| Milton Delwin Gomez: Menosprecio y destruccion en vez di conserva y proteha nos medio ambiente y e salud di hende? |
 |
 |
| Friday, 07 September 2012 20:25 |
|
Esaki ta conta mescos y sin kita y sin pone pa cualquier cuidadano Arubano na promer lugar cu ta biba na cualquier sitio riba nos isla y cu ta sinti su mes liber y jama pa sostene un of otro causa cu e ta kere aden y pone su firma hunto cu otro firmantenan riba un lista pa protesta contra e eventual instalacion di molinanan di biento na Urirama o sea Alto Vista. Kiko ta e diferencia? Noord y vecindario definitivamente no “ta” di e norteronan so! E otro lugarnan riba nos isla tampoco “ta” di e habitantenan di e lugarnan ey so! Tur “ta” di nos como Arubiano na promer lugar! Como tal nos tur tin no e derecho so, sino tambe e obligacion moral civico y e deber sagrado pa proteha cualquier co-cuidadano den cualquier skina. Urirama o sea Alto Vista ta un lugar relativamente no mucho leu di nos tanto stima “Kapel di Alto Vista”, situa riba e sero di Alto Vista. Su alrededor sin mas ta un lugar historico, lugar y sanctuario di nos indiannan den pasado y e cuna di nos civilisacion cristian. E presencia di nos Kapel di Alto Vista hunto cu e imagen bunita di nos La Birgen di Alto Vista cu devotonan ta venera tur dia, estableci mas cu 260 aña pasa y e hecho di ta un centro di peregrinacion conoci tambe den exterior ta convertie y su alrededor den un lugar sagrado universal. Esnan cu conoce e lugar ey y cu verdaderamente y di curazon ta amante di historia, di nos medio ambiente y nos naturalesa den tur su esplendor ta describie como un lugar unico. E ta un fuente cu ta respira paz, trankilidad y harmonia. E ta un fuente di inspiracion, refleccion, meditacion, sanacion y cu ta duna forsa espiritual. E ta un regalo mas cu Dios a bendiciona nos dushi isla cune y cu merece debido cuido y proteccion y tambe di parti di gobernantenan, sin distincion di rasa, religion y color politico. Como tal cualquier persona of instancia cu hinka den su cabez pa cueste lo que cueste haci dañonan incalculabel, irreparabel y impagabel na e pida naturalesa unico aki y cu menosprecia su significacion y su historia cultural, simplemente pa por cumpli y disfruta di un ambicion y un obsesion personal of politico, instalando molinanan na e lugar ey lo keda marca y recorda como e enemigo y e destructor di nos medio ambiente y di nos naturalesa virgen alrededor di nos Kapel di Alto Vista . Interes general ta exigi pa e lugar aki keda intacto y no destrui! Definitivamente lo no por considera personanan asina como protectornan di nos naturalesa. No esey so! E lo por refleha ademas un falta grandi di respet, compasion y tolerancia en particular pa e devotonan. En corto un actitud condenabel y inaceptabel. Interes general definitivamente no ta wordo sirbi instalando molinanan cu ta bai costa nos pueblo alrededor di 200 miyon florin(¿), destrozando un lugar unico cu lo tin como resultado no baha e prijs di coriente y awa, pero mas bien pa juda stabilisa e fluho di coriente pa e sistema di WEB-nv y pa cumpli cu ambicion, obsesion y prestigio. Mester pone un STOP definitivo tras di tur actividad cu ta causa destruccion na nos medio ambiente , nos naturalesa, nos flora, nos fauna, e multiple y diferente parhanan, nos historia cultural, simplemente pa por gaba despues cu Aruba mundialmente ta number uno, pa locual ta trata minimalisa e cantidad di gas venenoso cu ta wordo produci riba nos suelo. Lo por tin e grandeza tambe di bisa den e mesun rosea cu a logra esey a costo di nos medio ambiente y nos naturalesa? Un otro aspecto di suma importancia ta e daño cu e molinanan por haci na e salud di hende. Segun mi te awor aki e opinionnan al respecto ta dividi. Tin cientificonan y expertonan ta pretende cu si nan ta dañino pa salud, otronan ta bisa lo contrario. Nos gobernantenan mester ta sumamente cauteloso pa aplica caulquier medida cu lo por haci daño na salud di nos cuidadanonan. Relaciona cu esaki mi kier referi na articulo V- 23 di nos Constitucion cu ta prescribi textualmente: “ Gobierno ta tuma medida pa promove e salubridad publico”. Cu otro palabra: sano huicio ta bisa cu gobierno NO por tuma medida cu lo por trece e salubridad publico den peliger! Si tin un minimo di risico cu lo por causa daño, gobierno den mi concepto cueste lo que cueste mester abstene su mes di aplica e medida cu inicialmente e tabatin intencion di introduci, irrespecto e compromisonan cu por a wordo haci caba. Ta aconsehabel pa nos ministro di Salubridad Publico sr. dr. Richard Visser tuma debido cuenta di e articulo constitucional cu mi a camba di menciona y percura tambe pa debidamente cumpli cu su motto: “ preveni ta mihor cu combati”. Por ultimo, mi ta desea di termina e articulo aki den e siguiente forma. Salud di hende ta bida. E ta un regalo di Dios. No por pone bida di hende como proefkonijn na merced di cualquier tipo di energia berde y menos aun di molinanan cu lo por haci daño na e hende. Na interes general di nos hendenan, ban respeta nos constitucion, ban respeta y proteha nos medio ambiente, cada pida di nos naturaleza cu tur su flora y su fauna den tur su aspecto. Tur ta regalonan di nos Dios Todopoderoso cu tanto nos mester gradici, stima y adora tur dia y tur momento. Milton Delwin Gomez Comentarionan (10)Mustra/Kita comentarionan ...
WiFi ta hopi HOPI mas peligroso cu e efecto di molina di biento.....y ariba esaki si e cientifico nan opinion no ta dividi y nan ta 100% di acuerdo. Mi no ta mira niun hende ta protesta y pidi SETAR y DiGi pa stop cu 4G y otro servicionan WiFi.....pero ya, "por dinero baila el mono" manera e dicho ta bisa......
Y tocante naturalesa di Aruba? Hey nos tur cu ta biba den un cas, ta bay shop den un mall etc. etc. ta c*lpabel di a rosa pida tereno y elimina un pida flora y fauna.....mi no ta wak niun hende basha nan cas abow y entrega nan tereno back na naturalesa...........pero tja, semper lo haya hende cu kier haya atencion y husa issue nan barata pa hasi buya 
,
September 08, 2012
...
Bay Lourdes na Francia wak na unda e Virgen di Lourdes ta e no ta strob a ningun devota pa bay y reza tranquil cu mas cu 100 rond di bo. Delwin where u be when Vader Piet.Miedo di cursa brug bin pariba!
,
September 08, 2012
...
Bay Lourdes na Francia wak na unda e Virgen di Lourdes ta e no ta strob a ningun devota pa bay y reza tranquil cu mas cu 100 rond di bo. Delwin where u be when Vader Piet.Miedo di cursa brug bin pariba!
,
September 08, 2012
...
Pakico pa norteronan y no pa sanicolaseronan cu si mester a biba den ambiente malo pa salud na benificio di tur e norteronan cu a gosa di e progreso di Aruba y awor cu progreso a yega den nan ambiente ta protesta . Awor si cu tur e norteronan a yena nan saco cu placa awor si mester stop progreso. Nan ta demostra un falta di solidaridad cu tur esnan cu si a wanta ambiente menos bon pa progreso di Aruba (progreso cu a yena saco di e norteronan). Si Gobierno pa motibonan politico para e projecto na Urirama anto mester desmantela Vader Piet pa e mesun motibo cu ta para projecto Urirama.
,
September 08, 2012
...
Ay si, awor si,.....awe ta tur di biaha a bira super devoto. Ta papia bunita di imahen bunita. Ta papia di La Birgen (Eh,...solamente ora ta cumbini nan!)! Si tin un persona awendia desprecia y lubida asina tanto, anto esey sigur ta nos mama stima,esta mama di nos senjor Hesucristo. Nos iglesianan mes por lo general ta masha hopi bashi mes awendia, corda nos Kapel di Altovista. Ta e mesun caranan bo ta keda bolbe wak tur ora bay. E ,,hetze,, contra di e molinanan aki ta uno puramente politico! E molinanan a para bira awor e ultimo ,,foyo di yerbe,, cu MEP ainda por a bin logra gara awor den su ansha pa laga e poximo eleccion bin un poco mas promer cu ley ta stipula. Den pasado MEP ya a logra esaki caba cu e ,,postema di OLA di Glembert Croes,, , pa despues MEP bolbe ripiti esaki cu e ,,racetrack,, te cu pa bay asina lew di scop porta di parlamento pa cana kibra drenta, kima auto y donder gobierno abow. Awe nan kier haci esaki cu e molinanan!
,
September 08, 2012
...
Full di Acuerdo cu tur e Ponencianan aki, Solo el Pueblo Salva el Pueblo.
,
September 08, 2012
...
Bon artic*lo. Tambe lo ta bon pa amplia tambe riba e responsabilidad di ciudadanonan. Ley no tey pa gobierno so pero pa nos tur. Pa plaser nos ta bai Palm Island y otro Kai. Ora di bai lama, ta gril, come na grandi y djey coba buraco y tira e carbon eybao y tapa cos. Botonan di placer cu no ta di bela. Barconan crucero. Uso di wave-runners. Asina aki nos tur ta c*lpabel y ta contribui na e destrucshon di nos naturalesa. No solamente wak gobierno pero tambe e pueblo.Gobierno mester duna bon ehempel, esey mester ta un echo y e ta esencial pa asina su pueblo hasi mescos. Asina ta: Aruba, ban hasi uso di naturalesa/beachnan cu "ta" di nos tur y cu nos a hanja fia di Dios, na un manera responsabel pa tur esnan cu ta bin despues di nos tambe por gosa di nos isla.
,
September 08, 2012
...
Great con tur hende ta yora pa un par di molina di biento, cu by the way no ta aporta na nada tampoco, pero esey ta otro storia, pero ningun musca cu ta critica gobierno tras di gobierno cu ta bringa pa tene e maldita refineria ey habri! Of ta pasobra ta na San Nicolas, nos no mester worry?
,
September 08, 2012
...
Gobierno a hasi comedia cu ta mantene e refineria habri. Awor mi pregunta ta unda ta bai pone zonnepanelen?
Si algun cas ta haja mester traha boxnan cu ta loadup e energia di solo como reserve. Pues e molinanan di biento no mester Ta papia di forsa di stroom den lama, di solo y d biento. Si e molinanan ta fastioso lage pero si ta sigi cu un projecto cu hende no kier y cu salud ta un motibo ta hasimi pensa cu mester ta un compania cu ta inverti den campanja POR EL DINERO BAILA EL MONO Si SETAR no cambia su sistema e mester bai y buska MIO pero si MIO tin e mesun bron cu SETAR anto nan keda lew!!!!
,
September 09, 2012
Duna Comentario y/of Comparti riba Social Medi |
Mustra/Kita e formulario di comentario
