realiza cu no solamente nos ta terrorizando nos turismo pero peor ainda, nos ta cometiendo terrorismo contra nos propio economia. Ya caba 80 porciento di nos poblacion, sea directamente of indirectamente, ta depende di nos entrada for di turismo. Awo, cu un potencial cierre di nos refineria, esaki lo bira hasta mas. Ta hopi importante tambe pa nos realiza cu seguridad no ta solamente e responsabilidad di nos gobernantenan of polis. Pa cuminsa e ta un tarea di nos tur y sobretodo, e ta un deber di nos tur pa reporta crimen na polis. Pa locual ta trata e hotelnan, e tendencia di e Gerentenan General di hotelnan ta di semper corta prome den e presupuesto di seguridad, especialmente ora maneho financiero ta rekeri medida, e prome caminda cu ta corta ta den seguridad. Ta un lastima pa bisa, pero tin algun hotel na Aruba cu consequentemente ta wordu confronta cu ladronicia, sea den nan parking lot, nan propiedad of areanan di nan beachnan pero nan no ta hasi nada pa incrementa y mehora e seguridad pa nan huespednan. E turistanan aki, tin biaha ta perde decenas di miles di dolar a consequencia di e fechorianan cu algun hoben criminal, cu no ta pensa mas leeuw ki danjo nan ta hasiendo nan nan mes un isla, futuro fuente pa nan mes y nan famia y hotelnan no ta hasiendo nada tampoco pa preveni cu nan huespednan ta bira victima di e anti-socialnan aki cada bez atrobe. Esaki ta e error mas grandi cu e hotelnan aki por comete y ta bira tempo tambe pa gobierno pone atencion na e falta di responsabilidad di e hoteleronan aki. Awo ta tempo pa nos pensa mas creativo! Awo ta tempo pa nos introduci un era nobo pa nos turismo cu no solamente ta e pilar mas importante di nos economia pero quizas hasta ta e unico pilar cu nos tin. Awo ta tempo pa nos busca ideanan nobo y innovativo na unda tambe nos mester envolvi polis y mehora seguridad den e areanan turistico di Aruba. Enfoca ariba nos seguridad y dune e balor cu hopi anja e no a hanja. Polis y seguridad no tei pa spanta turismo, no, al contrario, nan tei pa proteha nan y nan propiedadnan y percura pa Aruba keda cu un bon nomber den turismo di Caribe. Nos mester focus no solamente ariba “One Happy Island” pero tambe ariba “One Safe Island”. Polis y seguridad mester tei pa por hasi cu e turistanan aki por informa nan famia atravez di facebook, twitter etc di con dushi nan ta pasando nan vacacion na Aruba, mandando potret di nos dushi isla y hendenan pa tur nan circulo social. Nos no kier cu nan mester usa e media social aki pa informa nan famia, amigo y contactonan cu nan a bira victima di un antisocial cu ta jaag ariba turista y ta bira tempo pa nos cuminsa jaag ariba e antisocialnan aki y proteha nos turistanan y nos economia. Ta un hecho cu e industria turistico ta uno hopi fragil. Nos a experiencia e menasa ei un biaha caba y ta hopi isla den Caribe a perde nan entrada financiero principal for di turismo pa motibo di criminalidad cu tawata sali for man. Ban percura pa nos controla nos seguridad y garantiza pa nos mantene nos entrada financiero procedente di turismo como nos entrada principal. Nos mester por mercadea no solamente nos beachnan bunita, nos variacion halto di atraccionnan culinario, nos hendenan amable, pero mas importante cu tur cos, nos mester por mercadea “nos seguridad”. Den e mundo di awendia, cu tanto menaza cu tin alrededor di nos, ban forma e ‘nitch’ di seguridad ei den e mercado di Caribe, unda nos por garantiza nos turistanan un vacacion ‘tranquil y sigur’ aparte di tur e otro amenidadnan cu Aruba tin pa ofrece. No lubida cu vacacion no ta un necesidad, e ta algo cu hende ta escoge pa hasi pa nan por relaha den un ambiente ameno y sigur. Nos tin tur bon amenidad na Aruba, ban awo concentra ariba seguridad como e toke final den e producto cu nos ta brinda nos bishitantenan. UN ARUBA SIGUR TA BON PA NOS TUR Dario Soemers Comentarionan (7)Mustra/Kita comentarionan ...
wel wel, e good-for-nothing aki cu ta constata pa 3 anja caba cu tin bendemento di droga riba beach, (algo cu e sa pa mas anja caba foi su oficina den hancho di Hyatt), molester di OPC dilanti hotelnan high rise y delincuencia contra turistanan den area di hotel y Hotzone. Tur anja e ta constata y constata pero e no por bin cu solucion. E unico solucion cu e p** aki a logra ta esun di infiltra den e septico berde pa e hanja un puesto como constatador pa 11 mil pa luna. Fliet Soemers!
,
September 02, 2012
...
E berdad amargo cu niun politico tin e hombresa of weso di lomba pa bisa e PUEBLO di ARUBA !
1.Mas di 600 trahador di Valero directo lo perde trabow si mester swith pa un transhipment-mode. 2.E ripple effect financiero lo tin consequencia pisa pa nos sector bancario i priva unda cu un cantidad considerabel di hipotecanan lo core den cora i un cantidad grandi di casnan lo bay findishi. 3.Gobierno di Aruba mester segura i garantisa un termination settlement agreement pa tur empleadonan di Valero cu lo wordo afecta as per direct i otorga un tax exemption pa hisa e entrada di e final payment di e empleadonan. 4. Banco i gobierno mester institui un grace period (12-18 luna) pa "overdue/deliquent account" sea cu esaki ta di hipoteca of prestamo personal pa asina evita benta na findishi. 4a. Institui un fondo di garantia a.s.a.p ! Gobierno, lidera cu corahe awor i enfrenta e realidad, no pinta cos bunita pero ban uni awor i rescata nos pais !
,
September 03, 2012
...
Chambon y Ruben, sigi critica y rebaha ciudadanonan cu ta contribuiendo den e manera positivo cu nos dushi Aruba, mas boso hasi esaki mas grandi AVP ta bai bira y prepara bosa pa boso derota di 13-5
,
September 03, 2012
...
Pa constata algo, semper tin hopi sabi ta cana rond. Pero, pa realmente traha riba un solucion activamente,
concretamente y permanente, ta masha tiki tin ta cana rond y net nan, no ta wordo reconoci. Talk is cheap. Bo kier drecha mundo, cuminza cu bo mes.
,
September 03, 2012
Duna Comentario y/of Comparti riba Social Medi |
Mustra/Kita e formulario di comentario
